Լսե՛ք մարդկանց, լրջորեն վերաբերվե՛ք նրանց հոգսերին․ կատարվեց քահանայական ձեռնադրություն Ինչ է կատարվում Արցախ կամերային նվագախմբում Ջիվան Գասպարյան կրտսերը նոր տեսահոլովակ է ներկայացրել Հանդիպման յուրահատկությունն այն էր, որ այն ունեցավ հրապարակային մաս. Երեք նախագահների հանդիպման հետքերով Լինում են պահեր, երբ ուզում եմ քեզ մի բան պատմել ու լսել՝ ինչ կասես Իրականացված կապիկ-շոուն ցույց է տալիս, որ այսօրվա ընդդիմությունը չի գործում. Արթուր Ֆարմանյան Մեր թանգարանն անվանում են փոքրիկ Տրետյակովյան պատկերասրահ, Աբրահամյանին՝ մեր օրերի Տրետյակով. Մկրտչյան Զանզիբարում վեցից ավելի հյուրանոցներ ամբողջությամբ այրվել են Տասը տարի՝ ռուսական արվեստի թանգարանի վերափոխման ճանապարհին Թուրքիան և ԵՄ-ն բանակցություններ են վարում անվիզա ռեժիմի ներդրման վերաբերյալ

«ՌՈԲԵՐՏ ՈՒՈԼԹԵՐԻ ՀՆԱՐԱՎՈՐ ԱՅՑԸ ՀԱՅԱՍՏԱՆ ՉԻ ՓՈԽՈՒՄ ՄԵՐ ՈՐՈՇՈՒՄԸ»

Արխիվ 12-16

«ՌՈԲԵՐՏ ՈՒՈԼԹԵՐԻ ՀՆԱՐԱՎՈՐ ԱՅՑԸ
ՀԱՅԱՍՏԱՆ ՉԻ ՓՈԽՈՒՄ ՄԵՐ ՈՐՈՇՈՒՄԸ»


«Բռնության աճը Լեռնային Ղարաբաղում եւ Ադրբեջանի մյուս գրավյալ տարածքներում» վերնագրով խայտառակ ԵԽԽՎ-յան զեկույցը պատրաստող ԵԽԽՎ բրիտանացի պատգամավոր Ռոբերտ Ուոլթերն անցյալ ամիս փաստահավաք առաքելությամբ եղել է Ադրբեջանում, իսկ մայիսին մտադիր է գալ Հայաստան ու Լեռնային Ղարաբաղ, թեպետ Հայաստանն ու ԼՂՀ-ն որոշել էին բոյկոտել նրա այցը: Այս, ինչպես նաեւ ԵԽԽՎ հարթակում տիրող հակահայկական գործընթացների ու Ցեղասպանության 100-րդ տարելիցին առնչվող հարցերի շուրջ էլ «Իրավունքը» զրուցեց ԱԺ ՀՀԿ խմբակցության պատգամավոր, ԵԽԽՎ հայաստանյան պատվիրակության անդամ ՆԱԻՐԱ ԿԱՐԱՊԵՏՅԱՆԻ հետ:


«ՄԵՐ ԴԻՐՔՈՐՈՇՈՒՄՆ ԱՅԴ ԶԵԿՈՒՅՑԻ ՊԱՏՐԱՍՏՄԱՆ ՀԵՏ ԿԱՊՎԱԾ ՀՍՏԱԿ Է»


–Տիկին Կարապետյան, ինչո՞վ է պայմանավորված, որ հիմա որոշվել է Հայաստանում ընդունել ԵԽԽՎ բրիտանացի պատգամավոր Ռոբերտ Ուոլթերին:
– Մեր դիրքորոշումը այդ զեկույցի պատրաստման հետ կապված հստակ է եւ որեւէ փոփոխություն չի կրել` չի լինելու որեւէ համագործակցություն: Եվ այդ մասին տեղյակ է թե՛ ԵԽԽՎ քաղաքական հանձնաժողովը, որտեղ պատրաստվում է զեկույցը, եւ թե՛ հենց ինքը` զեկուցողը: Կարծում եմ, գիտակցելով այս ամենը, նա եւս պատկերացնում է, որ իր այցը Հայաստան որեւէ կապ չի ունենալու զեկույցի հետ:
– Տիկին Նաղդալյանը լրատվամիջոցներից մեկի հետ զրույցում նշել է, որ հայտնի զեկույցի շրջանակներում համագործակցությանը չմասնակցելու որոշումը մնացել է նույնը, այդ դեպքում Ռ. Ուոլթերի հետ ի՞նչ հարցերի շուրջ պետք է բանակցենք մայիսին:
– Անկեղծ ասած, ես տեղյակ չեմ, թե ինչպիսի օրակարգ կառաջարկվի, եւ արդյոք այդ այցը կկայանա, թե` ոչ, բայց եւս մեկ անգամ վերահաստատում եմ տիկին Նաղդալյանի ասածը` որեւէ փոփոխություն մեր դիրքորոշման մեջ չկա:
– Ընդհանրապես, ԵԽԽՎ-ն հայտնի է իր հակահայկական բանաձեւերով, այս դեպքում ի՞նչ կարելի է ակնկալել բրիտանացի ԵԽ պատգամավորից, ում կարծիքով` Արցախը հայերի կողմից գրավյալ տարածք է:
– ԵԽԽՎ-ն ունի տարակարծիք բազում բանաձեւեր` տարբեր երկրների մասին: Խոսելով կոնկրետ այս բանաձեւի նախագծի վերաբերյալ` նշեմ, որ եթե լիներ որեւէ լավատեսություն, ապա պատվիրակությունը այս բավականին կոշտ դիրքորոշումը չէր ընտրի, եւ մենք կաշխատեինք զեկուցողի հետ: Եվ խնդիրն այստեղ միայն զեկուցողը չէ: ԵԽԽՎ աշխատանքային կանոնակարգը թույլ է տալիս, դիցուք ունենալով փայլուն հայամետ բանաձեւ, ընդունման օրը, բազում փոփոխությունների հնարավորություններից օգտվելով, հաստատել եւ ընդունել լիովին այլ` հակահայկական տեքստ:

