ՀԱՐԳԵԼ ԱՇԽԱՏԱՎՈՐ ՄԱՐԴՈՒՆ ԵՎ ՆՐԱ ԱՇԽԱՏԱՆՔԸ
Արխիվ 12-16ՀԱՐԳԵԼ ԱՇԽԱՏԱՎՈՐ ՄԱՐԴՈՒՆ ԵՎ ՆՐԱ ԱՇԽԱՏԱՆՔԸ
Ինչպիսի՞ տրամադրությամբ է «Սահմանադրական իրավունք միություն» կուսակցությունը դիմավորում Աշխատավորների միջազգային օրը:
ՍԻՄ կուսակցության Մարդու իրավունքների հանձնաժողովի ղեկավար Ա. Աբգարյանին այս հարցով դիմեցինք նկատի ունենալով այն փաստը, որ` Հայաստանի բարոյական անվտանգությանը սպառնացող հայրենական ու արտերկրյա կամա թե ակամա գործիչների դեմ շարունակական պայքարից զատ ՍԻՄ-ը անհրաժեշտ է համարում կանգնել աշխատավոր մարդու իրավունքի պաշտպանությանը իրեն հասանելի բոլոր միջոցներով եւ հնարավորությունների սահմաններում:
«Կուսակցության տրամադրությունը բավարար լավատեսական է: Լավատեսությունը հիմնված է այն փաստի վրա, որ իր կազմավորման պահից ՍԻՄ-ը հավատարիմ է մնացել իր սկզբունքներին` պաշտպանել մարդու իրավունքները և լինել այն անձանց կողքին, որոնք կռիվ են տալիս իրենց խախտված իրավունքները վերականգնելու համար: Մեր ընթերցողները, հավանաբար, լավատեղյակ են, թե լայնածավալ ինչպիսի ճնշումների պայմաններում է իր առաքինությունը իրականացնում կուսակցությունը: Միաժամանակ, հենց այդ ճնշումները վկայում են այն մասին, որ ՍԻՄ-ի գործունեոււթյունը առավելագույնս արդյունավետ է: Դա վերաբերում է աշխատավոր ու աշխատելու ցանկություն ունեցող քաղաքացիների շահերի պաշտպանությանը դատական ու պետական այլ կառույցներում:
Վերջին ժամանակաշրջանում կուսակցության հնարավորությունները շեշտակի ավելացել են. ՍԻՄ-ն ունի իր ներկայացուցիչը ՀՀ օրենսդիր մարմնում: Կարծում եմ, կարիք չկա հատ-հատ նշել ՍԻՄ կուսակցության նախագահ, ԱԺ պատգամավոր Հայկ Բաբուխանյանի հրապարակայնորեն իրականացվող քայլերը աշխատող մարդու իրավունքի պաշտպանության ոլորտում:
2014-ին մենք ակտիվորեն աջակցեցինք «Արմենալ»-ի աշխատավորներին իրենց իրավունքները պաշտպանելու հարցում: Մեզ դիմել էին նաեւ այլ քաղաքացիներ: Պատգամավոր Հայկ Բաբուխանյանին դիմումներ են ուղարկում տարբեր ոլորտներից: Հարցեր կան եւ Հարավկովկասյան երկաթուղու հետ: Մի շարք հարցումներ են ուղղվել Աշխատանքի տեսչություն: Այդ կառույցը չգիտես ինչու գտնվում է Առողջապահության նախարարության կազմում, եւ, ցավոք, ոչ միշտ է արդարացնում քաղաքացիների հույսերը իրենց աշխատանքային իրավունքները պաշտպանելու հարցում:
Բոլոր դեպքերում հարցը գտնվում է ՍԻՄ կուսակցության ուշադրության կենտրոնում:
