«ՆՐԱՆՔ ՀԱՍԿԱՆՈՒՄ ԵՆ ՊԱՊԻ ԽՈՍՔԻ ԱՐԺԵՔՆ ՈՒ ՎԱԽԵՑԱԾ ԵՆ»
Արխիվ 12-16«ՆՐԱՆՔ ՀԱՍԿԱՆՈՒՄ ԵՆ ՊԱՊԻ ԽՈՍՔԻ
ԱՐԺԵՔՆ ՈՒ ՎԱԽԵՑԱԾ ԵՆ»
Հայոց ցեղասպանության 100-րդ տարելիցի շեմին յուրահատուկ համերաշխություն է տիրում ներքաղաքական դաշտում, իսկ մեր հարեւան երկրների մեդիա դաշտում օր օրի ավելի մեծ ալիք են բարձրացնում աղաղակող 100-ամյա ճշմարտությունը հերքելու վերջին ջղաձիգ փորձերը: Այս օրերին տեղի ունեցած պատմական իրադարձությունների, քաղաքական գործընթացների ու ապրիլի 24-ին հաջորդող զարգացումների մասին «Իրավունքը» զրուցեց ՀՀ պաշտպանության նախկին փոխնախարար ՎԱՀԱՆ ՇԻՐԽԱՆՅԱՆԻ հետ:
«ՀՌՈՄԻ ՊԱՊՆ ԱՄԲՈՂՋ ԱՇԽԱՐՀԻՆ ԱՌԱՋԱՐԿԵՑ
ՀԵՏԵՎԵԼ ԻՐ ՕՐԻՆԱԿԻՆ»
–Պարոն Շիրխանյան, Հռոմի պապը ի պաշտոնե համարձակություն ունեցավ Հայոց ցեղասպանությունը որակել` որպես 20-րդ դարի առաջին ցեղասպանություն, ինչը մեծ ապտակ էր Թուրքիայի համար: Ըստ Ձեզ, ի՞նչ հետեւանքներով է հղի այս իրողությունը:
– Դա ապտակ չէր Թուրքիային, այլ, ուղղակի, Հռոմի պապի համոզմունքի արտահայտումն էր, եւ նա հետեւողական է այդ խնդրում: Շատ բարձր եմ գնահատում այդ քայլը եւ ընդհանրապես Ցեղասպանության ճանաչմանը, հայ ժողովրդի աջակցությանն ուղղված նրա ջանքերին: Հռոմի պապն ամբողջ աշխարհին առաջարկեց հետեւել իր օրինակին: Կարծում եմ` հետեւանքը կլինի այն, որ Ցեղասպանության ճանաչման գործում մեծ առաջընթաց կունենանք:
– Հետեւելով թուրք-ադրբեջանական լրատվությանը` նկատվում է, որ մեծ հիսթերիա է սկսվել իրենց մոտ` ի նպաստ Հայաստանի կատարվող իրադարձություններից հետո...
– Հասկանալի է իրենց այդ հիսթերիան, որովհետեւ Հռոմի պապը մի սովորական ամերիկյան կոնգրեսմեն չէ: Նրանք հասկանում են Պապի խոսքի արժեքը, դրա համար էլ խիստ մտահոգ են ու վախեցած: Ընդհանրապես Հայոց ցեղասպանության ճանաչումը, եթե տեղի ունենա, դա Թուրքիայի եւ Ադրբեջանի համար նույնիսկ կատաստրոֆիկ երեւույթ կլինի, եւ բնական է, որ անհանգիստ են:
«ՉԵՄ ՈՒԶՈՒՄ ԱՄԵՆ ԻՆՉ ԽԱՌՆԵՆՔ ԻՐԱՐ»
–Ապրիլ 24-յան պաշտոնական միջոցառումներին նախատեսվում է, որ կմասնակցեն գերտերությունների առաջնորդներ կամ բարձրաստիճան պաշտոնյաներ: Ըստ Ձեզ, սա որեւէ կերպ կարո՞ղ է անդրադառնալ արցախյան հարցի վրա:
– Չեմ ուզում ամեն ինչ խառնենք իրար, ապրիլի 24-ը Հայոց ցեղասպանության 100-րդ տարելիցն է, մարդիկ գալիս են իրենց հարգանքի տուրքը մատուցելու հայ ժողովրդին: Արցախյան խնդրին դա ինչո՞ւ պետք է օժանդակի, նրանք գալիս են այդ խնդրով, խոսում են եւ գնում: Իհարկե, ամբողջ աշխարհին ցույց են տալիս, թե ովքեր են աջակցում հայ ժողովրդին, ովքեր են մեզ հասկանում եւ պատրաստակամ են օգնել: Այսքանով միայն, թե չէ ուրիշ կապ սա չունի արցախյան խնդրի հետ:
