ԿՈՐԾԱՆՄԱՆ ԵԶՐԻՆ ԿԱՆԳՆԱԾ ԳԱՎԱՌԻ ԹԱՏՐՈՆՆ ԱՅԺՄ "ՓՐԿՎԵԼ Է"
Արխիվ 12-16ԳԱՎԱՌԻ ԹԱՏՐՈՆՆ ԱՅԺՄ "ՓՐԿՎԵԼ Է"
Դեռեւս 2011 թվականից Գավառի Լ. Քալանթարի անվան Պետական դրամատիկական թատրոնը չի գործում, կանգնած է վերանորոգման: Սակայն վերանորոգման աշխատանքներն սկսվել են 3 տարի անց` 2014 թվականի դեկտեմբերից: Ինչպես վերջերս "Արտավազդ" ամենամյա թատերական փառատոնին ընդառաջ` մարզային թատրոնների ստուգատեսի ժամանակ Գավառի թատրոնի դերասանուհիներից մեկի հուզված ելույթից պարզ դարձավ, թատրոնը եղել է կործանման եզրին, այժմ արդեն "փրկվել է". Ինչպես "Իրավունքին" հավաստիացրին թատրոնի ղեկավարները` 2016 թվականին թատրոնն արդեն այժմյան մշակույթի պալատի փոխարեն` կգործի նոր շենքում:
"ԴԵՐԱՍԱՆԱԿԱՆ ԿԱԶՄԸ ԲԱՑԸ ԼՐԱՑՆՈՒՄ Է
ՄՇԱԿՈՒՅԹԻ ՊԱԼԱՏՈՒՄ"
Գեղարքունիքի մարզպետարանի աշխատակազմի մշակույթի եւ սպորտի բաժնի վարիչ ԳԵՂԱՄ ՉԱՐՎԱԴԱՐՅԱՆԸ, ով նախկինում աշխատել է տվյալ թատրոնում, "Իրավունքին" փոխանցեց, որ թատրոնի շենքի հիմնանորոգումն սկսվել է 2011 թվականից, քանի որ քանդվել էր բեմական մասը, ինչից հետո թատրոնի շենքում ներկայացումներ չեն խաղացվել: Փոխարենը դերասանական կազմը մինչեւ այսօր բացը լրացնում է Մշակույթի պալատում. "Գավառի մշակույթի պալատում ներկայացումներ խաղալուց բացի` հիմանական շեշտը դրված է նաեւ մարզի տարբեր համայնքների Մշակույթի տներում հյուրախաղերով հանդես գալու վրա",- տեղեկացրեց Գ. Չարվադարյանը:
Իսկ գրեթե 2 տարի թատրոնի շենքի հիմնանորոգման դադարեցման պատճառների մասին ասաց. "Կառավարությունը գումարը հատկացրել էր, ուղղակի այնտեղ կային նախագծանախահաշվային որոշակի խնդիրներ` կապված շենքի ակուստիկայի հետ, որը վերանորոգումը հետաձգելու պատճառ դարձավ: Բայց շինարարությունն արդեն վերսկսվեց անցյալ տարվա դեկտեմբերից":
"ԹԱՏՐՈՆԻ ՀԻՄՆԱԿԱՆ ԽՆԴԻՐԸ ԿԱՊՎԱԾ Է
ԴԵՐԱՍԱՆԱԿԱՆ ԿԱԶՄԻ ՀԵՏ"
Իսկ թատրոնի նորանշանակ տնօրեն ՀԱՅԿ ՂԱՓԱՆՑՅԱՆԸ նախ հերքեց դերասանուհու հուզված ելույթը, թե թատրոնը կործանման եզրին է եղել, ապա վստահեցրեց. "Կառուցվում է թատրոնի մի հոյակերտ շենք, որի հետ շատ ծրագրեր են կապված: Բավականին մեծ ծրագրեր ունենք` տեխնիկապես զարգացնել, շենքը համապատասխանեցնել ժամանակակից ներկայացումների որակին":
Նորանշանակ տնօրենը նաեւ ընդգծեց, որ թատրոնի հիմնական խնդիրը կապված է դերասանական կազմի հետ. "Կադրային փոփոխություններ են պետք թատրոնի դերասանական կազմում, ավելի որակով աշխատանքներ անելու համար: Իհարկե, չնեղացնելով երկար տարիների փորձ ունեցող դերասաններին` կարելի է ընդգրկել նոր կադրեր, քանի որ թատրոնում` հիմնականում Գավառից, շատ քիչ են թատերական կրթությամբ երիտասարդները: Լուծումը գուցե գտնենք` պայմանագրային կարգով Երեւանից դերասաններ հրավիրելով":
"Արտավազդ" մրցանակաբաշխությանն ընդառաջ` երեւանյան հյուրախաղից հետո ներկայացման մասին եղած դժգոհությունների ու դիտողությունների մասին տնօրենն այսպես խոսեց. "Հիմա, այս պայմաններում, շատ թերացումներ կան բեմադրություններում, պետք է ազնվորեն ասեմ` դա կապված է այժմյան շենքային պայմանների հետ: Մեր քաղաքապետի կողմից միայն մի տարածք է հատկացվել` մի սենյակ, որտեղ չկա բեմ, ու բեմադրվում է մի ներկայացում, դե պատկերացրեք այդ ներկայացման որակը":
Այնուամենայնիվ, տնօրենը վստահեցրեց, որ արդեն թատրոնի վերանորոգված շենքը` որը նախատեսված է ավարտին հասցնել 2016 թվականին, այնքան գեղեցիկ շենք է, որ լինելու է Գավառի դեմքը:
ԼԻԼԻԹ ԵՂԻԱԶԱՐՅԱՆ
Հավանեցի՞ր հոդվածը, կիսվիր ընկերներիդ հետ
