Հանդիպման յուրահատկությունն այն էր, որ այն ունեցավ հրապարակային մաս. Երեք նախագահների հանդիպման հետքերով Լինում են պահեր, երբ ուզում եմ քեզ մի բան պատմել ու լսել՝ ինչ կասես Իրականացված կապիկ-շոուն ցույց է տալիս, որ այսօրվա ընդդիմությունը չի գործում. Արթուր Ֆարմանյան Մեր թանգարանն անվանում են փոքրիկ Տրետյակովյան պատկերասրահ, Աբրահամյանին՝ մեր օրերի Տրետյակով. Մկրտչյան Զանզիբարում վեցից ավելի հյուրանոցներ ամբողջությամբ այրվել են Տասը տարի՝ ռուսական արվեստի թանգարանի վերափոխման ճանապարհին Թուրքիան և ԵՄ-ն բանակցություններ են վարում անվիզա ռեժիմի ներդրման վերաբերյալ Գերմանիան հրաժարվել է Լեհաստանով տանկային շարասյուներ տեղաշարժելուց Լավրովը կասկածի տակ դրեց Գերմանիայի և Բրիտանիայի պաշտպանության նախարարների ադեկտվատությունը Զելենսկի. ԱՄՆ-ն Ուկրաինային չի փոխանցում նույնիսկ Եվրոպայի կողմից վճարված Patriot հրթիռները

Գ. ԿՅՈԿՉՅԱՆԸ ԲԱՑԱՀԱՅՏՈՒՄ Է ԵՂԵԼ «ՆՈՐ ԱԼԻՔ» ՄՐՑՈՒՅԹԻ ԿԱԶՄԱԿԵՐՊԻՉՆԵՐԻ ՀԱՄԱՐ

Արխիվ 12-16

Գ. ԿՅՈԿՉՅԱՆԸ ԲԱՑԱՀԱՅՏՈՒՄ Է ԵՂԵԼ
«ՆՈՐ ԱԼԻՔ» ՄՐՑՈՒՅԹԻ ԿԱԶՄԱԿԵՐՊԻՉՆԵՐԻ ՀԱՄԱՐ


«Նոր ալիք» միջազգային երաժշտական փառատոնում այս տարի Հայաստանը կներկայացնի երգիչ ԳՐԻԳՈՐ ԿՅՈԿՉՅԱՆԸ: «Իրավունքի» հետ զրույցում երգիչն ասաց, որ ընտրությունն իր համար անսպասելի է եղել, քանի որ իր հետ միասին, Հայաստանը մրցույթում ներկայացնելու համար մրցել են եւս երկու մասնակիցներ, ոչ թե Հայաստանի, այլ մոսկվայաբնակ հայեր.

- Ինձ հետ կիսաեզրափակչում պայքարում էին «Ռուսաստանի ձայնը» նախագծի հայ երգիչներ Արծվիկ Հարությունյանն ու Սամվել Վարդանյանը, ով վերջին նախագծի ժամանակ ուղղակի փայլեց: Երբ իմացա իմ մրցակիցներին, իմ հաղթելու հավանականությունը քիչ թվաց, որովհետեւ իրենք ավելի մեծ փորձառություն ունեն, եւ Ռուսաստանում իրենց ավելի լավ են ճանաչում: Բայց, փաստորեն, ստացվեց այնպես, որ ժյուրիի ընտրությունը կանգ առավ հենց ինձ վրա:

- Գրիգոր, տարիներ առաջ էլ մասնակցեցիք «Նոր ալիքին», սակայն չհաղթահարեցիք կիսաեզրափակիչ փուլը Մոսկվայում: Այս անգամ ի՞նչ փորձառությամբ մեկնեցիք մրցույթին:
- Այո, մեկ անգամ էլ եմ մասնակցել եւ պիտի ասեմ, որ «Եվրատեսիլից» հետո այն ինձ համար ամենալավ մրցույթն է:
Իսկ այս անգամ առաջին հերթին մեկնել էի ոչ միայն իմ մասնակցության համար, այլ իմ սաներից մեկին` Մերի Քոչարյանին ներկայացնելու «Նոր ալիք» մանկական մրցույթում եւ որոշեցի միաժամանակ ես էլ իմ ուժերը փորձել: Մերի Քոչարյանը անցյալ տարի մանկական «Եվրատեսիլի» հայաստանյան ընտրության ժամանակ գրավեց 2-րդ հորիզոնականը: Պիտի ասեմ, որ Մերին «Նոր ալիքում» նույնպես մրցում էր իրենից ավելի փորձառու մասնակիցների հետ, որոնք եկել էին իրենց պրոդյուսերների օգնությամբ: Բայց նա կարողացավ հաղթահարել: Իսկ ես, անկեղծ, շատ իմիջիայլոց էի վերաբերվում իմ մասնակցությանը, որովհետեւ ինձ թվում էր, որ հաստատ ընտրելու են «Ռուսաստանի ձայնը» նախագծի հայ մասնակիցներից մեկին:

