ՄԵԿՆԱՐԿՈՒՄ Է «ԱՐՄՄՈՆՈ» 13-ՐԴ ՓԱՌԱՏՈՆԸ
Արխիվ 12-16ՄԵԿՆԱՐԿՈՒՄ Է «ԱՐՄՄՈՆՈ» 13-ՐԴ ՓԱՌԱՏՈՆԸ
«Արմմոնո» միջազգային թատերական մոնոներկայացումների ամենամյա 13-րդ փառատոնն այս տարի տեղի կունենա մայիսի 6-11-ը: Փառատոնի շրջանակում կցուցադրվի 31 ներկայացում` ԱՄՆ-ից, Քուվեյթից, Մարոկոյից, Եգիպտոսից, Բուլղարիայից, Լեհաստանից, Ռուսաստանից, Բելառուսից, Լիտվայից, Իրանից եւ բնականաբար նաեւ Հայաստանից:
ՀՀ մշակույթի նախարարության աջակցությամբ` Հայաստանի թատերական գործիչների միության «Արմմոնո» փառատոնի մեկնարկը կտրվի Մ. Միտուայի «Լյուսիեն Լյուկ» մոնոներկայացումով` երիտասարդ դերասան Արեգ Գեւորգյանի խաղով եւ Գոռ Մարգարյանի բեմադրությամբ:
ԱՄՆ-ից ժամանած դերասան, երգիչ Բրեմներ Ֆլետչեր Դատին կցուցադրի «Կաբարե» մոնոներկայացումը, որտեղ դերասանը համադրում է օպերային երգեցողություն, դերասանի վարպետություն եւ պլաստիկա:
«Իրավունքի» հետ զրույցում փառատոնի տնօրեն ՄԱՐԻԱՆՆԱ ՄԽԻԹԱՐՅԱՆԸ
տեղեկացրեց, որ փառատոնին իր մասնակցությունը կունենա նաեւ հայ թատերասեր հանրությանն արդեն ծանոթ ՌԴ վաստակավոր արտիստ Իրինա Եվդոկիմովան. «Այս անգամ Իրինան Հայաստան կգա 2 ներկայացումով` նախ մայիսյան հաղթանակներին նվիրված «Սպիտակ վալս» գրական-երաժշտական կոմպոզիցիայով, ապա` «Շտո-ս» մոնոներկայացումով, որը բազմաթիվ մրցանակների է արժանացել տարբեր միջազգային թատերական փառատոներում: Իսկ Բելառուսից կժամանի դերասանուհի Ելենա Դուդիչը եւ կներկայանա «Մռնչացող ճնճղուկը» մոնոներկայացումով: Փառատոնի շրջանակներում կցուցադրվի երկու մոնոներկայացում Լեհաստանից: Դերասանուհի Վիոլետ Կոմարը հայ հանդիսատեսին կներկայացնի Ս. Քեյնի «Պսիխոզ» եւ Մ. Գաուերի «Դիվա» մոնոներկայացումները»,- տեղեկացրեց Մ. Մխիթարյանն ու շեշտեց, որ այս տարի փառատոնի օրերին կանցկացվի նաեւ Արաբական երկրների օր` հայ հանդիսատեսը կծանոթանա արդի արաբական թատրոնի զարգացումներին:
Փառատոնի շրջանակներում Հ. Պարոնյանի անվան երաժշտական կոմեդիայի թատրոնի դերասանուհի Զարուհի Խաչատրյանը կներկայանա «Անլռելի զանգակատուն» գրական-երաժշտական կոմպոզիցիայով` նվիրված Հայոց ցեղասպանության 100-րդ տարելիցին: Նորա Բադալյանը` «Քիչ ավելի, քիչ պակաս», Ագնեսա Շահնազարյանը` «Շատերից մեկը», Անահիտ Մութաֆյանը` «Ճիչը», Հասմիկ Տեր Կարապետյանը` «Ժամանակի վարագույրը», Արամ Գյուրջյանը` «Մամուլի ասուլիս» մոնոներկայացումներով:
Մ. Մխիթարյանը նաեւ տեղեկացրեց, որ այս տարի «Արմմոնո-Դեբյուտ» ծրագիրը, որը կազմվել է Երեւանի թատրոնի եւ կինոյի պետական ինստիտուտի հետ համատեղ, կցուցադրվեն ուսանողական աշխատանքներ. ««Արմմոնո-Դեբյուտ» ծրագրում հանդես կգան Նորա Գրիգորյանը` «Ճամփորդը», Արինե Սուքիասյանը` «Անկում վերելքի համար», Հռիփսիմե Շահինյանը` «Ինչպես չբեմադրվեց» մոնոներկայացումներով: «Արմմոնո-Տրիումֆ» ծրագրում կներկայացվեն նախորդ տարվա հաջողություն գրանցած ներկայացումները` Արա Գեւորգյանը` «Ծխախոտի վնասի մասին» մոնոներկայացումով` ATSPINDIS IX (Լիտվա), ինչպես նաեւ Մոլդովայի միջազգային թատերական փառատոներում եւ Նարեկ Հարությունյանը`«Ռոմեո» մոնոներկայացումով, որը «Արմմոնո-Տրիումֆ»-ում այս տարի կներկայացվի նոր մեկնաբանությամբ»,- փաստեց փառատոնի տնօրենը:
Փառատոնի այս տարվա նորամուծություններից է «Արմմոնո-Կլաս» ծրագիրը, որտեղ իրենց մասնակցությունը կունենան դպրոցականներ: Ծրագրում կմասնակցեն Ա. Պուշկինի անվան դպրոցի բարձր դասարանների աշակերտները:
«Արմմոնո» փառատոնի հյուրերի թվում են մոնոներկայացումների միջազգային փառատոների տնօրեններ` Նինա Մազուրը (ՅՈՒՆԵՍԿՕ), Յոլանտա Սուտովիչը (Գերմանիա), Մարիա Տանանան (Լիտվա), Վեցլավ Գերասը (Լեհաստան), Իբրահիմ Քասիմ Ասիրին (Սաուդյան Արաբիա):
Փառատոնի շրջանակներում կանցկացվեն վարպետության դասեր:
Նշենք, որ 2014թ. 17 մոնոներկայացում Հայաստանից մասնակցել է տարբեր միջազգային մոնոփառատոների: Վրոցլավի (Լեհաստան) «Վրոստյա» 49-րդ մոնոներկայացումների միջազգային թատերական փառատոնին մասնակցած ՀՀ վաստակավոր արտիստ Մուրադ Ջանիբեկյանը վերադարձել է «Գրան պրի» մրցանակով: ՀՀ վաստակավոր արտիստ Նարինե Գրիգորյանը «Դզին» մոնոներկայացումով ներկայացել է Ռուսաստանի, Գերմանիայի, Բելառուսի միջազգային թատերական մոնոփառատոներին: Դերասանուհի Ագնեսա Շահնազարյանը «Պենելոպե» մոնոներկայացումով հանդես է եկել Ռուսաստանի, Իսրայելի, Գերմանիայի միջազգային թատերական մոնոփառատոներին:
2014թ. «Արմմոնո» միջազգային թատերական փառատոնի մասնակիցները «Թատերական Լոռի» փառատոնին ներկայացրել են 7 մոնոներկայացում:
ԼԻԼԻԹ ԵՂԻԱԶԱՐՅԱՆ
