« Ի՞ՆՉ ԵՐՎԱՆԴ ՔՈՉԱՐ...». ԿԵՆՏՐՈՆԻ ԹԱՂԱՊԵՏԱՐԱՆԸ ՉԻ ԱՐՁԱԳԱՆՔՈՒՄ ԲՆԱԿԻՉՆԵՐԻ ԶԱՆԳԵՐԻՆ
Արխիվ 12-16« Ի՞ՆՉ ԵՐՎԱՆԴ ՔՈՉԱՐ...». ԿԵՆՏՐՈՆԻ ԹԱՂԱՊԵՏԱՐԱՆԸ
ՉԻ ԱՐՁԱԳԱՆՔՈՒՄ ԲՆԱԿԻՉՆԵՐԻ ԶԱՆԳԵՐԻՆ
Այսօր «Իրավունքի» խմբագրությունն ահազանգ է ստացել Կենտրոն վարչական շրջանին պատկանող Երվանդ Քոչար 5-7 շենքի բնակիչներից, ովքեր նյարդայնացած մեզ փոխանցեցին, որ ստիպված են մեզ դիմել՝ իրենց խնդրին լուծում տալու համար: Բանն այն է, որ այսօրվա հորդառատ անձրեւի պատճառով, վերոնշյալ շենքի տարածքում ջրհեղեղ է, որի պատճառով քաղաքացիները չեն կարողանում ո՛չ տանից դուրս գալ, ո՛չ էլ տուն մտնել. «Նման դեպքերում շատ ենք զանգել թաղապետարան, բայց ո՛չ եկել են, ո՛չ էլ մի բան արել, որ այս ջրհեղեղը վերանա: Շատ ժամանակ նույնիսկ հեռախոս չեն վերցնում, իսկ վերցնելուց էլ մենակ ասում են՝ հա, եղավ, բայց հետ ոչ մի բան չի լինում»,- վրդովված նշեցին քաղաքացիները եւ հույս հայտնեցին, որ գոնե մեր միջոցով կկարողանան հարցին լուծում տալ:
Խնդրի մասին տեղեկացրինք Կենտրոնի թաղապետարանին, որտեղից մեզ պատասխանեցին՝ իրենք տեղյակ չեն ոչ մի զանգի մասին: Հավանաբար, բնակիչները զանգահարել են թեժ գիծ: Այնուհետ մեզ ասացին, որ զանգահարենք եւ դիմենք թաղապետարանի լրատվական ծառայություն:Լրատվական ծառայության պատասխանատու Լուսինեն, հարցը մինչեւ վերջ չլսելով, ասաց. «Ի՞նչ Երվանդ Քոչար: Ես հիմա խորհրդակցության եմ մտնում, ինձ մեկ ժամից զանգեք»: Իսկ թե ինչ կլինի եւ ուր կհասնի ջրհեղեղը մեկ ժամ հետո, պարզ չէ, կամ կարելի է պատկերացնել միայն: Այս պատասխանից կարելի է ենթադրել, որ ահազանգ կլինի, թե՝ոչ, թաղապետարանի համար միեւնույն է:
Ի դեպ աշխատանքային օրվա ավարտին, լրատվական ծառայության պատասխանատու Լուսինեն մեզ տեղեկացրեց, որ իրենց մոտ զանգ չի հնչել, եւ որ վաղը ավելի մանրամասն կփորձի հարցն ուսումնասիրել եւ պատասխան տալ:
ՍՈՆԱ ԴԱՎԹՅԱՆ
