"ԱՎԱԳ ԴՊՐՈՑԸ ՊԵՏՔ Է ՆԵՐՇՆՉԻ ԾՆՈՂԻՆ ԱՅԴ ՎՍՏԱՀՈՒԹՅՈՒՆԸ"
Արխիվ 12-16"ԱՎԱԳ ԴՊՐՈՑԸ ՊԵՏՔ Է ՆԵՐՇՆՉԻ ԾՆՈՂԻՆ ԱՅԴ ՎՍՏԱՀՈՒԹՅՈՒՆԸ"
Oրերս ՀՀ կրթության եւ գիտության նախարար Արմեն Աշոտյանն ազգային ժողովում ներկայացնելով "Հանրակրթության մասին" օրենքում փոփոխություն կատարելու մասին նախագիծը եւ այն որակեց կրթական լրջագույն նախաձեռնություններից մեկը: Հիշեցնենք, որ ըստ նախագծի` Հայաստանում պարտադիր կհամարվի ոչ թե 9-ամյա, այլ 12-ամյա կրթությունը: Մինչդեռ 12-ամյա ոչ պարտադիր կրթությունն անգամ մինչ օրս բազում դժգոհությունների եւ հարցերի տեղիք է տալիս: Ինչեւէª պարտադիր կրթության տեւողությունը երկարաձգելու անհրաժեշտության այլ խնդիրների շուրջ զրուցեցինք ՀՀ կրթության եւ գիտության նախարարության հանրակրթության վարչության պետ ՆԱՐԻՆԵ ՀՈՎՀԱՆՆԻՍՅԱՆԻ հետ:-12-ամյա կրթության անհրաժեշտությունը կայանում է նրանում, որ մենք մեր աշակերտներին ուզում ենք տեսնել մրցունակ` ամբողջ աշխարհում: Իրականում դա մեծ խնդիր չէ, քանի որ 9-րդ դասարանն ավարտող աշակերտների մեծ մասը` երեսուն հազարից մոտ քսանյոթ հազարը, շարունակում է իր ուսումը:
12-ամյա կրթությունը չի ակնկալում միայն հանրակրթական դպրոց կամ միայն ավագ դպրոց, այլ նաեւ նախնական մասնագիտական ուսումնական հաստատություն, քոլեջներ, արհեստագործական դպրոցներ եւ այլն: Անհրաժեշտությունը նախ կրթություն ունենալն է ամբողջ կյանքի համար: Այսինքն` լինել մրցունակ միջազգային ասպարեզում, որ մեր հայ երեխան էլ ունենա շատ ավելի որակյալ գիտելիքներ, ինչին 9-ամյա կրթությունը չի բավարարում. այսօր աշխարհում նա մրցունակ չէ միայն 9-ամյա կրթության վկայականով: Մենք ուզում ենք ե՛ւ պարտադրել, ե՛ւ հասկացնել մեր քաղաքացուն, որ ուզում ենք իրեն տեսնել բարձր ինտելեկտով, որակյալ կրթությամբ եւ շրջանավարտի նկարագրի բոլոր պահանջները իրականացրած:
- Կարելի՞ է Ձեր ասածից եզրակացանել, որ այսօր դպրոցներում չկա կրթության որակի բավարար մակարդակ:
- Մենք չենք համարում, որ կրթության որակը բավարար մակարդակի չենք հասցրել: Այսօր բավականին ե՛ւ ծրագրեր ենք մշակել, ե՛ւ դասագրքեր, ե՛ւ ուսումնամեթոդական, ե՛ւ ուսումնատեխնիկական ձեռնարկներ: Պետությունը լրացուցիչ բավական ներդրումներ է անում, որ այսօր կրթությունը, համենայնդեպս` հանրակրթությունը, լինի բարձր մակարդակում: Գնահատման եւ թեստավորման կենտրոնի կողմից իրականացվող արտաքին գնահատումներից զատ` կան նաեւ հանրապետական ու միջազգային օլիմպիադաներ, ինտելեկտուալ տարբեր դպրոցներ, որտեղ մեր դպրոցականներն ակտիվություն են ցուցաբերում ու նաեւ հաղթանակներ գրանցում:
- Չե՞ք կարծում, որ 11 եւ 12-րդ դասարանների աշակերտները հենց դպրոցական բացը լրացնելու համար է, որ զբաղված են կրկնուսույցների մոտ պարապելով, եւ նրանց հիմնական նպատակը ոչ թե դպրոցի գիտելիք ստանալն է, այլ` ԲՈՒՀ ընդունվել:
