ՅԱՆԿՈՎՍԿԻՆ ՀՊԱՐՏ Է, ՈՐ ԳՏՆՎՈՒՄ Է ՀԱՅԱՍՏԱՆՈՒՄ
Արխիվ 12-16"Գրական տապան-2015" միջազգային փառատոնի շրջանակներում Հայաստանում է գերմանացի գրող, հրապարակախոս, Գերմանիայի գրողների միության անդամ ՅՈՒՐԳԵՆ ՅԱՆԿՈՎՍԿԻՆ:
Գրողը Հայաստան է այցելել, որպեսզի ընթերցողին ներկայացնի իր հեղինակած երկու գրքերը`"Ափ մը մոխիր", որտեղ ներառված են Հայոց ցեղասպանության զոհ դարձած արեւմտահայ գրողների ստեղծագործությունները եւ "Ուրացված-մոռացվա՞ծ", որտեղ ներկայացված են հայ եւ գերմանացի աշակերտների շարադրությունները` նվիրված Հայոց ցեղասպանությանը: Նախապես հայ եւ գերմանացի աշակերտների համար հայտարարվել էր Հայոց ցեղասպանության թեմայով շարադրության մրցույթ, որի արդյունքում ընտրվել են լավագույնները եւ տպագրվել մեկ գրքում: Գրքերը հրատարակվել են հինգ հարյուր տպաքանակով եւ առաջիկայում կթարգմանվեն մի քանի լեզուներով: Երկու գրքերն էլ հրատարակվել են Գերմանիայում, որոնք առաջին անգամ հանրությանը ներկայացվեցին ապրիլի 24-ին` Ծիծեռնակաբերդի հուշահամալիրում: Հայաստանի գրողների միության նախագահ Էդվարդ Միլիտոնյանը կարեւորելով` փաստեց, որ գրքերը Հայաստանի եւ Գերմանիայի գրողների միությունների աշխատանքի արդյունքն են:
"ՀՊԱՐՏ ԵՄ, ՈՐ ՀԱՅՈՑ ՑԵՂԱՍՊԱՆՈՒԹՅԱՆ
100-ՐԴ ՏԱՐԵԼԻՑԻՆ ՀԱՅԱՍՏԱՆՈՒՄ ԷԻ"
Անձամբ Յ. Յանկովսկին հպարտ է, որ գտնվում է Հայաստանում, ինչը նա չթաքցրեց լրագրողների հետ հանդիպման ժամանակ.
- Հպարտ եմ, որ Հայոց ցեղասպանության 100-րդ տարելիցին Հայաստանում էի: Հայաստանը եւ Սաքսոնիա-անհալտ երկրամասը ունեն համագործակցության եւ ընկերական մեծ կապեր: Ուրախ եմ` այսօր հայ ընթերցողին ներկայացնել այն գրքերը, որոնք հրատարակվել են Գերմանիայում եւ վերաբերում են հային ու Հայաստանին:
"ՑԵՂԱՍՊԱՆՈՒԹՅԱՆ ՍԱՐՍԱՓՆԵՐԸ ՓՈԽԱՆՑԵԼԸ ԴԺՎԱՐ Է"
-Հայոց ցեղասպանություն. այստեղ խոսքը անմարդկային եւ սարսափելի այնպիսի երեւույթների մասին է, որոնք մանրամասնորեն հնարավոր չէ ներկայացնել: Ավելի շատ կցանկանայի, որ դրա մասին բոլորը կարդային այս շարադրություններում: Ցեղասպանության սարսափները ընթերցողին փոխանցելը դժվար է:
ԶՎԱՐԹ ԽԱՉԱՏՐՅԱՆ
Հավանեցի՞ր հոդվածը, կիսվիր ընկերներիդ հետ
