Բանկերից տուժածների թիվը գնալով աճում է
Արխիվ 12-16Բանկերից տուժածների թիվը գնալով աճում է
Վերջին տարիներին գնալով աճում է հայաստանյան բանկերից և վարկային կազմակերպություններից տուժած քաղաքացիների, ինչպես նաև իրավաբանական անձանց թիվը: Չնայած դեռևս հստակ վիճակագրություն չկա, թե օրինակ վերջին 5 կամ 10 տարիների ընթացքում քանի մարդ է կորցրել իր տունը, գույքը, բիզնեսը և այլ, բայց այն, որ բանկերի տոկոսներից «խեղդվելու» պատճառով շատերն են անտուն և անգործ մնացել, ոչ ոք հերքել չի կարող: Չնայած միշտ չէ, որ բանկ-անհատ, կամ բանկ- ձեռնարկատեր հարաբերություններում բանկն է մեղավորը լինում, բայց այն, որ մասնավոր բանկերի կողմից վարվող քաղաքականության արդյունքում դրամատներն այնուամենայնիվ շահողի դերում են լինում՝ փաստ է: Բանկերից և վարկային կազմակերպություններց տուժածներին օգնելու նպատակով արդեն մոտ 10 օր է գործում է «Տուժած վարկառուների իրավական պաշտպանության կենտրոն» հասարակական կազմակերպությունը: Այս կարճ ընթացքում կազմակերպությունն արդեն ավելի քան 44 զանգ է ստացել, որը օր-օրի աճում է: «Իրավունքի» թղթակցի հետ զրույցում կազմակերպության իրավաբանական խմբի ղեկավար Մհեր Շահնազարյանն ասաց, որ տուժած վարկառուների խնդիրը պետք է դիտարկել երկու տեսանկյունից: Առաջինը՝ երբ վարկառուն իր մեղքով է տուժել, և երկրորդ՝ երբ ամենայն հավանականության վարկառուն տուժել է բանկի ոչ իրավաչափ գործողությունների պատճառով: «Կազմակերպության գործունեության նպատակն է բարձրացնել քաղաքացիների իրավագիտակցության աստիճանը, ինչպես նաև օգնել հստակեցնելու բանկ-հաճախորդ իրավահարաբերությունները: Խնդիրները կարելի է բաժանել երեք հիմնական խմբի: Հիմանական բողոքները վերաբերում են վերջին շրջանում տեղի ունեցած դրամ-դոլար փոխարժեքի տատանումներին, որը դոլարային վարկերի դեպքում խնդիրների առջև է կանգնեցրել վարկառուներին, երկրորդը՝ բռնագանձման ծանուցումներն են: Բողոքների երրորդ խումբը վերաբերում է գույքի վաճառքից բողոքներին»,- ասաց Մհեր Շահնազարյանը:
Հ.Գ. Կազմակերպությանը դիմած 44 դիմողից 25-ը «ՎՏԲ Հայաստան բանկ»-ի շահառուներն են եղել, որից 11-ի դեպքում բանկի կողմից իրավախախտում չի արձանագրվել, 12-ին տրվել է անվճար իրավաբանական խորհրդատվություն, 2 գործով էլ նյութեր են նախապատրաստվում դատարան դիմելու համար: 6 զանգ է ստացվել «Արդշինբանկ»-ից, որոնք բոլորն էլ ստացել են անվճար խորհրդատվություն: Զանգերի թվում 2 բողոք է ստացվել «Պրոկրեդիտ» բանկից, որոնց մասով նյութեր են նախապատրաստվում դատարան դիմելու համար: 1 զանգ գրանցվել է «Հայբիզնես» բանկից, որի դեպքում կրկին տրվել է անվճար իրավաբանական խորհրդատվություն:
ԱՐՄԻՆԵ ԳՐԻԳՈՐՅԱՆ
