ԲՀԿ-ԱԿԱՆ ԱՎԱԳԱՆԻՆԵՐԸ ՄՆԱՑԻՆ 13-ՈՎ
Արխիվ 12-16
Օրերս ԲՀԿ-ական Ռաֆֆի Գյոզալյանը պաշտոնապես հայտարարություն տարածեց "Բարգավաճ Հայաստան" կուսակցությունից եւ Երեւանի ավագանու ԲՀԿ խմբակցությունից դուրս գալու մասին: Նա ավագանու թվով չորրորդ անդամն էր, որը լքեց ԲՀԿ խմբակցությունը: Պարզելու համար, թե այս պահին կա՞ն արդյոք այլ դիմումատուներ եւս, "Իրավունքը" զրուցեց Երեւանի ավագանու ԲՀԿ խմբակցության ղեկավար ԹԱՄԱՐ ՊՈՂՈՍՅԱՆԻ հետ:–Տիկին Պողոսյան, Ձեր կարծիքով` Ռաֆֆի Գյոզալյանը ինչո՞ւ Երեւանի ավագանու ԲՀԿ խմբակցությունից եւ ԲՀԿ կուսակցությունից դուրս գալու դիմում ներկայացրեց, եւ այդյո՞ք այլ դիմումներ էլ կան:
– Այս պահին միայն ինքն է դիմում ներկայացրել, որի մասին նա պաշտոնապես ներկայացրել է լրատվամիջոցներով, որով, կարծում եմ, սպառիչ պատասխան է տվել: Դա իր անձնական որոշումն է, եւ այն ոչ մի կապ չունի խմբակցության ընդհանուր դիրքորոշումների հետ: Դա իր անձնական որոշումն է:
– Նրան ո՞վ կփոխարինի` Ձեր կարծիքով:
– Նրան ոչ ոք չի փոխարինի, նա մնում է Երեւանի ավագանու անդամ: Նա դուրս է գալիս խմբակցությունից, բայց մնում է ավագանու անդամ` ավագանու անդամակցությունից լիազորությունները վայր չի դնում:
– Փաստորեն, անկախ անդամի կարգավիճակ է ստանում, օրենքը նման կարգավիճակ սահմանո՞ւմ է:
– Բոլոր նրանք, ովքեր որ դուրս են եկել խմբակցությունից, շարունակում են մնալ ավագանու անդամ: Օրենքի մեջ կա անկատարություն: Օրենքը չի կարգավորում, թե կուսակցությունից եւ խմբակցությունից դուրս գալուց հետո նրանց կագավիճակն ինչպիսի՞ն է, որովհետեւ ավագանու դեպքում չկա անկախ պատգամավորի կագավիճակ: Ես այդ մասին պաշտոնապես մեկնաբանություն տվել եմ, եւ նույն իրավիճակն է` դուրս է եկել խմբակցությունից, բայց մնում է ավագանու անդամ: Ես` որպես խմբակցության ղեկավար, Երեւանի քաղաքապետին տեղեկացրել եմ այդ մասին, եւ ավագանու նիստում քաղաքապետն այդ մասին պաշտոնապես հրապարակել է:
– Այսինքն` ավագանու կազմում որեւէ փոփոխություն չի՞ լինում նման դեպքերում:
– Ոչ:
Հիշեցնենք, որ Երեւանի ավագանու կազմում ԲՀԿ խմբակցության անդամների թիվը 17-ն էր, որից դուրս գալու դիմում մինչ այս պահը ներկայացրել են 4-ը, եւ ներկայումս ԲՀԿ խմբակցությունում մնացել են 13-ը:
ԱՐՄԻՆԵ ԳՐԻԳՈՐՅԱՆ
Հավանեցի՞ր հոդվածը, կիսվիր ընկերներիդ հետ
