"ԿԻՆՈՅԻ ՄԱՍԻՆ" ՕՐԵՆՔԸ ԿՓՈԽԻ՞ ՀԱՅԿԱԿԱՆ ՖԻԼՄԵՐԻ ՈՐԱԿԸ
Արխիվ 12-16ՖԻԼՄԵՐԻ ՈՐԱԿԸ
Հայաստանում գրեթե յուրաքանչյուր օր նկարահանվում են տարբեր ժանրերի ֆիլմեր: Չնայած, դրանց մի մասը անորակ է ու ասելիք չունեցող, բայց լավ գովազդի շնորհիվ արագ ներխուժում են կինոթատրոններ եւ ուզած-չուզած ստանում ֆիլմի կարգավիճակ: Դե, մարդիկ էլ, տեսնելով ամենուրեք տարածված գովազդները, վազում են կինոթատրոններ, իսկ ֆիլմը դիտելուց հետո` կինոթատրոնից դուրս են գալիս սարսափած, կարծես թե գազանի երախից են փախել:
Ըստ մասնագետների` Հայաստանում չկա "Կինոյի մասին" օրենք, որի բացակայության պարագայում էլ, այն մարդիկ, ովքեր իրենց չեն կարողանում դրսեւորել այլ ոլորտներում, դրսեւորվում են` անճաշակ ֆիլմեր նկարահանելով: Այս պարագայում ուրախալին այն է, որ նմանօրինակ ֆիլմերն ունենում են շատ կարճ կյանք: Վատ ֆիլմերին զուգահեռ` շնորհալի ռեժիսորների կողմից ստեղծվում են նաեւ արժեքավոր ֆիլմեր, որոնք կարող են հայ հանդիսատեսի խստապահանջությունը բավարարել, որոնք խորը ազդեցություն են թողնում հանդիսատեսի վրա եւ նրա իսկ պահանջով ցուցադրվում տարբեր մշակութային կենտրոններում: Կինոարվեստը զանազան անորակություններից ազատելու համար օրեր առաջ ՀՀ կինոարվեստի մի շարք գործիչների ջանքերով ՀՀ մշակույթի նախարարությունը սկսեց մշակել "Կինոյի մասին" օրենք: Անդրադառնալով նոր օրենքի կարեւորությանը եւ օգտակարությանը` "Իրավունքը" զրուցեց հայ կինոգործիչների հետ, պարզելու, թե ի՞նչ կփոխի նոր օրենքը հայ կինոյում:
"ԻՍԿԱՊԵՍ, ՕՐԵՆՔՆ
ՈՒՇԱՑԱԾ Է, ԲԱՅՑ..."
"Ռոբերտ Սահակյանց փրոդաքշնի" ղեկավար, մուլտիպլիկատոր, ԴԱՎԻԹ ՍԱՀԱԿՅԱՆՑ.
- Երբ նոր օրենքը մտնի ուժի մեջ, միայն ժամանակը կարող է ցույց տալ` ամեն ինչ ճիշտ է, թե` ոչ: Ես միանշանակ ողջունում եմ նոր օրենքը, իսկապես, օրենքն ուշացած է, բայց շատ ճիշտ է այն ունենալը: Օրենքը կկիրառվի, թե` ոչ, պետք է որակյալ ֆիլմեր նկարահանվեն, սա ոչ այնքան օրենքի, որքան ռեժիսորի եւ ֆիլմ արտադրողների խնդիրն է: Ամեն դեպքում օրենքը կօգնի որակյալ ֆիլմերի ստեղծմանը: Բացի օրենքից, մեզ շտապ դպրոց է պետք, որտեղ կհրավիրվեն մասնագետներ եւ սկսնակ մասնագետների հետ կանցկացնեն վարպետության դասեր: Ռեժիսորների, սցենարիստների, դերասանների որակը սրանով է պետք բարձրացնել: Երբ որակյալ ֆիլմեր լինեն, մենք անորակները չենք նկատի, անորակը միշտ եղել է ոչ միայն Հայաստանում, այլեւ ամբողջ աշխարհում:
"ՉԵՄ ԿԱՐՈՂ ԳՐԿԱԲԱՑ
ԸՆԴՈՒՆԵԼ ԱՅԴ ՕՐԵՆՔԸ..."
"Օրդֆիլմ" ընկերության տնօրեն, ռեժիսոր ՀԱՅԿ ՕՐԴՅԱՆ.
- "Կինոյի մասին" օրենքը կարեւոր է, եթե այն լավը լինի: Իսկ եթե վատն է լինելու ու չի աշխատելու մեր երկրի շատ օրենքների նման, ավելի լավ է չլինի, որովհետեւ այսպես էլ ենք մի կերպ կարողանում գոյատեւել: Այստեղ երկու շատ լուրջ գործառույթ կա` օրենք եւ օրենքի գործածություն: Եթե այս երկուսից մեկը չի լինում, նշանակում է, որ ինչ-որ բան սխալ է: Խնդիրը մի քիչ խորքային է` ովքե՞ր են գրում այդ օրենքը, ի՞նչ խնդիրներ է լուծելու այն եւ այլն: Մինչեւ այս եւ նման հարցերի պատասխանները չլինեն, մինչեւ տեսականորեն չտեսնեմ, չեմ կարող գրկաբաց ընդունել այդ օրենքը եւ ասել, որ այն շատ լավն է: Տա Աստված, որ այդ օրենքը շուտ մտնի ուժի մեջ, լավը լինի` կկիրառենք եւ կունենանք հավասար հնարավորություններ` աշխատելու համար:
Ներկայացրեց ԶՎԱՐԹ ԽԱՉԱՏՐՅԱՆԸ
