ԶԱՐՄԱՆՔ
Արխիվ 12-16
Երեկ մեզ դրականորեն զարմացրեց Զարուհի Փոստանջյանի կազմակերպած խորհրդաժողովին անսպասելիորեն հայտնված օմբուդսմեն ԿԱՐԵՆ ԱՆԴՐԵԱՍՅԱՆԸ: Նա օգտագործելով այդ ամբիոնը` տեղեկացրեց, որ տարեկան զեկույցում առանցքային տեղ է գրավելու Ցեղասպանության եւ դրա չճանաչման հետեւանքով հայերի մարդու իրավունքների ամենազանգվածային խախտումը. "Իմ տարեկան զեկույցում ուսումնասիրել ենք պետական 25 մարմնի գործունեություն, տասնյակ առանձին խնդիրներ, հարյուրավոր խախտումներ եւ բողոքներ: Դուրս ենք բերել 167 համակարգային խնդիր, որոնք վերաբերում են հազարավոր մարդկանց խախտված իրավունքներին: Կա մի գերխնդիր, մի կոպտագույն իրավախախտում:
Դա ՀՀ բոլոր բնակիչների սեփականության եւ իրավունքի հարցն է, որը խախտվել է կոպտագույն ձեւով` Թուրքիայի կողմից Հայոց ցեղասպանության իրավական ճանաչման մերժման ճանապարհով": Նա հնչեցրեց եւ պատառիկ` դեռեւս չհրապարակված զեկույցից. "Թուրքիայի կողմից սպանվել է մոտ 2.5 մլն հայ: Հայ բնակչությունը ֆիզիկական եւ հոգեկան տանջանքների է ենթարկվել, միլիոնավոր հայեր հարկադրաբար տեղահանվել են եւ զրկվել նվազագույն կենսապայմաններից, տանջամահ արվել: Մեծ եղեռնի հետեւանքով միլիոնավոր հայեր զրկվել են իրենք ունեցվածքից եւ բնակություն հաստատել ամբողջ աշխարհում, հուշարձանները քանդվել են, եկեղեցիները ոչնչացվել կամ վերածվել մզկիթների, ձեռագրերը ոչնչացվել են: Փարիզի խաղաղության կոնֆերանսում հաստատվել է, որ միայն 1914-1918թթ.-ին հայերին պատճառվել է մոտ 20 մլրդ ֆրանկի վնաս": Ինչեւէ, զարմանալով հանդերձ, պետք է ողջունենք, որ աստիճանաբար օմբուդսմենն անցում է կատարում փոքրամասնությունների իրավունքներից դեպի մեր ազգի մեծամասնության հիմնարար իրավունքների պաշտպանությունը: Իսկ այս պահին, ինչքան էլ զարմանալի լինի, պարզվում է, որ որձ կովերի մասնագետ, նախկին վարչապետ ՀՐԱՆՏ ԲԱԳՐԱՏՅԱՆԸ երազում է, որպեսզի ՀՀ տնտեսությունը պայթի. "Մենք ունենք հսկայական անդունդ` վճարման հաշվեկշռում: Դրամը, փոխանակ արժեզրկվի, օրերս նույնիսկ արժեւորվում է: Ինչո՞ւ: Որովհետեւ իրանցիները եկել են: Լավ, բայց նման դեպքում` ԿԲ-ն պետք է դոլար գնի ու մի 50 մլն-ով պահուստներն ավելացնի: Այսօր արդեն պահուստները 1,2 մլրդ են: Ասում եք` կանխատեսում են, որ ապրիլի 24-ից հետո կպայթի: Ոչ, վաղը կարող է Չինաստանը 1 մլրդ տա, դա էլ կնստենք կուտենք: Կամ կարող է ԱՄՆ-ը լրացուցիչ 1 մլրդ տա, կամ` ՌԴ-ն: Այսինքն` ես այն մարդը չեմ, որ ասեմ` ապրիլի 24-ից հետո կպայթի: Եթե չի պայթում, կայուն է մնում` պարտքի հաշվին, մեր երկրի