«ԵԼՔ ՉԿԱ» ՖԻԼՄԸ ՆՈՐ ԵԼՔԵՐ Է ԳՏԵԼ ՌՈՒՍԱՍՏԱՆՅԱՆ 5 ՔԱՂԱՔՆԵՐՈՒՄ
Արխիվ 12-16«ԵԼՔ ՉԿԱ» ՖԻԼՄԸ ՆՈՐ ԵԼՔԵՐ Է ԳՏԵԼ ՌՈՒՍԱՍՏԱՆՅԱՆ 5 ՔԱՂԱՔՆԵՐՈՒՄ
Ուղիղ մեկ տարի առաջ «Ելք չկա» գեղարվեստական ֆիլմի պրոդյուսեր ԿԱՄՈ ՈՒՆԱՆՅԱՆԸ եւ ռեժիսոր ՎԱՀԵ ՍԱՅԱՆԸ «Ազդակ» լրագրողական ակումբում ներկայացնում էին ֆիլմի առաջին քայլերն ու առաջիկա ծրագրերը: Այն ժամանակ տղաները պատրաստվում էին մասնակցել «Կաննի» կինոշուկային, ինչի մասին Կ. Ունանյանը նշել էր. «Այնտեղ ներկա կլինեն տարբեր ընկերությունների, կինոփառատոների գործակալներ, ռեժիսորներ, պրոդյուսերներ, դիստիբյուտորներ, ովքեր կդիտեն ֆիլմը: Հուսով ենք, որ նրանք կհավանեն ֆիլմը կամ էլ` սցենարը, ինչի արդյունքում ֆիլմը կունենա միջազգային ճանաչում»: Իսկ թե ի՞նչ եղավ ֆիլմի ճակատագիրը, որը քրեական դրամայի հիմքում մերօրյա իրականությունն էր ներկայացնում` պատմելով սիրո, ընկերության եւ դավաճանության մասին, մեկ տարի անց «Իրավունքը» պարզեց հետեւյալը. «Ելք չկա» ֆիլմը գրեթե երեք ամիս մնաց «Մոսկվա» կինոթատրոնի մեծ էկրաններին, այնուհետեւ ֆիլմը ցուցադրվեց ՀՀ մարզերում: Իսկ հետո սկսվեց ֆիլմի հաղթարշավը:
Հնարավորություն ստանալով մասնակցել «Կաննի» միջազգային կինոփառատոնին`հաջող ցուցադրության շնորհիվ ֆիլմը ստացել է բազմաթիվ առաջարկներ օտարերկրյա կինոգործիչների կողմից: Իսկ այժմ ապրիլի 2-ից սկսած ֆիլմն արդեն ցուցադրվում է Ռուսաստանի 5 քաղաքներում` Կրասնոդարում, Անապայում, Սոչիում, Ադլերում, Արմավիրում: Ի դեպ, Կրասնոդարում ֆիլմի պրեմիերային ներկա է եղել նաեւ ֆիլմի պրոդյուսեր եւ գլխավոր դերակատար Կամո Ունանյանը: Ավելին` հանդիսատեսի պանաջով, «Ելք չկան» շուտով կրկին կլինի նաեւ երեւանյան կինոթատրոններից մեկի մեծ էկրաններին:
ՀՐԱՆՏ ՍԱՐԱՖՅԱՆ
