ՀԱՅՐԵՆԱՍԻՐՈՒԹՅՈՒՆԸ ԱՆՄՈՌՈՒԿԻ ՉԱՓՈՎ ՈՒ ՔԱՆԱԿՈՎ ՉԻ ՈՐՈՇՎՈՒՄ
Արխիվ 12-16ՀԱՅՐԵՆԱՍԻՐՈՒԹՅՈՒՆԸ ԱՆՄՈՌՈՒԿԻ
ՉԱՓՈՎ ՈՒ ՔԱՆԱԿՈՎ ՉԻ ՈՐՈՇՎՈՒՄ
"Իրավունքը" արդեն անդրադարձել է Հայոց ցեղասպանության 100-րդ տարելիցի խորհրդանիշ համարվող անմոռուկների չափից ավելի օգտագործելու ու դրանով իսկ անմոռուկի գաղափարը արժեզրկելու մասին: Այն, որ օրեցօր հանդիպում ենք անմոռուկներով զարդարված դպրոցների, ավտոմեքենաների, խանութների ինչ-որ տեղ տանելի է` մարդն այդպես է "հարգում", հիշում ու պահանջում, բայց երբ անմոռուկը, որի ստեղծողները վստահեցնում էին, որ հեղինակային իրավունքները պաշտպանված են, կհայտնվի նաեւ ներքնազգեստի վրա... Հայ մարդու երեւակայությունն աներեւակայելի է...Վերադառնանք անմոռուկով զարդարված ավտոմեքենաներին: Շատերին թվում է, թե ահռելի չափսերի անմոռուկներով զարդարելով` անմոռուկապատելով ավտոմեքենան ու շրջելով քաղաքով մեկ` երեւում է մեքենայի տիրոջ հայրենասիրության չափը: Օրերս երթուղայինից ականատես եղանք մի տհաճ իրավիճակի. տարբեր չափսերի անմոռուկապատված դիմացից սլացող ավտոմեքենան դարձավ ողջ երթուղայինի քննարկման թեմա, իսկ վարոդն էլ` ազգի հերոս, հայրենասեր, բայց այդ հայրենասիրությունը հօդս ցնդեց, երբ քիչ անց վարորդը սլանալուն զուգահեռ` մի տոպրակ աղբը դուրս նետեց...
Նման մի "հայրենասերի" էլ հանդիպել էր "Արմքոմեդի" հաղորդման հաղորդավարներից Սերգեյը, ով պատմում էր, որ տեսել է, որ դիմացի ավտոմեքենայից վարորդը ծխախոտի տուփը նետել է պատուհանից դուրս, ու երբ ինքը հավասարվել է ավտոմեքենային, որպեսզի ամոթանք տա արարքի համար եւ... "Պարզվեց, որ այդ ավտոմեքենայի վարորդն էլ էր "Հիշում ու պահանջում"...":
Հարգելի՛ վարորդներ, անմոռուկի չափով ու քանակով չի որոշվում հայրենասիրության չափը: Հայրենասիրությունը մեր հայրենիքը աջ ու ձախ աղտոտելով չէ, խախտումներով երթեւեկելը չէ: Հիշե՛ք, որ անմոռուկներով զարդարված` ավտոմեքենաներով խախտումներով ու քաղաքն աղտոտելով սլանալով ոչ թե դուք եք "Հիշում ու պահանջում", այլ այդ պահին հենց ձեր հայրենակիցները կհիշեն ձեզ էլ, ձեր անցավորներին էլ:
Կույտը մշակեց ԼԻԼԻԹ ԵՂԻԱԶԱՐՅԱՆԸ
Հավանեցի՞ր հոդվածը, կիսվիր ընկերներիդ հետ
