ԱՇԽԱՏԱՆՔԱՅԻՆ ԳՐՔՈՒՅԿՆԵՐԸ ԴԱՌՆՈՒՄ ԵՆ ԱՎԵԼՈՐԴ
Արխիվ 12-16- Ըստ Աշխատանքային օրենսգրքում փոփոխություն կատարելու նախագծի, որն ստացել է հավանություն եւ ուղարկվել ԱԺ քննարկմանը` աշխատանքի ընդունվողների համար աշխատանքային գրքույկ վարելու` գործատուի պարտավորությունը հանվել է: Խնդրում ենք պարզաբանել, ինչո՞վ է դա պայմանավորված, եւ ինչո՞ւ է այդ փոփոխությունը կատարվում հիմա:
Ս. ՀՈՎՍԵՓՅԱՆ, ԵՐԵՎԱՆ
- Հարցին պատասխանում է ՀՀ աշխատանքի եւ սոցիալական հարցերի նախարարության
աշխատակազմի աշխատանքի եւ զբաղվածության վարչության պետ ԹԱԴԵՎՈՍ ԱՎԵՏԻՍՅԱՆԸ:
-Աշխատանքային օրենսգրքում փոփոխություն կատարելու նախագծի ընդունվելուց հետո աշխատողները կարող են աշխատանքի ընդունվել առանց աշխատանքային գրքույկի` նկատի ունենալով, որ հանրապետությունում ներդրված է աշխատողների անձնավորված հաշվառման համակարգը: Յուրաքանչյուրի վերաբերյալ տեղեկատվությունը վարվում է պետական լիազոր մարմնի կողմից, եւ գործատուները պարտավոր են պարբերաբար կառավարության սահմանած կարգով տեղեկատվություն ներկայացնել: Եվ քանի որ այդտեղ կա աշխատողի մասին տեղեկատվություն, աշխատանքային գրքույկները դառնում են ավելորդ եւ իզուր ծանրաբեռնում են այդ հարաբերությունները: Դա ձեռնտու է ե՛ւ աշխատողին, ե՛ւ գործատուին, ու դա է պատճառը, որ նախագծով առաջարկվում է, որ այդ պարտադիր պահանջը հանվի:
ԻԼՈՆԱ ԱԶԱՐՅԱՆ
Հավանեցի՞ր հոդվածը, կիսվիր ընկերներիդ հետ
