ԶԱՐՄԱՆՔ
Արխիվ 12-16
Ինչպես հայտնի է, մեր երկիր ժամանում է ՔԻՄ ՔԱՐԴԱՇՅԱՆԸ: Եվ ահա դրա շուրջ մի զարմանալի աժիոտաժ է սկսվել լրատվական դաշտում: Ոմանք սովորության համաձայն, էլ ավելի մեծ ինտենսիվությամբ ծամծմում են Քարդաշյանի բարեմասնությունների եւ անձնական կյանքի հետ կապված մանրամասները, իսկ մյուսները սկսել են նույնիսկ այնպիսի զարմանալի բաներ գրել, իբր ամոթ է Քարդաշյանին Ծիծեռնակաբերդ թողնել: Զարմանալով հանդերձ, այդ դատափետողներին մնում է ընդամենը մեկ հարց հղել` իսկ դուք գոնե արե՞լ եք Հայոց ցեղասպանության հարցը աշխարհում ավելի ճանաչելի դարձնելու գոնե մեկ տոկոսը Քիմ Քարդաշյանի արածից: Չէ՞ որ Քարդաշյանը, ով ունի 24 մլն հետեւորդի հավանությանն արժանացած էջ "Ֆեյսբուքում" եւ ավելի քան 30 մլն հետեւորդ ունեցող էջ "Թվիթերում", իր այդ էջերի լայն լսարան ունենալն օգտագործել է մեր խնդիրը բարձրաձայնելու համար, դրա հետեւանքով նաեւ վաստակելով թշնամիներ եւ 100 հազարավոր դոլարների կորուստներ տալով իր բիզնեսում:
Այն, որ ԻԼՀԱՄ ԱԼԻԵՎԸ չի էլ թաքցնում, որ հենց ինքն է նպաստում լարվածության աճին հակամարտության գոտում, նորություն չէ, սակայն այդ զարմանալի փաստին հարկ համարեց անդրադառնալ եւ ՀՀ նախագահը. "Մենք, իհարկե, կիսում ենք համանախագահների այն կարծիքը, որ ժողովուրդներին պետք է նախապատրաստել ոչ թե պատերազմի, այլ` խաղաղության: Սակայն, ցավոք սրտի, Ադրբեջանի ղեկավարությունը վարվում է ճիշտ հակառակ կերպ: Բոլորս դիտարկում ենք իրավիճակի լարում` սկսած անցած տարվա ամառվանից: Բոլոր դեպքերում պետությունների եւ այս հարցով զբաղվող պաշտոնատար անձանց շրջանում կասկած չկա, որ էսկալացիայի պատճառն Ադրբեջանն է": Ավելորդ չէր նաեւ Սերժ Սարգսյանի զգուշացումը. "Եթե Ադրբեջանը դիմի հերթական արկածախնդրության, մենք չենք վախենա պատերազմելուց": Անշուշտ, ճիշտ է, որ խաղաղություն ունենալու համար պետք է պատրաստվել պատերազմի, բայց, այնուամենայնիվ, հուսանք, որ նավթի բույրը դեռ ամբողջովին չի չորացրել մազութային սուլթանատի բռնապետի ուղեղը:
Մեզ անզարմանք չթողեց եւ նախկին վարչապետ ՀՐԱՆՏ ԲԱԳՐԱՏՅԱՆԸ: Կինոռեժիսոր Էդգար Բաղդասարյանը արձանագրեց թե ինչ օյին է բերել որձ կովերի մասնագետը մեր կինոյի գլխին. "Հայֆիլմում" 1990-ական թվականներին հանդիպում էր վարչապետ Հրանտ Բագրատյանի հետ: Խոսում էինք կինոյի օրենքի, հարկային խնդիրների մասին, որպեսզի կինոն զարգանա: Հրանտ Բագրատյանն ասաց, որ ոչ մի հարկային արտոնություններ. նրբերշիկ արտադրողն ու կինո արտադրողը պետք է լինեն նույն հարկային դաշտում: Դա բերեց նրան, որ մեր կինոն կամաց-կամաց դառավ ներբերշիկ, այն, ինչ ունենք այսօր": Սակայն Բագրատյանը զարմանալիորեն դրան արձագանքեց` վիրավորելով ամբողջ մտավորականությանը. "Սա շատ հետաքրքիր է: Վկայում է մեր մտավորականության որոշ "ներկայացուցիչների" ողորմելի վիճակի մասին":
Բոլորիս է հայտնի ասացվածքը հայի ետին խելքի մասին: Սակայն զարմանալիորեն այնպես է ստացվում, որ միգուցե շուտով խոսենք ոչ թե հայի, այլ ամերիկացու ետին խելքի մասին: Պատճառն այն է, որ այժմ ԱՄՆ նախկին պետքարտուղար ՋԵՅՄՍ ԲԵՅՔԵՐԸ խոստովանում է ամերիկյան քաղաքականության սխալը, որ դեռ 15 տարի առաջ չեն փորձել Ռուսաստանին հրավիրել ՆԱՏՕ. "Մենք եւ արեւմտյան մեր դաշնակիցները պետք է միջոցներ գտնենք Ռուսաստանին ազգերի միություն վերադարձնելու համար: Շուրջ 15 տարի` Ելցինի եւ Պուտինի կառավարման առաջին տարիներին, մենք լավ հարաբերություններ ենք ունեցել Ռուսաստանի հետ, իսկ հիմա վերադարձել ենք 40 տարի առաջ եղած վիճակին": Ետին խելքով` նախկին պետքարտուղարը նաեւ մատնանշեց, որ ԱՄՆ-ում ի վերջո պետք է հասկանան, որ Ամերիկան չի կարող ամբողջ աշխարհի համար ոստիկան լինել: Դե ինչ, ամերիկացու ետին խելքը Բարաք Օբամայինը լիներ:
Իսկ հաճելիորեն մեզ զարմացրեց Չեխիայի նախագահ ՄԻԼՈՇ ԶԵՄԱՆԸ, ով ի պատասխան ամերիկյան դեսպանի քննադատությանը, թե ինչու է պատրաստվում մայիսի 9-ին Մոսկվայում հաղթանակի տոնակատարություններին մասնակցել, որոշեց այլեւս չտեսնել դեսպանի երեսը նախագահական նստավայրում: "Չեմ կարող պատկերացնել, որ Չեխիայի դեսպանը Վաշինգտոնում խորհուրդներ տա ԱՄՆ նախագահին, թե ինչպես եւ ուր ծրագրի իր ծառայողական այցերը",- հայտարարել է Չեխիայի նախագահը: Եվ իրոք, այդ ինչպե՞ս է պատահում, որ գրեթե ցանկացած երկրի դիվանագետներն իրենց դիվանագետի պես են պահում եւ օտար երկրների նախագահաներին անտեղի խորհուրդներ չեն տալիս, իսկ Ամերիկայի դեսպանները ամենուրեք խոթում են իրենց քթերը, որոնց երկարությանը կնախանձեր անգամ Բուրատինոն: Ինչեւէ, զարմանալով հանդերձ, հուսանք, որ աշխարհում գնալով ավելի ու ավելի շատերը կհետեւեն Զեմանի դրական, արժանապատիվ կեցվածքին:
Զարմացած է
ՀՈՎՀԱՆՆԵՍ ԳԱԼԱՋՅԱՆԸ
Հավանեցի՞ր հոդվածը, կիսվիր ընկերներիդ հետ