վարկունակությունն է իջնում: Այնպես որ, դեռեւս շանս կա պայթյունը "փոխարինել" ճահճով: Ավելի սարսափելին ուրիշ բան է. երկիրը չի աշխատում: Իսկ ավելի լավ չէ՞ պայթի, բայց սկսենք աշխատել": Դե ինչ, պարոն Բագրատյանը տնտեսություն պայթեցնելու հարուստ փորձ ունի` այն, ինչ բոլորիս գլխին եկավ 1990-ականներին: Երեւի թե, նա զարմանալիորեն կարոտով հիշում է այդ ժամանակները, ու նրա ՀՀՇ-ական սիրտը չի դիմանում, թե այդ ինչպես է, որ մեր տնտեսությունը թեեւ բարվոք չէ, բայց ժողովուրդը ընկղմված չէ համատարած փլուզման դժոխքի մեջ:
Իսկ քաղաքական ասպարեզում ապակայունացմանը ձգտող ԺԻՐԱՅՐ ՍԷՖԻԼՅԱՆԸ` իր "Հիմնադիր խորհրդարանով" հանդերձ, դարձել է բլոգերների քննարկման առարկա: Նրա եւ նրա կառույցի զարմանալի վարքագիծը տեղեկատվական անվտանգության փորձագետ Տիգրան Քոչարյանը բնութագրում է որպես տիպիկ աղանդավորական կառույցի վարքագիծ` հարուցելով Ստյոպիկ Սաֆարյանի վրդովունքը, թե ինչու են այդ փորձագետից առհասարակ հարցազրույց վերցնում: Սակայն դրանից զգալիորեն մեղմ գնահատական է տալիս մեր գործընկեր Լեւոն Սարդարյանը. "Ժիրայր Սէֆիլյանն ասելով, թե պատրաստ է ձերբակալվելու, հերթականն է, ով կանգնեց "թող ոչ մի զոհ չպահանջվի ինձնից բացի" դեպի ճահիճ տանող ոլոր-մոլոր արահետին. Ու սա էնքան ցավալի է, որովհետեւ հերոսն աչքիդ առաջ վերածվում է դեմագոգի, դեմագոգից` շաղակրատի, իսկ շաղակրատից հետո հաջորդ փուլը զրոյացումն է": Դե ինչ, քանի որ մեր գործընկերոջ անունն էլ է Լեւոն, ապա երեւի թե բնական է, որ նա լավ է ուսումնասիրել Տեր-Պետրոսյան Լեւոնի քաղաքական անկման ուղին ու միանգամից նույն ախտանիշները անմիջապես նկատում է եւ այլ գործիչների մոտ:
Իսկ մեր հռչակավոր ռուսաստանաբնակ հայրենակից ՄԻԽԱՅԻԼ ԳԱԼՈՒՍՏՅԱՆԸ իսկական հայի բախտ ունի: Համակարգչահենները կոտրել են նրա էլեկտրոնային նամակագրությունը ՌԴ նախագահի վարչակազմի ղեկավարի տեղակալի հետ, ուր վերջինիս խնդրում է ճնշում գործադրել որոշ կայքերի վրա, որպեսզի իր ֆիլմերի առաջխաղացումն ավելի հաջող լինի: Դե ինչ, իր "հայի բախտի" դրսեւորման մեջ մեղավոր է բացառապես Գալուստյանը: Հավանաբար, նա այնքան անփութորեն է վերաբերվել սեփական էլեկտրոնային փոստի անվտանագությանը (ի վերջո արվեստի մարդ է, չէ՞), որ թերեւս այն կոտրելու համար պետք չէր լինել համակարգչահեն, դա ի զորու կլիներ անել երեւի թե ցանկացած գրագետ ուսանող-ծրագրավորող: Դե ինչ, ձեր էլեկտրոնային շտեմարանները կողպած պահեք, որպեսզի ուրիշներին գող չանվանեք:
Զարմացած է ՀՈՎՀԱՆՆԵՍ ԳԱԼԱՋՅԱՆԸ
Հավանեցի՞ր հոդվածը, կիսվիր ընկերներիդ հետ
