ՈՐ ԵՐԿՐՆԵՐԻ ՆԱԽԱԳԱՀՆԵՐԸ ԿՄԵԿՆԵՆ ԱՆԿԱՐԱ ԱՊՐԻԼԻ 24-ԻՆ
Արխիվ 12-16Հայոց ցեղասպանության 100-րդ տարելիցի միջոցառումները համակարգող, նախագահի աշխատակազմի ղեկավար Վիգեն Սարգսյանի երեկվա հայտարարությունից հետո, թե ապրիլի 24-ի միջոցառումներին կմասնակցեն 4 երկրների` Ռուսաստանի, Ֆրանսիայի, Կիպրոսի եւ Սերբիայի նախագահները, պաշտոնական Անկարան հրապարակել է իր հյուրերի ցանկը: "Անադոլու" գործակալության հաղորդմամբ` Չանաքքալեի (Գալիպոլի) ճակատամարտի 100-ամյակի պատրվակին նվիրված միջոցառումներին մասնակցելու համար Թուրքիա կժամանեն 21 պետությունների առաջնորդներ:
Վերջիններիս թվում հիշատակվում են` Մեծ Բրիտանիայի թագաժառանգ արքայազն Չարլզը« Ադրբեջանի նախագահ Իլհամ Ալիեւը, Պակիստանի նախագահ Մամնուն Հուսեյնը, Քաթարի էմիր Թամիմ բին Համա աս Սասնին, Թուրքմենստանի նախագահ Գուրբանգուլի Բերդիմուհամեդովը: Միջոցառումներին սպասվում են նաեւ Ալբանիայի, Բոսնիայի եւ Հերցոգովինայի, Ջիբութիի, Չադի, Հարավային Սուդանի, Իրաքի, Իռլանդիայի, Չերնոգորիայի, Հյուսիսային Կիպրոսի, Կոսովոյի, Մակեդոնիայի, Մալիի, Նիգերի, Սենեգալի, Սլովենիայի, Սոմալիի նախագահները:
Հայտնի է նաեւ, որ վարչապետի մակարդակով միջոցառումներին ներկայացված կլինեն Ավստրալիայի, Նոր Զելանդիայի, Մոլդովայի, Ռումինիայի վարչապետները: Պաշտոնյաների թվում նշվում են նաեւ մի շարք երկրների նախարարներ:
Ի դեպ, թուրքերի ներկայացրած ցանկից դժվար չէ նկատել, որ Գալիպոլիի ճակատամարտի 100-ամյակին բարձր մակարդակով կներկայանան հիմնականում թուրքական տարբեր պետություններ, իսկ գլխաքանակ ապահովելու համար գնացել-հասել են մինչեւ Աֆրիկայի խորքերը: Համենայնդեպս, միակ տեսանելի անձնավորությունը արքայազն Չարլզն է, թեեւ հազիվ թե որեւէ մեկը նրան համարի համաշխարհային քաղաքականության վրա որեւէ էական ազդեցություն ունեցող գործիչ: Մի խոսքով, որեւէ ծանրակշիռ լիդեր Թուրքիա չի գնում եւ, որպես համեմատություն, նշենք, որ միայն Օլանդի Հայաստան գալը ավելի նախընտրելի է, քան Թուրքիա 21 առաջնորդների գնալը: Եթե հավելենք նաեւ ՌԴ նախագահի Հայաստան այցելելու փաստը, ապա դժվար չէ կռահել, որ մեր երկիրը հյուրընկալելով ՄԱԿ-ի Անվտանգության խորհրդի երկու մշտական անդամ երկրների ղեկավարների, ստվերում է թողնում Գալիպոլիի 100-ամյակ հորջորջված թուրքական "կռիսությունը":
Հավանեցի՞ր հոդվածը, կիսվիր ընկերներիդ հետ
