ԴԻԱՀԵՐՁԱՐԱՆԻ ՏՆՕՐԵՆ. «ԴԻԱԿԻՑ ԿԱԽՎԱԾ ԳԵՐ Է, ԹԵ ԳԵՐ ՉԻ...5, 10 ՀԱՐՑ Է ՏՐՎՈՒՄ, ՆՈՐ ԳԻՆ ՃՇՏՎՈՒՄ»
Արխիվ 12-16ԴԻԱՀԵՐՁԱՐԱՆԻ ՏՆՕՐԵՆ. «ԴԻԱԿԻՑ ԿԱԽՎԱԾ ԳԵՐ Է, ԹԵ
ԳԵՐ ՉԻ...5, 10 ՀԱՐՑ Է ՏՐՎՈՒՄ, ՆՈՐ ԳԻՆ ՃՇՏՎՈՒՄ»
«Իրավունքն» այսօր հրապարակել է «Արմենիա» հանրապետական բժշկական կենտրոնի ենթակայության տակ գործող դիահերձարանին առնչվող քաղաքացի Դոնարա Ալեքսանյանի բողոքը:
Հիշեցնենք` հաշմանդամ ազատամարտիկին դիահերձելու համար դիահերձարանը պահանել էր 85.000 դրամ, սակայն Դոնարա Ալեքսանյանը հրաժարվել էր այն վճարել`ասելով, որ ինքը ազատամարտիկի հարազատը չէ, բացի այդ` ազատամարտիկը հաշմանդամության կարգ ունի:
Բացի ազատամարտիկի դիահերձման համար գումար պահանջելուց` քաղաքացին մեզ հավաստիացնում էր, որ Արտակ Դաշտոյանը փորձել է ձեռք բարձրացնել իր վրա եւ կոպտել է իրեն:
«Իրավունքին» ի վերջո հաջողվեց կապ հաստատել նաեւ դիահերձարանի տնօրեն Արտակ Դաշտոյանի հետ, ում անունը, ի դեպ, մինչ այդ դիահերձարանի աշխատակիցները գաղտնի էին պահում:
Արտակ Դաշտոյանը հերքեց Դոնարա Ալեքսանյանի մեղադրանքները`ասելով, որ նա սուտ է ասում: Մասնավորապես, անդրադառնալով տիկին Ալեքսանյանի վրա ձեռք բարձրացնելու փաստին, մեր զրուցակիցն այսպես արձագանքեց. «Ինքը դիմել է իրավապահ մարմիններին, որոնք եկել են մեզ էլ են լսել, իրեն էլ: Նման բան չի եղել: Եթե նման բան լիներ, գործ հարուցած կլինեին»:
Ինչ վերաբերում է հաշմանդամ ազատամարտիկի դիահերձման համար գումար պահանջելուն ու Դոնարա Ալեքսանյանի հետ կոպիտ խոսելուն, դիահերձարանի տնօրենը դա շանտաժ համարեց. «Եթե շանտաժ անելու համար են գալիս, հնարավոր է նման պատասխան ստանան: Բայց համոզված եմ` նման պատասխան չի ստացել, հաշմանդամության թուղթ էլ չի ներկայացրել մեզ: Մենք պարտավոր ենք 13.000 դրամից իրեն ազատելու, դիմելու, որ պետպատվերով անցի այդ պրոցեսը (նկատի ունի դիահերձումը-խմբ.): Սակայն բոլորը հասկանալով-չհասկանալով ցանկանում են, որ դիահերձարանում իրենց նոքարություն անեն: Ըտենց չի կարելի, ազիզ ջան: Դիահերձումը այլ բան է, շոր հագցնելը` այլ բան: Ես, հնարավոր է, նրան ասած լինեմ, եթե անվճար անենք, (մենք անվճար արած կլինենք, եթե ինքը փաստաթուղթ է ներկայացրել) մնացած բոլոր հարցերը վճարովի է: Եթե չեք ցանկանում վճարել, խնդրեմ եզդիներ կան, մալականներ կան, որ իրենք են գալիս լողացնում իրենց հանգուցյալին, դնում դագաղի մեջ ու տանում: Էդ մարդկանցից հո փող չե՞նք ուզում: Հիմա եթե մեր հայերի մեջ մարդիկ կան, որ չեն ուզում փող տան, իրենք են ուզում լողացնեն, հագցնեն, հանգուցյալին, խնդրեմ եկեք լողացրեք, հագցրեք»:
Անդրադառնալով «Իրավունքի» նախորդ հոդվածում նկարագրված դիահերձման համար տեղի ունեցած սակարկությանը` Արտակ Դաշտոյանը սա նորմալ համարեց` ասելով. «Լինում է, որ նաեւ 55.000 դրամ են ուզում, որը հետո դառնում է 25.000 դրամ: Լինում է, որ 100.00 դրամ են պահանջում, դա դառնում է ոչ մի բան: Հանգուցյալը մեզ մոտ եթե ընդունվում է, ըստ իրավիճակի, ըստ հարազատի ցանկությունների, ինչ կարգի զմռսում պիտի, ուր պիտի տարվի, 5, 10 հարց է տրվում, նոր գին է ճշտվում»:
Հիշեցրինք դիահերձարանի տնօրենին, որ իրենց մոտ փակցված գնացուցակի համաձայն` դիահերձումն արժե 13.000 դրամ: Ինչպե՞ս է, որ քաղաքացիներից գանձվում են տարբեր գումարներ: Ի պատասխան պրն Դաշտոյանը չափորոշիչների մասին հիշեց, ապա բացատրեց` ինչ է դիահերձումը, իսկ հետո հրավիրեց ներկա լինել դիահերձման գործընթացին: «Հերձում կատարել, նշանակում է վերցնել օրգաններից կտորներ անալիզի համար`պարզելու մահվան պատճառը եւ կարել դիակը: Այսինքն` 13.000 դրամի մեջ միայն սա է մտնում: Բայց գիտեք, որ դիակը պիտի լվացվի, շոր հագցվի, հարդարվի, դագաղի մեջ դրվի, սրսկումներ արվի: Դիակից կախված` գեր է, թե գեր չի, ինչ հիվանդություն է ունեցել, օնկո հիվանդությամբ է տառապել, թե սրտից է մահացել: Դրանք պրոցեսներ են: Այս բոլոր աշխատանքներն ունեն իրենց արժեքը»:
Դիահերձարանի գնային քաղաքականությունը, ինչպես պարզ դարձավ Արտակ Դաշտոյանի հետ զրույցից, որոշում են ախտաանատոմիական ծառայությունները: Պրն Դաշտոյանը նաեւ հավաստիացրեց, որ հանգուցյալին մատուցած ծառայությունների դիմաց կտրոն են տալիս հարազատներին, սակայն թե տիկին Ալեքսանյանը, թե մեզ դիմաց մյուս քաղաքացին հակառակն էին պնդում:
ՍՈՆԱ ԴԱՎԹՅԱՆ