«ՀՀ-Ի ԵՎ ԼՂՀ-Ի ՄԻՋԵՎ ՈՐԵՎԷ ՀԱԿԱՍՈՒԹՅՈՒՆ ՉԿԱ ԵՎ ՉԻ ԿԱՐՈՂ ԼԻՆԵԼ»

–Ժամանակին ԼՂՀ նախագահի մամուլի խոսնակ Դավիթ Բաբայանը, ով բացառել է Ռ. Ուոլթերի այցը ԼՂՀ, «Իրավունքի» հարցին, թե հնարավո՞ր է  ԼՂՀ-ն  պաշտոնապես խնդրանքով դիմի ՀՀ ԱԳՆ-ին` Ռոբերտ Ուոլթերի մուտքը նաեւ Հայաստան արգելելու համար, պատասխանել է. «Կարծում եմ` դրա կարիքը չկա,  քանի որ  Ռոբերտ Ուոլթերը Հայաստան չի էլ գա:  Իմաստ էլ չունի, որ նման վերնագրով զեկույց պատրաստող ԵԽԽՎ պաշտոնյան ժամանի Հայաստանի Հանրապետություն»: Այս դեպքում` չե՞ք կարծում, որ ժամանակն է կանխել այս այցը` գոնե ՀՀ-ԼՂՀ հակասություն չառաջացնելու համար:
– ՀՀ-ի եւ ԼՂՀ-ի միջեւ որեւէ հակասություն չկա եւ չի էլ կարող լինել, մասնավորապես` նաեւ այս զեկույցի հետ կապված: Ես արդեն նշել եմ, որ Ռոբերտ Ուոլթերի հնարավոր այցը Հայաստան չի փոխում մեր որոշումը, եւ չի լինելու եւ ոչ մի համագործակցություն` վերոնշյալ բանաձեւի պատրաստման հետ կապված: Երկրորդում եմ ասածս եւս մեկ անգամ` թե՛ ԵԽԽՎ-ն, թե՛ Ռոբերտ Ուոլթերն այդ մասին տեղյակ են: Որպես գործընկեր, որպես ԵԽԽՎ պատվիրակ` ցանկացած երկրի ցանկացած պատգամավոր կարող է ցանկություն հայտնել` այցելելու Հայաստան:

 

«ԵԽԽՎ-ՈՒՄ ՄԻՇՏ ՉԷ, ՈՐ ՔԱՆԱԿՆ Է ՈՐՈՇԻՉ»