- Ճիշտ նկատեցիք, մենք այդ խնդիրն ունենք, այո: Եվ այդ խնդրի շրջանակներում որոշակի գործողություններ արդեն անում ենք առաջին հերթին` 12-րդ դասարանցու դեմ, ով խույս է տալիս դպրոցից եւ գնում է կրկնուսույցների մոտ: Պետք է յուրաքանչյուր դպրոց, յուրաքանչյուր մանկավարժական կոլեկտիվ յուրովի գտնի դրա դեմ պայքարելու ձեւերը, իսկ ԿԳ-ն էլ իր հերթին` ուսումնական պլաններով, ծրագրերով, դասագրքերով կնպաստի դրան: Սակայն այս խնդրի լուծման համար պետք է փոխվի նաեւ հասարակության մտածողությունը: Առաջիկայում մենք թվեր կբերենք, թե որ ավագ դպրոցում քանի երեխա պարապեց եւ ընդունվեց իր ուժերով, եւ քանիսը կրկնուսույցների մոտ պարապելով: Այսինքն մենք, այո, այստեղ խնդիր ունենք եւ պետք է աշխատենք այդ ուղղությամբ: Ինքը` ավագ դպրոցը, պետք է ներշնչի ծնողին այդ վստահությունը, քանի որ ընդամենը այստեղ վստահության խնդիրն է դեպի ավագ դպրոցը:
- Իսկ ի՞նչով է պայմանավորված, որ ինչպես Դուք նշեցիք, որ վստահության խնդիր կա ավագ դպրոցի տված գիտելիքների հանդեպ: Ի՞նչն է պակասում:
- Պակասում է ժամանակը: 12-ամյա կրթությունը 2009 թվականից սկսվեց` չորս-հիգ տարի է ընդամենը, ավագ դպրոցին ժամանակ է պետք լիովին կայանալու համար: Կադրային փոփոխություններ եղան, մնացին ամենահնարավոր պատասխանատվությունը կրող ուսուցիչները: Ուսումնանյութական բազայի հարստացման, շենքային պայմանների խնդիրներ կան, որովհետեւ պետք է ստեղծենք այնպիսի միջավայր, որ աշակերտը վստահ գա, մտնի, իր երեք տարիների գիտելիքներն ստանա եւ գնա: Այստեղ ունենք խնդիրներ, բայց պետությունը այսօր հնարավոր ամեն բան անում է եղած բացերի լուծման, վերացման ուղղությամբ: Աշխատում ենք Համաշխարհային բանկի հետ, որի աջակցությամբ առաջիկայում մոտ քսան դպրոցներում վերանորոգումներ կլինեն, գույքով կվերազինվեն, լաբորատորիաները կհարստացնենք, ստեղծվելու են էլեկտրոնային լաբորատորիաներ: Այսինքն` ավագ դպրոցը դեռ պետք է զարգանա, ուժեղանա:
- Նախարարությունը որքա՞ն լրացուցիչ ֆինանսավորում է ներդնելու 12-ամյա պարտադիր կրթության անցնելու համար:
- Լրացուցիչ ֆինանսավորման մասին շատ բան չեմ կարող ասել, դա ավելի շուտ մեր ֆինանսների վարչության հարցն է:
- Ամփոփենք թեման` որն է 12-ամյա պարտադիր կրթության առանցքային նպատակը:
- Ամբողջական, մրցունակ, ճիշտ կրթություն ստանալը: Եվ աշխարհում` պարտադիրի առումով չեմ կարող ասել, բայց միայն քսան տոկոս երկրներում է, որ կրթությունը տասնամյա է: Այսինքնª գրեթե ամբողջ աշխարհում տասներկուամյա կրթություն է: Բայց, նորից եմ ասում, մեզ համար այդ պարտադիրը ցավալի ու դժվար բան չէ. ընդամենը մի քանի հազար հայ երեխայի, հայ մարդու մոտեցման, վերաբերմունքի եւ գիտակցության խնդիր ենք լուծելու: Որ հետագայում աշխարհի որ մասում էլ հայտնվեն, լինեն 12-ամյա կրթությամբ մրցունակ մարդիկ, պատրաստ` աշխատանքային եւ մասնագիտական հմտություններով: Եվ անգամ եթե վարորդ աշխատեն, լինեն հնարավորինս ինտելեկտով, որը կստանան ուսման 12 տարիների ընթացքում:
Հարցազրույցը` ԻԼՈՆԱ ԱԶԱՐՅԱՆԻ
Հավանեցի՞ր հոդվածը, կիսվիր ընկերներիդ հետ
