"ԱՇԽԱՏԱՆՔԱՅԻՆ ԽՈՒՄԲԸ ՍՏՈՒԳՈՒՄՆԵՐ Է ԻՐԱԿԱՆԱՑՆՈՒՄ ՎԱՐԴԵՆԻՍԻ ՏՈՒՆ-ԻՆՏԵՐՆԱՏՈՒՄ"
Արխիվ 12-16Հայաստանի պետական չորս ծերանոցներում այսօր ապրում եւ զավակների սպասումով օր է մթնեցնում 1090 տարեց: Պետությունը մեկ հոգու համար ծախսում է օրական 2500 դրամ` 1300-ը` սննդի, իսկ մնացածը` դեղորայքի վրա: Թեեւ համոզված ենք, որ կուշտ կամ սոված լինելու խնդիրը նրանց քիչ է հուզում. նրանք ավելի շատ մտածում են կյանքի մայրամուտը զավակների եւ թոռների հետ անցկացնելու, քիչ թե շատ նրանց ուշադրության կենտրոնում լինելու մասին: Առավել եւս, որ լինում են դեպքեր, երբ ծերերի հետ տուն-ինտերնատի աշխատակիցները վարվում են այնպես, ինչպես ժամանակին նրանց հետ վարվել են իրենց զավակները...
Ի՞նչով են պայմանավորված վերջերս հաճախակի լսվող աղմկահարույց պատմությունները` տուն-ինտերնատների հետ կապված, ի՞նչ խնդիրներ ունեն ծերերը: Այս եւ այլ հարցերի շուրջ զրուցեցինք ՀՀ աշխատանքի եւ սոցիալական հարցերի նախարարության տարեցների հիմնահարցերի բաժնի պետ ԱՆԱՀԻՏ ԳԵՎՈՐԳՅԱՆԻ հետ, ով մեզ հետ զրույցում նախ հերթականª Վարդենիսի տուն-ինտերնատի հետ կապված աղմկահարույց պատմությանը.
-Վարդենիսի տուն-ինտերնատի շուրջ վերջերս մամուլում բարձրացված աղմուկը դեռեւս խիստ պայմանական է, քանի որ մենք միանշանակ չենք ընդունում, որ այն, ինչ գրված է եղել մամուլում, համապատասխանում է իրականությանը: Այնուամենայնիվ, աշխատանքի եւ սոցիալական հարցերի նախարար Արտեմ Ասատրյանը արձագանքել է եւ հենց նույն օրը աշխատանքային խումբ է կազմել ու գործուղել Վարդենիսի տուն-ինտերնատ` տեղում ուսումնասիրություններ անելու համար: Այժմ աշխատանքային խումբը ստուգումներ է իրականացնում տուն-ինտերնատում, շաբաթվա վերջին կվերադառնա եւ իր եզրակացությունները տալուց հետո միայն մենք մեր դիրքորոշումը կհայտնենք:
Բացի Վարդենիսից` մեր համակարգում կա եւս երեք տուն-ինտերնատ, որոնց հետ կապված ես կասեի, որ ոչ մի խնդիր չունենք, բնականոն հունով այդ աշխատանքներն ընթանում են:
- Այսօր որքա՞ն ծերեր են բնակվում տուն-ինտերնատներում:
- Բոլոր չորս տուն-ինտերնատում բնակվում է 1090 մարդ: Այդ թվումª հոգեկան առողջության խնդիր ունեցողներից 490-ը բնակվում է Վարդենիսում, իսկ մնացածը` մյուս երեք տուն-ինտերնատում: Քանի որ կանայք ավելի երկար են ապրում` ծերանոցներում կանանց թիվը գերակշռում է:
- Ի՞նչ միտումներ եք նկատում, գնալով անօթեւան ծերերի թիվը նվազո՞ւմ է, թե հակառակը:
