ՀԱՐՅՈՒՐԱՄՅԱԿՆ ՈՒ ԳԱԼԻՊՈԼԻՆ ՎՐԱՍՏԱՆԸ "ԿԻՍԵՑ"
Արխիվ 12-16Ցեղասպանության 100-ամյակն ու թուրքական Գալիպոլին "կիսեց" նաեւ Վրաստանը: Վրացական մի խումբ մեկնել է Թուրքիա, իսկ ահա Ցեղասպանությանը նվիրված միջոցառումներին մասնակցելու համար Հայաստան է ժամանել Վրաստանի խորհրդարանի փոխնախագահ, Հայաստանի հետ բարեկամության խումբը ղեկավարող Մանանա Կոբախիձեի գլխավորած պատվիրակությունը, որի կազմում կան նաեւ հայտնի վրացահայ մտավորականներ:
Իսկ թե բուն Վրաստանում Ցեղասպանությանը նվիրված ինչ միջոցառումներ են սպասվում, այս մասին Վրաստանում Հայաստանի դեսպանատնից մեզ հայտնեցին հետեւյալը.
- Վրաստանում Հայոց ցեղասպանությանը նվիրված միջոցառումները մեկնարկել են դեռեւս մարտ ամսից եւ շարունակվելու են մինչեւ ապրիլի 24-ը: Ապրիլի 23-ի երեկոյան Թբիլիսիի եկեղեցու բակում ցուցադրվեց Մայր աթոռում անցկացվող սրբադասման արարողության ուղիղ հեռարձակումը, որից հետո` 19:15-ին Վիրահայոց թեմի եկեղեցու եւ քույր եկեղեցիների զանգերը հնչեցին հարյուր անգամ: Իսկ ապրիլի 23-ի լույս 24-ի գիշերը Վրաստանում բնակվող հայ ընտանիքների լուսամուտներին եւ պատշգամբներին մոմեր վառվեցին` ի հիշատակ 1915 թվականի ցեղասպանության անմեղ նահատակների: Ցեղասպանությանը նվիրված միջոցառումները Վրաստանում կավարտվեն ապրիլի 24-ին ժամը 11:30-ին, երբ Թբիլիսիի Սուրբ Էջմիածին եկեղեցում կմատուցվի Ցեղասպանության սրբադասված նահատակների հիշատակի պատարագ:
ԻԼՈՆԱ ԱԶԱՐՅԱՆ
Հավանեցի՞ր հոդվածը, կիսվիր ընկերներիդ հետ
