ՀՀ ԵՎ ՌԴ ԱԳ ՆԱԽԱՐԱՐՆԵՐԸ ԿՔՆՆԱՐԿԵ՞Ն ԼՂՀ-Ի ԹԵՄԱՆ
Արխիվ 12-16Ապրիլի 7-8-ը ՀՀ արտգործնախարար Էդվարդ Նալբանդյանը Ռուսաստանի Դաշնության արտգործնախարար Սերգեյ Լավրովի հրավերով պաշտոնական այցով ՌԴ-ում էր: Տարածված պաշտոնական հաղորդագրության համաձայն` երկու երկրների արտաքին քաղաքական գերատեսչությունների ղեկավարները հանդիպման ընթացքում կքննարկեն հայ-ռուսական դաշնակցային փոխգործակցության հետագա զարգացման նպատակով ձեռնարկվելիք քայլերը, մտքեր կփոխանակեն տարածաշրջանային եւ միջազգային օրակարգային հարցերի վերաբերյալ: Բայց նաեւ լուրեր են շրջանառվում, որ Էդվարդ Նալբանդյանը եւ Սերգեյ Լավրովը կոնկրետ քննարկում կունենան նաեւ Ղարաբաղի թեմայով, թեեւ այդ մասին ՀՀ ԱԳՆ-ի տարածած պաշտոնական հաղորդագրության մեջ չկա ոչ մի տող:
Ինչքանո՞վ են իրականությանը համապատասխանում Ղարաբաղի հետ կապված այդ խոսակցությունները: Հարցի պատասխանը, բնականաբար, նախ փորձեցինք ստանալ ՀՀ ԱԳՆ-ից, սակայն այս կառույցի մամլո խոսնակի արձագանքը, մեղմ ասած, տարօրինակ էր. նա պարզապես "խորհուրդ" տվեց հետեւել մամուլին եւ ֆեյսբուքյան իրենց էջին: Այսինքն ի՞նչ, արդեն սոցցանցերն են դարձել մեր պետության կարեւորագույն ոլորտներից մեկիª արտաքին քաղաքականության մասին պաշտոնական պարզաբանումների աղբյուրները: Բայց այդ դեպքում էլ ո՞ւմ է պետք ԱԳՆ մամուլի խոսնակը, չէ՞ որ առանց նրա էլ "Ֆեյսբուքում" ամեն ինչի մասին գրում են: Ամեն դեպքումª նկատենք, որ Ղարաբաղի հետ կապված լուրը ԱԳՆ մամուլի խոսնակը ո՛չ հերքեց, ո՛չ էլ հաստատեց: Բայց մեկ էª նրա խորհրդով ֆեյսբուքերը քչփորելու փոխարենª փորձեցինք ավելի լուրջ աղբյուրներից ստանալ այս հարցի պատասխանը:
Քաղաքագետ ԱԼԵՔՍԱՆԴՐ ՄԱՐԿԱՐՈՎԻ խոսքով` ՀՀ եւ ՌԴ արտգործնախարարները շարունակ քննարկում են տարբեր խնդիրներ. "Հաշվի առնելով այդ խնդիրների արդիականությունը եւ կարեւորությունը` դժվար չէ հասկանալ, որ ԼՂՀ շուրջ տեղի ունեցող զարգացումները եւ խնդրի կարգավորման հարցը գտնվում է կամ կարող է գտնվել այդ հանդիպման օրակարգի առաջնային կետերի մեջ: Հայաստանի դիրքորոշումը ԼՂՀ հարցի վերաբերյալ հասկանալի է, ՌԴ դիրքորոշումներն առայժմ պաշտոնական առումով եւս հայտնի են: Խնդիրը կայանում է նրանում, թե այս դիրքորոշումները հաշվի առնելովª ինչպե՞ս առաջարկել համանախագահողներին եւ բանակցային գործընթացին մասնակցող մյուս կողմին` Ադրբեջանին, այն տարբերակը, որը հիմնախնդրի կարգավորման համար կարող է հանդես գալ որպես հիմք":
Քաղաքագետ ԼԵՎՈՆ ՇԻՐԻՆՅԱՆԸ փաստեց, որ անհնարին է պատկերացնել մի հանդիպում, որտեղ ԼՂՀ հարցը չքննարկվի Հայաստան- ՌԴ փոխհարաբերությունների համատեքստում. "Նույնիսկ, եթե պաշտոնական հայտարարություն չկա, չի նշանակում, որ մտքերի փոխանակություն չի լինի: Կարծում եմ` հայկական կողմն անհանգստացած է Ադրբեջանի վերջին շրջանի ակտիվությունից, Ռուսաստանի դիրքորոշումից եւ ցանկանում է որոշ հանգամանքեր պարզել: Այս հարցն է ավելի շատ հետաքրքրում, մնացածը ենթատեքստ է: Եթե մեր արտգործնախարարը տեղյակ լիներ 1920 թվականի հունիսին Լենինին ուղղված Չիչիլինի նամակին, ապա ամեն ինչ պարզ կհասկանար: Այդ նամակում Չիչիլինը խոստովանում է, որ Արցախը հայկական տարածք է, բայց նաեւ ընդգծում, որ չի նշանակում համաձայնել, որպեսզի տարածքը միանա Հայաստանին: Վերջին շրջանում ՌԴ-ն հստակ հայտարարում է, որ Հայաստանի թիկունքը կպահի, իսկ Հայաստանը կարող է Ադրբեջանի հետ պատերազմել` ինչքան ցանկանա: Կարծում եմª հանդիպման ընթացքում հենց այս հարցերն են կարգավորվելու: Մեզ մնում է Ռուսաստանի հետ մեր դաշինքը ամրապնդել եւ վճռական ճակատամարտով Ադրբեջանին պարտադրել խաղաղություն":
ԶՎԱՐԹ ԽԱՉԱՏՐՅԱՆ
Հավանեցի՞ր հոդվածը, կիսվիր ընկերներիդ հետ