– ԵԽԽՎ ինստիտուցիոնալ հարցերի հանձնաժողովը օրերս ողջունել է Թուրքիայի իշխանությունների առաջարկը` 2016 թվականին խոշոր ներդրող դառնալու միջոցով «Եվրոպայի խորհուրդը ամրապնդելու» մասին: ԵԽԽՎ պաշտոնական կայքի փոխանցմամբ` Ռուդի Սալեսի ԵԽԽՎ ծախսերի մասին զեկույցի հիման վրա պատրաստված բանաձեւի նախագծում հանձնաժողովը կոչ է արել անդամ պետություններին` առանց Եվրոպայի խորհրդի բյուջեում իրենց ներդրումները նվազեցնելու, ընդունել այս առաջարկը: Ավելին` հանձնաժողովը նաեւ առաջարկել է ավելացնել ԵԽԽՎ-ում թուրք պատգամավորների քանակը եւ նշել է, որ թուրքերենը, որպես աշխատանքային լեզու ընդունելը կարող է ֆինանսավորվել միայն հավելյալ ֆինանսական աղբյուրներից: Ինչպե՞ս եք վերաբերվում ԵԽԽՎ-ի նման դիրքորոշմանը, ու ի՞նչ խոչընդոտներ այն կարող է առաջացնել մեզ համար այս հարթակում:
–Անշուշտ, թուրք պատվիրակների քանակի ավելացումը հնարավոր է որոշակի դժվարություններ ստեղծի մեր կողմի համար, բայց կցանկանայի տեղեկացնել մեր ընթերցողներին, որ ԵԽԽՎ-ում միշտ չէ, որ քանակն է որոշիչ, եւ որ սա մեզ համար լուրջ սպառնալիք է: Մեր լոբբին հստակ եւ միասնական աշխատում է` անկախ պատվիրակության անդամների քանակից:
– Ի դեպ, ԵԽԽՎ նախագահին վերջերս նամակ էին ուղղել ԱԺ պատգամավորներ Վահե Հովհաննիսյանը (ԲՀԿ), Նաիրա Զոհրաբյանը (ԲՀԿ) եւ Լեւոն Զուրաբյանը (ՀԱԿ) ու բողոքել հայաստանյան ներքաղաքական իրավիճակից, չե՞ք կարծում, որ ԵԽԽՎ-ում ստեղծված հակահայկական տրամադրությունների պատճառը ոչ միայն մեր «հարեւան» պետություններն են, այլեւ մեր որոշ հայրենակիցները…
– Ժողովրդավարությունը ենթադրում է ազատ կամարտահայտման իրավունք, ինչից ազատորեն օգտվում են հայաստանյան քաղաքական եւ հասարակական կառույցները: Կարծում եմ` Ձեր կողմից նշված նամակը հստակ ապացույց է Եվրոպայի համար` Հայաստանում ժողովրդավարական արժեքների բարձր ներկայացմանը: Նման բնույթի նամակները եւ ելույթները եւս մեկ անգամ ապացուցում են, որ Հայաստանում չկան խոսքի ազատության եւ ժողովրդավարության նկատմամբ ճնշումներ եւ բռնություններ:

«ԿԱՐԵՎՈՐ Է` ՈՐՊԵՍ ԵԶՐԱԳԻԾ ԿԱՆԳ ՉԱՌՆԵԼ 100-ԱՄՅԱԿԻ ՎՐԱ»

–Անդրադառնանք նաեւ մեկ այլ թեմայի. 2007թ. մարտին թուրք ազգայնական Դողու Փերինչեքը դարձավ առաջին մարդը, ով Շվեյցարիայում դատապարտվեց Ցեղասպանության մերժման համար: Սակայն նա բողոքարկել էր ու դատավարությունը շարունակվում էր: Որեւէ տեղեկություն ունե՞ք, թե ինչով ավարտվեց այն:
– Դատարանի որոշումը դեռ չի կայացվել, սակայն դատավարության ընթացքը մեծ ուշադրության էր արժանացել` կապված մի շարք գործոնների հետ, այդ թվում նաեւ այն փաստի, որ հայանպաստ դիրքորոշումը ներկայացվում էին շատ ազդեցիկ մարդկանց կողմից, ինչպես ազգությամբ հայերի հետ որեւէ առնչություն չունեցող մի անձնավորության` Ամալ Քլունիի կողմից, ով, գիտեք, աշխարհահռչակ դերասան Զորջ Քլունիի կինն է: Այս փաստը հետաքրքրության մեծ ալիք բարձրացրեց հասարակության լայն շրջանակներում, եւ շատերը նաեւ այսպես տեղեկացան Ցեղասպանության իրողության մասին: Թե՛ նրա, եւ թե՛ այլոց կողմից ներկայացված ծանրակշիռ փաստարկները, հուսով եմ, իրենց ազդեցությունը կունենան դատարանի վերջնական որոշման վրա:
– Ընդամենը 17 օր է մնացել Հայոց ցեղասպանության 100-րդ տարելիցին, ըստ Ձեզ, միջազգային հարթակներում այս հարցով ի՞նչ կիսատ մնացած գործեր ունենք:
– Ցեղասպանության ճանաչման, դատապարտման եւ հետագա կանխարգելման հետ կապված` բավականին շատ գործ է արված այս ընթացքում, այդ թվում եւ միջազգային հարթակներում: Սակայն շատ կարեւոր է որպես եզրագիծ կանգ չառնել 100-ամյակի վրա եւ հետեւողականորեն շարունակել այս ուղղությամբ բոլոր աշխատանքները:

ՀՐԱՆՏ ՍԱՐԱՖՅԱՆ

Հավանեցի՞ր հոդվածը, կիսվիր ընկերներիդ հետ