- Իսկ մի քիչ ռիսկային չէ՞, որ մրցույթի ժամանակ պիտի մտածեք ե՛ւ Ձեր, ե՛ւ Մերիի լավ մասնակցության մասին:
- Այո, ինչ-որ առումով գուցե ինձ օգնեց այն, որ ես ուղղակի հաճույք էի ստանում իմ կատարումից ու չէի վերաբերվում որպես մրցույթի, բացարձակ լարվածություն չկար: Ինձ թվում է սա էր գրավականը, որ ընտրեցին ինձ: Բացահայտում էի «Նոր ալիք» մրցույթի կազմակերպիչների համար, քանի որ ինձ ճանաչում էին որպես երաժիշտ, բայց ոչ որպես երգիչ: Իրոք, շատ ռիսկային է, բայց կփորձեմ հնարավորինս լավ աշխատել, որ ինչպես կիսաեզրափակչում, այնպես էլ եզրափակչում լավագույն արդյունքները կարողանանք գրանցել:
- Ալեքսանդր Ռեւզինը սիրում է միշտ փոփոխություններ մտցնել թե՛ երգերի, թե՛ արտիստների ոճի մեջ, ինչը հաճախ մասնակիցների դժգոհության առիթ է հանդիսանում:
- Մենք միանգամից ստորագրել ենք պայմանագրեր եւ նման փոփոխությունների դեպքում չենք կարող ոչինչ անել: Մեզ մնում է միայն համակերպվել ու լավագույնս դրսեւորվել: Բայց ինձ դուր է գալիս Ալ. Ռեւզինի աշխատաոճը, որովհետեւ շատ թարմ է մտածում, արդիական ու երիտասարդ մտածողություն ունի, ոչ թե կարծրացած ու սովետական... Հետեւաբար, հետաքրքիր ու հաճելի է նրա հետ աշխատել, նա էլ ինձ` որպես երաժշտի, համակրում է, որովհետեւ ինքն էլ սիրում է, որ երգիչը նաեւ երաժիշտ է լինում: Մեր համագործակցությունը կարծում եմ` լավ ավարտ կունենա:
- Որքան գիտեմ, այժմ մրցույթի մասնակցության համար երաժշտական պրոդյուսեր եք փնտրում:
- Չէի ասի, թե փնտրում եմ, ուղղակի այս տարի խնդիր ունենք. մրցույթի լիցենզիան թանկացել է եւ հեռուստաընկերությունները ֆինանսապես այդքան լավ վիճակում չեն, ու դեռ պարզ չէ, թե «ԱՐՍ» ընկերությունը որ հեռուստաընկերության հետ պայմանագիր կկնքի: Այսօր ինձ տեղեկացրին, որ պիտի հանդիպեն ու հետուստաընկերությունների ղեկավարների հետ պարզեն, թե այս տարի ով կլուսաբանի մրցույթը: Գործերի ընթացքը կախված է հենց դրանից: Նախ պիտի հասկանամ` ում հետ եմ աշխատելու, հետո նոր անցնեմ երգերի ընտրությանն ու հետագա քայլերին: Իսկ այս պահին դեռ ոչինչ պարզ չէ: Ռիսկային է ինքնուրույն որոշումներ կայացնելը, որովհետեւ ոչ թե մեզ, այլ  երկիր ենք ներկայացնելու եւ նախապատրաստական աշխատանքի արդյունքում միայն կարող ես լավ տեղեր գրավել:



Զրուցեց ԼԻԼԻԹ ԵՂԻԱԶԱՐՅԱՆԸ

 

Հավանեցի՞ր հոդվածը, կիսվիր ընկերներիդ հետ