ԲՀԿ ՊԱՏԳԱՄԱՎՈՐԸ ՀԵՏԱՔՐՔՐՎԱԾ Է ՌՈԲԵՐՏ ՔՈՉԱՐՅԱՆԻ ԹՈՇԱԿՈՎ
Արխիվ 12-16ԲՀԿ պատգամավոր ՄԻՔԱՅԵԼ ՄԵԼՔՈՒՄՅԱՆԻՆ լրագրողները խնդրեցին անդրադառնալ ՀՀ երկրորդ նախագահ Ռոբերտ Քոչարյանի հարցազրույցին:
"Իրավունքը" մասնավորապես հետաքրքրվեց` արդյոք իշխանության կյանքը թեթեւացավ` ԲՀԿ-ն կազմաքանդելով: Հստակ պատասխան Միքայել Մելքումյանից չստացանք, քանի որ նախ` ԲՀԿ պատգամավորը չէր կարդացել հարցազրույցը, ապա մեղայականով ու ինքնախոստովանությամբ հանդես եկավ. "ԲՀԿ-ն ծանր օրեր ապրեց: Իսկ ո՞վ է մեղավոր: Ես ինքս էլ իմ մեղքի բաժինը տեսնում եմ: Միգուցե պետք էր ճկուն կամ այլ ճանապարհ ընտրեինք: Այսինքն` հաշվի առնելով Հայաստանի ռեալությունները: Ինչ է, չգիտեի՞նք, որ կոշտ հակադարձումներ են լինելու: Գիտեինք, բայց գնացինք այդ ճանապարհով: Բայց չի նշանակում, որ մենք հանձնվում ենք":
Մեր մյուս հարցին` արդյո՞ք նախկին նախագահը այս հարցազրույցով ցույց չի տալիս, որ իր կապերը վերջնական խզեց ԲՀԿ-ի հետ, Միքայել Մելքումյանն ասաց, որ երբեք Ռ. Քոչարյանի հետ երբեք չի հանդիպել, Քոչարյանը երբեք ո՛չ ֆինանսական, ո՛չ խորհրդատվական հանդիպումներ չի ունեցել ԲՀԿ-ի հետ:
"Իրավունքը" ԲՀԿ պատգամավորից նաեւ հետաքրքրվեց` արդյո՞ք Քոչարյանը աստիճանաբար չի համակերպվում երիտասարդ թոշակառուի իր կարգավիճակի հետ: "Լավ էլի, եկեք լուրջ բաներից խոսենք: Լավ, իսկ կարո՞ղ եք ասել` թոշակն ինչքան է",-ծիծաղելով ասաց ԲՀԿ պատգամավորը:
Ի դեպ, պրն Մելքումյանը իր խոսքի ընթացքում քննադատեց լրատվամիջոցներին` ավելի շատ շոուներ լուսաբանելու, քան լուրջ թեմաներին անդրադառնալու համար: Հետաքրքիր է, իսկ ԲՀԿ պատգամավորն ինչո՞ւ այդպես ջանասիրաբար չի քննադատում իր այն կուսակիցներին, որոնք ժողովրդի հաշվին աշխատավարձ են ստանում` միայն կոճակ սեղմելու եւ մի քանի րոպե խորհրդարանում իրենց "սֆաթը" ցույց տալու համար:
ՍՈՆԱ ԴԱՎԹՅԱՆ
Հավանեցի՞ր հոդվածը, կիսվիր ընկերներիդ հետ
