ՀՀԿ ՊԱՏԳԱՄԱՎՈՐ. «ՌԴ ՆԱԽԱԳԱՀԸ ՈՐԵՎԷ ՄԵԿԻՆ ՇՔԱՆՇԱՆ ՉԻ ՏԱԼԻՍ ՇԱՀԱԳՌԳՌԵԼՈՒ ՀԱՄԱՐ»
Արխիվ 12-16ՀՀԿ ՊԱՏԳԱՄԱՎՈՐ. «ՌԴ ՆԱԽԱԳԱՀԸ ՈՐԵՎԷ ՄԵԿԻՆ
ՇՔԱՆՇԱՆ ՉԻ ՏԱԼԻՍ ՇԱՀԱԳՌԳՌԵԼՈՒ ՀԱՄԱՐ»
Մարտի 28-ին Երևանում գումարվեց ՀՀ ԱԺ արտաքին հարաբերությունների և ՌԴ Պետդումայի ԱՊՀ գործերի, եվրասիական ինտեգրման ու հայրենակիցների հետ կապերի կոմիտեների համատեղ նիստը, որին մասնակցում էր նաեւ ՀՀԿ խմբակցության պատգամավոր, ՀՀ երկրորդ նախագահ Ռոբերտ Քոչարյանի խնամի Վոլոդյա Բադալյանը:
ՀՀ ԱԺ արտաքին հարաբերությունների մշտական հանձնաժողովը և ՌԴ Պետական դումայի ԱՊՀ հարցերի, եվրասիական ինտեգրման և հայրենակիցների հետ կապերի հանձնաժողովը իրենց երրորդ համատեղ նիստից հետո հայտարարությամբ վերահաստատեցին Եվրասիական տնտեսական միությունում տարբեր ոլորտներում համագործակցությունը։
«Իրավունքը» ՀՀԿ պատգամավոր Վոլոդյա Բադալյանից պարզեց՝ ինչ մեսիջներով էին Հայաստան եկել և ՌԴ Պետական դումայի ներկայացուցիչները: «Դա մեր երկու հանձնաժողովների հերթական նիստն էր, որը կարող է ունենալ շարունակական ընթացք: Եթե հարցեր առաջանան, մենք կքննարկենք»,- ասաց Բոդոլյանը:
- Պրն Բադալյան, նիստի ընդմիջմանը ռուս գործիչներից մեկը որոշ հայ քաղաքական գործիչների ելույթները լսելով օգտագործեց «кисло получилось» բառակապակցությունը: Տպավորությունն այնպիսին է, որ ռուս գործիչներին դուր չեն գալիս որոշ հայ քաղաքական գործիչների հակադարձումները ԵՏՄ-ի մասին:
- Ձեզ տեղեկացնեմ, որ ես հայ ռուսական միջխորհրդարանական հանձնաժողովի 15 տարվա անդամ եմ...
-Նաեւ «Բարեկամություն» շքանշանի եք արժանացել...
- Դա այլ խնդիր է: Ես որեւիցե անգամ չեմ տեսել, որ Հայաստանի եւ Ռուսաստանի ընդհանուր գաղափարախոսության մեջ ինչ-որ հակառակ մտքեր առաջանան: Հնարավոր է՝ երբեմն ընդդիմադիր կարծիքներ հնչեն, բայց դա դարձնել ընդհանուր խոսակցության թեմա եւ առարկա, չեմ կարծում՝ ճիշտ է: Համատեղ նիստի ընդհանուր մթնոլորտը եղել է բարեկամական, շարունակական:
- Կարծիք կա, թե ՌԴ-ը չի ցանկանում, որ Հայաստանը ԵՄ-ի հետ համագործակցության ինչ-որ փաստաթուղթ ստորագրի, որի վառ վկայությունն օրեր առաջ Հայաստանում հնչեցրած ՌԴ պետդումայի նախագահ Սերգեյ Նարիշկինի հայտարարություններն են:
- Ես չեմ կարող պատասխանել այդ հարցին, քանի որ տեղյակ չեմ: Բայց Հայաստանը Մաքսային միության անդամ է եւ քննարկում է այդ միությանն առնչվող հարցերը: Թե ռուսներն ինչ տրամադրվածություն ունեն Հայաստան- ԵՄ ստորագրվելիք փաստաթղթի վերաբերյալ, չեմ կարող ասել: Իրականում նման խնդիր չեմ էլ տեսնում:
- Այսինքն՝ՌԴ-ը դե՞մ չէ Հայաստան-ԵՄ հարաբերությունների զարգացմանը:
- Մենք անկախ երկիր ենք: Եւ եթե ճիշտ քայլեր ենք անում, բոլոր երկրների հետ կարող ենք կարգավորել մեր հարաբերությունները, բայց հիմնական ուղղությունը վերցնելով Մաքսային միությունը:
- Քննարկվում է նաեւ ԵՏՄ-ում միասնական արժույթ ստեղծելու գաղափարը, որը, որոշ ընդդիմախոսների կարծիքով, սպառնալիք է ՀՀ-ի անկախությանը:
- Դա ընդամենը հայտարարվել է: Դեռ երկար պետք է աշխատանք տարվի՝ պարզելու կսպառնա՞ դա ՀՀ-ի անկախությանը, թե՝ ոչ: Հիմա չեմ կարող ոչինչ ասել, քանի որ դա մտածելու ու քննարկելու խնդիր է:
- 2014 թ-ին ՌԴ նախագահ Վլադիմիր Պուտինի կողմից արժանացել եք «Բարեկամություն» շքանշանի: Կես կատակ, կես լուրջ՝ արդյոք այդ շքանշանն է Ձեզ, այսպես ասած ,պարտավորեցնում արտահայտել ռուսամետ դիրքորոշում: Կամ միգուցե ինչ-որ արտոնությո՞ւն է տալիս:
- Ոչ: Այդ շքանշանը չի տրվել ինչ-որ արտոնության կամ ձեւի համար: 1988 թ-ից եւ դրանից առաջ ղեկավարել եմ Երեւանի քիմիական ռեակտիվների գործարանը: Այդ տարիներից կապեր եմ հաստատել Մոսկվայի հետ: 15 տարի եղել եմ հայ-ռուսական միջխորհրդարանական խմբի անդամ, համանախագահ, նախագահ, եւ դա գնահատվել է: Այսօր ոչ ոք չի կարող ասել, որ ՌԴ նախագահը որեւէ մեկին շահագրգռելու համար շքանշան տվեց: Այդ կարծիքը չեմ ընդունում:
ՍՈՆԱ ԴԱՎԹՅԱՆ