- Մեկ տարուց ավել է, որ տուն-ինտերնատներում ¥բացի հոգեկան առողջության խնդիր ունեցողներից, որոնց թիվը գնալով շատանում է¤ ազատ տեղեր ունենք: Իսկ դա նշանակում է, որ դիմողների թիվը գնալով նվազում է:
- Հաճախ ծերանոցներում դժգոհությունների մեծ մասը կապված է սննդի հետ: Այս թեմայով էլ են ժամանակին սկանդալային բացահայտումներ եղել:
- Ճիշտն ասած` նման խոսակցություններ հաճախ եմ լսում, սակայն որեւէ կոնկրետ փաստ ինձ հայտնի չէ: Սնունդը գնումների մասին օրենքով մատակարարվում է: Եթե անորակ սնունդ է լինում, միանգամից մատակարարին փոխում է, այսինքնª ծերանոցը չի ընդունում ոչ որակյալ սնունդ: Ամեն դեպքում, եթե մեկ հոգի դժգոհ է ծերանոցի սննդից, ապա հավատացեք, 250 հոգի գոհ է: Իսկ երբ հստակ ունենում ենք սննդի հետ կապված խախտումներ, ապա աշխատակիցները կամ պատասխանատուներն անպայման ստանում են համապատասխան պատիժ: Նման դեպք գրանցվել է 1 տարի առաջ, երբ տուն-ինտերնատներից մեկի խոհանոցի աշխատողն ազատվեց աշխատանքից` սննդի որակի մասին բողոքի պատճառով: Սակայն վերջին շրջանում մենք տուն-ինտերնատի խնամողներից որեւէ գրավոր կամ բանավոր բողոք չենք ստացել:
- Դե եթե ամեն ինչ այդքան տեղը-տեղին է, ապա որո՞նք են այսօր տուն-ինտերնատներում բնակվող ծերերի հիմնական խնդիրները:
- Շատ ճիշտ հարցադրում էր, քանի որ, իհարկե, ինչքան էլ ես հիմա ասեմ, որ ամեն ինչ շատ լավ է, ճիշտ չի լինի: Բնականաբար խնդիրներ կան, եթե այսօր մեկ սենյակում ապրում է չորս հոգի` մենք պետք է հասնենք նրան, որ մեկ սենյակում ապրի մեկ կամ առավելագույնը` երկուսը: Անհրաժեշտ են ավելի շատ զբաղմունքի տեսակներ, միջոցներ լինեն ծերանոցներում, որ մարդիկ իրենց նախասիրություններին համապատասխան զբաղմունք գտնեն, հանգիստը կազմակերպվի ավելի լավ, լավանա սննդի տեսականին: Բայց մենք, ցավոք սրտի, ունենք պետության կողմից սահմանված չափորոշիչներ, ըստ այդմª կոնկրետ գումարի սահմաններում պետք է լինի ծերանոցի սնունդը: Ցանկանում ենք` ապագայում ծերանոցների ե՛ւ սնունդը, ե՛ւ զբաղմունքը, ե՛ւ մշակութային միջոցառումները լինեն ըստ նախասիրությունների, այնպես, ինչպես արտասահմանյան որոշ երկրներում են: Ինչ խոսք, ծերանոցները զարգացնելու, վիճակը բարելավելու խնդիրներ շատ կան, բայց այսօրվա մեր ունեցած հնարավորություններով` ծերանոցներում բավարար պայմաններ ունենք: Հաճախ աշխատավարձի ցածր լինելու, հաստիքների կրճատման հետ կապված` դժգոհություններ ենք ունենում նաեւ տուն-ինտերնատի աշխատակիցներից: Այսինքն, եթե այլ երկրներում մի աշխատակիցը խնամում է հինգ հոգու, ապա մեզ մոտª քսանհինգի:
ԻԼՈՆԱ ԱԶԱՐՅԱՆ
Հավանեցի՞ր հոդվածը, կիսվիր ընկերներիդ հետ
