ԽՈՐԵՆ ՀՈՎՀԱՆՆԻՍՅԱՆ. ԹՈՂ ԼԻՆԻ ՊԱՐՏՈՒԹՅՈՒՆ, ԵԹԵ ԴՐԱՆԻՑ ՀԵՏՈ ԱՌԱՋ ԵՆՔ ԳՆԱԼՈՒ
Արխիվ 12-16ԽՈՐԵՆ ՀՈՎՀԱՆՆԻՍՅԱՆ. ԹՈՂ ԼԻՆԻ ՊԱՐՏՈՒԹՅՈՒՆ, ԵԹԵ ԴՐԱՆԻՑ ՀԵՏՈ ԱՌԱՋ ԵՆՔ ԳՆԱԼՈՒ
Օրեր առաջ կայացավ հայկական ֆուտբոլի ու "Արարատի" լեգենդ, ԽՍՀՄ հավաքականի ֆուտբոլիստ Խորեն Հովհաննիսյանի 60-ամյակին նվիրված ընկերական հանդիպումը` ԽՍՀՄ եւ Աշխարհի հավաքականների միջեւ: Բոլոր ժամանակների լավագույն ֆուտբոլիստները դարձյալ խաղադաշտում միավորվելով` հաստատեցին իրենց բարձր կարգը: Հանդիպումն ավարտվեց խաղաղ ելքով, ոչ-ոքի` 3:3: Սա էլ ԽՈՐԵՆ ՀՈՎՀԱՆՆԻՍՅԱՆԻ հետ զրուցելու առիթը դարձավ:
-Տարիներ անց դարձյալ հարազատ մարդկանց հետ խաղադաշտում էիք` երկրպագուների աջակցության ներքո: Ի՞նչ տպավորություններ ու զգացողություններ ունեցաք:
- Հավաքվեցին այն ֆուտբոլիստները, որոնց հետ ես խաղացել եմ 80- ականներին: Լավագույն աստղերը հավաքվեցին, եւ նորից հիշեցինք մեր անցյալը: Շատ հետաքրքիր էր:
- Հեղինակել եք գոլեր, որոնց մասին խոսվում է մինչ օրս: Այս հանդիպման ընթացքում էլ գոլ հեղինակեցիք: Լավագույնների շարքում կդասե՞ք այս գնդակը:
- Ես այն չէի դասի լավագույն գոլերի շարքին, բայց գիտե՞ք, ես անշուշտ ուզում էի գոլ խփել: Այսպիսի խաղերը միշտ շոու են լինում: Բայց այս խաղում մենք ոչ մի բան չենք պայմանավորվել, եւ ամեն ինչ բնական ստացվեց, ինչն ինձ շատ ուրախացրեց:
- ԽՍՀՄ-Արգենտինա, ԽՍՀՄ-Բելգիա, "Արարատ"-"Բավարիա"… Այս հանդիպումներն ամենահիշարժաններից են, այսքան տարի անց ո՞ր հանդիպումը կառանձնացնեք, որպես ամենայուրահատուկը:
- Ես օլիմպիական խաղերը կարող եմ հիշել 80-ականներին, երբ երրորդ տեղի համար էինք խաղում, եւ այդ խաղում ես գոլ խփեցի, առաջին խաղակեսում հաշիվը 0:0 էր, ես դուրս եկա խաղադաշտ երկրորդ խաղակեսում եւ մոտ 10 րոպե անց գոլի հեղինակ դարձա:
- Լեգենդար "Արարատի" ժամանակաշրջանով կարծեք թե վերջ դրվեց հայկական ֆուտբոլի փառահեղ շրջանին: Ձեր կարծիքով` ի՞նչն էր խնդիրը, որ Ձեզ փոխարինողները չկարողացան պահել այն, ինչ Դուք ստեղծել էիք:
- Ես կարող եմ ասել չի փակվել, ուղղակի սերնդափոխությունը ճիշտ ձեւով չեղավ, եւ անկում գրանցվեց, իսկ վերականգնելը շատ դժվար եղավ: Այդ ընթացքում սխալներ շատ են եղել, բայց ես չեմ ուզում որեւէ մեկին մեղադրել այս հարցում, պարզապես շատ պատահական մարդիկ թիմի կողքին հայտնվեցին եւ ճիշտ չկողմնորոշվելով` ունեցանք այդ ֆուտբոլը:
- Երբ խաղադաշտում էիք` Դուք, Լեւոն Իշտոյանը եւ այլն, հայ երկրպագուները գնում էին մարզադաշտª վստահ լինելով հաղթանակի համար, ցավոք դա մնաց հեռու անցյալում: Որո՞նք են հայկական ֆուտբոլի ամենակարեւոր խնդիրները` ըստ Ձեզ:
- Խնդիրներ միշտ կան, պետք է կարողանալ ճիշտ հետեւություններ անել, հասկանալ թերություններն ու լրացնել բացերը: Այդ ամենը հենց մեզնից է կախված:
- Դուք խաղում էիք հանդիսականների համար, փորձելով ուրախացնել ֆուտբոլասերներին: Այսօր հաճախ խաղում են հաշվի համար: Չե՞ք կարծում, որ ժամանակակից ֆուտբոլը կորցնում է դիմագիծը:
- Իսկապես խաղում էին` հանդիսականին ուրախացնելու համար, եթե ցույց ես տալիս լավ արդյունք` պարզ է, որ դիտողն էլ գոհ կլինի: Կարող է լինել մեկ-երկու խաղ, երբ խաղը չի ստացվում, բայց հիմնականում հանդիսականը գալիս է գեղեցիկ խաղ տեսնելու, եւ լավ արդյունքը լավ խաղի հետեւանք է լինում:
- Կարծում եմ` շատերը կհամաձայնեն, որ այսօր ազգային ընտրանուն պետք է այնպիսի մարզիչ, ով հայկական ֆուտբոլի լավագույն ժամանակաշրջանի "մեղավորներից" է:
- Ընդհանրապես, բոլոր ասպարեզներում պետք է աշխատեն մարդիկ, ովքեր մասնագետ են այդ ոլորտում: Մի կողմ թողնենք ֆուտբոլը, պատկերացրեք գյուղատնտեսության նախարար նշանակել մարդու, ով կապ չունի այդ ամենի հետ, ի՞նչ կարող է նա անել: Պետք է դրսից մասնագետներ հրավիրել, եթե այստեղ ի վիճակի չեն, օգտակար կլինի, ինչն արվում է, բայց թե ինչ մակարդակով, չեմ կարող ասել: Ամեն մարզիչ իր գաղտնիքները չի ասի, կարող է ինչ-որ հպանցիկ ձեւով, բայց ոչ ոք չի բացահայտում իր գաղտնիքները: Մեզ պետք է մարդ, ով այդ ամենի մեջ եղել է, անցել է այդ փուլը:
ՔՐԻՍՏԻՆԵ ՊԵՏՐՈՍՅԱՆ
