ՔԱՂԱՔԱԳԵՏԸ` ՀՀԿ ՊԱՏԳԱՄԱՎՈՐԻՆ. «ՊԱՐՏԱԴԻՐ ՉԷ` ՀՌՉԱԿԱԳԻՐԸ ՆՈՒՅՆԱԿԱՆ ԼԻՆԻ ՄԵՐ ԱՐՏԱՔԻՆ ՔԱՂԱՔԱԿԱՆ ՕՐԱԿԱՐԳԻ
Արխիվ 12-16ՔԱՂԱՔԱԳԵՏԸ` ՀՀԿ ՊԱՏԳԱՄԱՎՈՐԻՆ. «ՊԱՐՏԱԴԻՐ ՉԷ` ՀՌՉԱԿԱԳԻՐԸ ՆՈՒՅՆԱԿԱՆ ԼԻՆԻ ՄԵՐ ԱՐՏԱՔԻՆ ՔԱՂԱՔԱԿԱՆ ՕՐԱԿԱՐԳԻ ՀԵՏ»
Քաղաքագետ Լեւոն Շիրինյանին այսօր «Իրավունքը» խնդրեց անդրադառնալ ՀՀԿ պատգամավոր Սամվել Ֆարմանյանի հայտարարությանը, որն առնչվում է Հայոց ցեղասպանության համահայկական հռչակագրին: Լեւոն Շիրինյանից պարզեցինք` արդյոք պարտադիր է, որ հռչակագիրը համընկնի ՀՀ արտաքին քաղաքական օրակարգի հետ:
Հիշեցնենք` պատգամավորը հայտարարել էր, որ համահայկական հռչակագիրը նույնական չէ Հայաստանի արտաքին քաղաքական օրակարգի հետ: Իսկ «Իրավունքի» հետ զրույցում մանրամասնելով իր հայտարարությունը պատգամավորն ասել էր. «Համահայկական հռչակագիրը ոչ թե ՀՀ-ի արտաքին քաղաքական օրակարգն է, այլ վերպետական փաստաթուղթ»:
Քաղաքագետի խոսքով` պարտադիր չէ, որ Հայոց ցեղասպանության համահայկական հռչակագիրը նույնական լինի Հայաստանի արտաքին քաղաքական օրակարգի հետ: «Հռչակագիրը պիտի տարբեր լինի ՀՀ արտաքին քաղաքական օրակարգի հետ, հակառակ դեպքում այն կընկալվեր ԱԳՆ-ի փաստաթուղթ: Բայց չի էլ կարող հեռու լինել մեր արտաքին քաղաքական օրակարգից: Ինչքան էլ վերպետական լինի, փաստաթուղթը ստեղծվել է պետական մարմինների կողմից: Հետեւաբար, նա չի կարող ազդել պետական քաղաքականության վրա»,- ասաց նա:
Ինչ վերաբերում է պատգամավորի` «վերպետական փաստաթուղթ» բառակապակցությանը, Ֆարմանյանը ցանկանում է ասել, որ հռչակագիրը ՀՀ ԱԳՆ-ի փաստաթուղթը չէ: «ՀՀԿ խմբակցությունը պետք է ասի, որ սա Ֆարմանյանի անձնական կարծիքն է, ոչ թե խմբակցության»,- եզրափակեց Շիրինյանը:
ՍՈՆԱ ԴԱՎԹՅԱՆ