– Վստահ եմ, որ տեղյակ եք «Հիմնադիր խորհրդարանի» ակտիվիստների, այդ թվում Ժիրայր Սէֆիլյանի ձերբակալության մասին: Ինչպե՞ս եք վերաբերվում այդ ամենին:
– Տեղյակ եմ այնքանով, որքանով թերթերը հրապարակել են, ավելին չգիտեմ:
– Բայց, ըստ Ձեզ, կա՞ր նրանց կողմից նշանակալի վտանգ կամ սպառնալիք, որը համապատասխան մարմինների կողմից կանխվեց` Հայոց ցեղասպանության 100-րդ տարելիցին ընդառաջ:
– Դա կիմանան միայն այն մարդիկ, ովքեր իրականացրել են այդ գործողությունը, տիրապետել են իրավիճակին, ամբողջ ինֆորմացիային: Միայն նրանք կարող են դա ասել` ճի՞շտ են արել, ժամանակի՞ն են արել, կանխե՞լ են ինչ-որ բան, թե՞ չեն կանխել, մյուսների խոսքը հենց այնպես են` առանց հիմքի:
«ՉԵՄ ՏԵՍՆՈՒՄ ԸՆԴԴԻՄՈՒԹՅՈՒՆ»
–Իսկ ի՞նչ կասեք մեր ներքաղաքական իրավիճակի մասին, որովհետեւ, կարծես թե, տեւական անդորր է տիրում:
– Չեմ խառնվում ներքաղաքական իրավիճակին, չեմ էլ հետեւում եւ չեմ էլ տեսնում որեւէ քաղաքական ուժ, որը ներքաղաքական իրավիճակը կներկայացնի հանգամանորեն կամ ծրագրով: Եվ բնական է, որ այս վիճակը պետք է լինի:
– Պատճառն այն է, որ իրական ընդդիմությո՞ւն չեք տեսնում:
– Չեմ տեսնում ընդդիմություն:
– Այնուամենայնիվ, ապրիլի 24-ից հետո կարելի՞ է սպասել, որ ներքաղաքական մի փոքր ավելի ակտիվություն կլինի, քանի որ նոր կուսակցություններ են առաջ գալիս, ընդդիմադիր ուժեր են ձեւավորվում:
– Չեմ կարծում, որ ինչ-որ լուրջ տեղաշարժեր կլինեն, բայց կապրենք կտեսնենք:
«ՊԵՏՔ Է ԲՈԼՈՐ ՍՊԱՌՆԱԼԻՔՆԵՐԻՆ,
ՄԱՐՏԱՀՐԱՎԵՐՆԵՐԻՆ ԱՐԺԱՆՎՈՒՅՆ ՊԱՏԱՍԽԱՆԵԼ»
–Ապրիլի 24-ին ընդամենը օրեր են մնացել, այս համատեքստում ի՞նչ կիսատ մնացած գործեր ունենք:
– Ես հույս ունեմ, որ Ցեղասպանության 100-րդ տարելիցի նշումը կավարտվի համահայկական միասնության ճշգրտումով, տեսնենք, սպասենք...
– Դեռ հույս կա՞...
– Դժվար է ասել, բայց սա, իհարկե, կլիներ ամենամեծ նվաճումը մեր կողմից:
– Ի՞նչ է անհրաժեշտ Ձեր իսկ նշած համահայկական միասնությանը հասնելու համար:
– Շատ բան... Դա մի խոսքով ասել չի լինի, դրան հասնելու համար պետք է բոլոր հայերը հասկանան, որ միասնական հայությունն է, որ անպարտելի է: Պետք է կերտել դա, որպեսզի կարողանանք բոլոր սպառնալիքներին, մարտահրավերներին արժանվույն պատասխանել:
ՀՐԱՆՏ ՍԱՐԱՖՅԱՆ
