ՍԱՄՎԵԼ ՍԵՎՅԱՆԸ ՇԱՐՈՒՆԱԿՈՒՄ Է ՏՊԱՎՈՐԵԼ
Արխիվ 12-16ՍԱՄՎԵԼ ՍԵՎՅԱՆԸ ՇԱՐՈՒՆԱԿՈՒՄ Է ՏՊԱՎՈՐԵԼ
Շախմատի միջազգային ֆեդերացիան (ՖԻԴԵ) հրապարակել է դասակարգման հերթական աղյուսակը: Հայաստանի շախմատի հավաքականի առաջատար Լեւոն Արոնյանը պահպանել է դիրքերն ու մնացել է 10-րդ տեղում: Առաջատարը դարձյալ աշխարհի չեմպիոն Մագնուս Կարլսենն է: Իսկ ահա արագ շախմատի դասակարգման աղյուսակում Լեւոն Արոնյանը դեռ չի լքել լավագույն հնգյակը. հայ գրոսմայստերը չորրորդն է:
Մինչ ՖԻԴԵ-ի երբեմնի երկրորդ համար Լեւոն Արոնյանը "պայքարում է" վարկանիշային աղյուսակում վերջնականապես ուժեղագույնների շարքերը չլքելու համար, հայ մյուս շախմատիստները իրենց հաշվին կարեւոր հաղթանակներ են գրանցում: Այսպես` երեւանցի 22-ամյա միջազգային վարպետ Վահե Բաղդասարյանն առաջին մրցանակն է նվաճել Մոսկվայում ավարտված "Աէրոֆլոտ-օփենի" B մրցաշարում:
Վահե Բաղդասարյանը 9 հնարավորից վաստակել է 6,5 միավոր եւ չորրորդ անգամ լրացրել գրոսմայստերի նորմա: Նույնպիսի արդյունք է ցույց տվել գրոսմայստեր Տիգրան Քոթանջյանը, որը լրացուցիչ ցուցանիշներով գրավել է 6-րդ տեղը: C մրցաշարում ՖԻԴԵ-ի վարպետ Բորիս Օֆիցերյանը եւ Արթուր Ղարագյոզյանը 6,5-ական միավորով բաժանել են 1-7-րդ տեղերը: Լրացուցիչ ցուցանիշներով Օֆիցերյանը երրորդն էր, Ղարագյոզյանը` չորրորդը: A մրցաշարում գրոսմայստերներ Հովհաննես Գաբուզյանը եւ Տիգրան Լ. Պետրոսյանը վաստակեցին, համապատասխանաբար, 5 եւ 4,5 միավոր. 7 միավորով առաջին մրցանակը նվաճեց ռուսաստանցի գրոսմայստեր Յան Նեպոմնյաշչինը:
Իսկ հայ գրոսմայստեր Սերգեյ Մովսեսյանը հաջողության հասավ Ստարա Լուբովնա քաղաքի "Անգելուս" թիմի կազմում, եւ հռչակվեց շախմատի Սլովակիայի չեմպիոն: Այդ նվաճումից հետո Մովսեսյանը Պարդուբիցեի "Ռապիդ" թիմի կազմում դարձել է նաեւ Չեխիայի փոխչեմպիոն:
Շարունակվում է նաեւ շախմատի ԱՄՆ-ի առաջնությունը, որտեղ հանդես են գալիս Վարուժան Հակոբյանը եւ Սամվել Սեւյանը: Նրանք վաստակել են 2.5-ական միավոր եւ Օնիշչուկի հետ բաժանում են 6-8-րդ տեղերը: Առաջատարը Հիկարու Նակամուրան էª 4 միավոր: Ի դեպ, Սամվել Սեւյանը շարունակում է զարմացնել իր հիանալի խաղով: Առաջնության երրորդ տուրում ամերիկահայ գրոսմայստերը տպավորիչ խաղում սեւ ֆիգուրներով հաղթանակ տարավ այնպիսի փորձառու մրցակցի նկատմամբ, ինչպիսին է ՖԻԴԵ-ի դասակարգման 8-րդ համար Ուեսլի Սոյին, որի վարկանիշային գործակիցը 2788 է, Սեւյանինըª 2531: Հիշեցնենք, որ Սամվել Սեյանն ընդամենը 14 տարեկան է եւ առաջին անգամ է մասնակցում երկրի ուժեղագույնների առաջնությանը:
ՔՐԻՍՏԻՆԵ ՊԵՏՐՈՍՅԱՆ
