ՊՆ ՄԱՄԼՈ ԽՈՍՆԱԿԸ` «ՀԻՄՆԱԴԻՐ ԽՈՐՀՐԴԱՐԱՆ»-Ի ԱՆԴԱՄԻՆ. «ԲԱՆԱԿԻ ԱՆՈՒՆԸ ՄԻ՛ ՇԱՀԱՐԿԵՔ»
Արխիվ 12-16ՊՆ ՄԱՄԼՈ ԽՈՍՆԱԿԸ` «ՀԻՄՆԱԴԻՐ ԽՈՐՀՐԴԱՐԱՆ»-Ի ԱՆԴԱՄԻՆ. «ԲԱՆԱԿԻ ԱՆՈՒՆԸ ՄԻ՛ ՇԱՀԱՐԿԵՔ»
«Իրավունքն» այսօր ՊՆ մամլո խոսնակ Արծրուն Հովհաննիսյանին խնդրեց անդրադառնալ «100-ամյակն առանց ռեժիմի» նախաձեռնության անդամ Վարուժան Ավետիսյանի այն հայտարարությանը, որ ահռելի տեղեկատվություն ունի շարժումն այն մասին, թե բանակն ու ոստիկանությունը, հավանաբար, կմիանան շարժմանը:
Արծրուն Հովհաննիսյանը կոչ է անում բանակի անունը չշահարկել, քանի որ բանակն ապաքաղաքական կառույց է եւ կատարում է իր մարտական խնդիրը: «Որքան քիչ շահարկվի բանակի անունը, փառք ու պատիվ նրանց: Մանավանդ նման ամպագոռգոռ ու դատարկամիտ հայտարարություններ շատ ենք լսել, որ փորձել են ներքաշել բանակին: Բայց դրանից լավ բան դուրս չի եկել»,- եզրափակեց Արծրուն Հովհաննիսյանը:
Ի դեպ, ոստիկանությունը մինչ օրվա ավարտին այդպես էլ չարձագանքեց Վարուժան Ավետիսյանի վերոնշյալ հայտարարությանը:
ՍՈՆԱ ԴԱՎԹՅԱՆ
