ՍԻՄ ՆԱԽԱԳԱՀԸ ՀԱՆԴԻՊԵՑ ԱՊԱԳԱ ՔԱՂԱՔԱԳԵՏՆԵՐԻ ՀԵՏ
Արխիվ 12-16
Երեկ ՍԻՄ նախագահ, ԱԺ պատգամավոր ՀԱՅԿ ԲԱԲՈՒԽԱՆՅԱՆԸ Աժ-ում հանդիպեց Երեւանի պետական համալսարանի քաղաքագիտության ֆակուլտետի մի շարք ուսանողների հետ: Ապագա քաղաքագետներին պատգամավորը նախ ներկայացրեց իր անցած քաղաքական ճանապարհը, այն դժվարություններն ու խոչընդոտները, որին նա եւ կուսակիցները հանդիպել են 26 տարիների ընթացքում. "Կուսակցությունը ստեղծվել է 1989 թվականի ապրիլի 4-ին, եւ իրավիճակն այսքան ազատ ու ժողովրդավար չէր: Երբ ստեղծում էինք ՍԻՄ-ը, դա ուղեկցվեց ձերբակալություններով, մի պահ անգամ պարետային ժամ էր հայտարարված, որ մարդիկ երեկոյան ժամերին չէին կարող ազատ դուրս գալ փողոց:
Բազմիցս հայտնվել եմ կալանքի տակ, երկու անգամ մահափորձ են կատարել իմ նկատմամբ, իսկ երկու անգամ նույնիսկ դատապարտվել եմ": Քաղաքական գործիչը երիտասարդներին ասաց, որ քաղաքական ճանապարհ անցնելն այդքան էլ հեշտ բան չէ, բայց այն պետք է անցնել պատվով:
Հարց հնչեց ուսանողի կողմից, թե այսօրվա մեր ընդդիմությունը ֆիկտիվ է եւ պայքարող չէ՞, ինչին ի պատասխան` պատգամավորը նշեց, որ մեր ընդդիմությունը ֆիկտիվ չէ, սակայն շատ անգամ չի կարողանում իր անհամաձայնությունը կամ հակադրվելը իշխանություններին, կամ ինչ-որ մի նախաձեռնությունը, ներկայացնել գրագետ ձեւով. "Այո, մենք ունենք ոչ այդքան գրագետ ընդդիմադիր գործիչներ, ովքեր ինչ-որ նախաձեռնությանը դեմ լինելով` չեն կարողանում հիմնավորել ինչու, կամ ինչին են դեմ: Սա չի վերաբերում բոլորին, եւ, օրինակ, ՀՅԴ-ն տարիներ առաջ դուրս եկավ կոալիցիայից, քանի որ նրանք անհամաձայնություն հայտնեցին հայ-թուրքական արձանագրությունների` մեր իշխանությունների կողմից ստորագրմանը: Այսինքն` նրանք ունեցան գաղափարական անհամաձայնություն եւ ոչ թե մեկ, կամ մի քանի անձերին դեմ լինելով": Պատգամավորը ուսանողներին համեմատական ներկայացրեց ներկա եւ նախորդ ընդդիմադիրների գործունեության պայմանների միջեւ` նշելով. "23 տարի լինելով ընդդիմադիր` նման ջերմոցային պայմաններ, որոնք ունեն այսօրվա ընդդիմադիրները, չենք ունեցել: Հիմա նրանց տրվում են ավելի շատ արտոնություններ շատ հարցերում, քան իշխող կուսակցությանը: Ես այն ժամանակ, որքան էլ ցանկանայի, ինձ երբեք հանրային հեռուստաընկերությամբ ելույթ չէին տրամադրի, իսկ հիմա նրանք ունեն այդ հնարավորությունը եւ դեռ մի բան էլ ավելին":
Հանդիպումն անցավ ջերմ ու բուռն մթնոլորտում, հնչեցին բազում հարցեր, որոնց պատասխանները ուսանողները տարան իրենց հետ:
ԱՐՄԵՆՈՒՀԻ ՀԱԿՈԲՅԱՆ
Հավանեցի՞ր հոդվածը, կիսվիր ընկերներիդ հետ
