"ՄԱՐԶԱՅԻՆ ԻՇԽԱՆՈՒԹՅՈՒՆՆԵՐԸ ՍԻՐՈՎ ԱՋԱԿՑՈՒՄ ԵՆ ՖՈՒՏԲՈԼԻՆ, ԲՈՔՍԻՆ, ԲԱՅՑ ՈՉ ԹԱՏՐՈՆԻՆ"
Արխիվ 12-16ԱՋԱԿՑՈՒՄ ԵՆ ՖՈՒՏԲՈԼԻՆ, ԲՈՔՍԻՆ, ԲԱՅՑ ՈՉ ԹԱՏՐՈՆԻՆ"
Այսօր թատրոնի միջազգային օրն է, այդ առթիվ, ինչպես ամեն տարի, այս տարի եւս կկայանա "Արտավազդ-2015" թատերական ամենամյա մրցանակաբաշխությունը, որն այս տարի նվիրվում է ԽՍՀՄ ժողովրդական արտիստ ՍՈՍ ՍԱՐԳՍՅԱՆԻ ծննդյան 85-ամյակին: "Արտավազդի" շրջանակներում երեկ Թատերական գործիչների միությունը նախաձեռնել էր մարզային թատրոնների ստուգատես, որի ընթացքում քննարկվեց ու խոսվեց մարզային թատրոնների խնդիրների մասին:
Պարզվեց, որ Գորիսի Վ. Վաղարշյանի անվան պետական դրամատիկական թատրոնում դեռեւս շարունակում է միակ խնդիր մնալ դերասանուհիների հարցը, որոնք իրենց բախտը գտնելուց հետո` ամուսնանալով, հրաժեշտ են տալիս թատերական կյանքին. դերասանուհիների ամուսիններն են այդպես ցանկանում: Իսկ Կապանի Ալ. Շիրվանզադեի անվան պետական դրամատիկական 80-ամյա թատրոնն ունի տրանսպորտային միջոցի խնդիր... Բայց Աբովյանի տիկնիկային-դրամատիկ թատերախումբը ստուգատեսին եկել էր բարի լուրով. օրերս Աբովյանի ավագանու արտահերթ նիստում հաստատվել է` այսուհետ կունենան թատրոնի կարգավիճակ: Ի դեպ, գրեթե 2 տարի թատրոնի 6 հոգանոց անձնակազմը պայքարում է այդ խնդրի համար:
Արտաշատի Ամո Խարազյանի անվան պետական դրամատիկական թատրոնը մոտ ժամանակներս կվերանորոգվի, իսկ Գավառի թատրոնը, տվյալ թատրոնի դերասանուհու հուզումնալից ելույթից պարզ դարձավ, որ կործանման եզրին է եղել, այժմ արդեն "փրկվել" է. գրեթե 2 տարի թատրոնը կանգնած էր վերանորգման, սակայն անցյալ տարի թատրոնի շենքում վերանորոգման աշխատանքներ տեղի չեն ունեցել: Փոխարենը, արդեն սկսվել են աշխատանքները, եւ ինչպես հավաստիացրին թատրոնի ղեկավարները` 2016 թվականին թատրոնն արդեն այժմյան մշակույթի պալատի փոխարեն, կգործի նոր շենքում:
Այնուամենայնիվ, մարզային թատրոնների ներկա ղեկավարները եւ թատերական գործիչները խոսելով թատրոնի խնդրից` հիմնականում շեղվում էին ու մարզային թատրոնների անմխիթար վիճակի համար մեղադրում ՀՀ մշակույթի նախարարությանը, իսկ մի մասն էլ` հակադարձում, որ Մշակույթի նախարարությունը աջակցում է հնարավորությունների սահմաններում` տարեկան մեկ պետպատվերով ներկայացումների տեսքով: Մի մասն էլ նշում, որ այդ հարցում պիտի ակտիվ լինեն նաեւ տեղական, մարզային իշխանությունները ու աջակցեն թատրոններին:
ՀԹԳՄ նախագահ Հակոբ Ղազանչյանն ասաց, որ մարզային իշխանությունները սիրով աջակցում են ֆուտբոլին, բոքսին, բայց ոչ թատրոնին: Բացառությամբ մեկ, երկու մարզային իշխանությունների: Այս պարագայում, ինչպես Հ. Ղազանչյանն ասաց, ընդամենը տեղի իշխանությունները պետք է ուզենան լավ թատրոն ունենալ:
Վանաձորի Հ. Աբելյանի անվան դրամատիկական թատրոնի գեղ. ղեկավար Վահե Շահվերդյանն էլ ասաց. "Եթե մեր հանրապետությունն ուզում է, որ հայաթափության հարցն ավելի նվազի, նախ պետք է ուշադրություն դարձնի մարզային մշակութային կյանքին:
Մարզային թատրոնների ղեկավարները հիմնականում նշում էին, որ մայրաքաղաք-մարզեր կապն ամրապնդելու համար, պետք է վերականգնվի երբեմնի բարի ավանդույթը. թատերական փառատոները Երեւանում կենտրոնացնելու փոխարեն անցկացվեն մարզերում: Նրանց պնդմամբ` մարզերում թատերական կյանք չլինելը նպաստում է արտագաղթին, քանի որ ժամը 6-ից հետո մարզերում կյանք չկա: Տիկնիկային թատրոնի գեղ. ղեկավար Ռուբեն Բաբայանը դա բնութագրեց այսպես. "Որքան Երեւանում թատերական կյանքը "պլպլան" է, նույնքան մռայլ է մարզերում":
ՀԹԳՄ նախագահ Հ. Ղազանչյանը ստուգատեսն ավարտեց հետեւյալ կերպ. "Մարզային թատրոններն ունեն մեծ խնդիրներ` երբ թատերախմբերի 99 տոկոսը մասնագիտական կրթություն չունի, ինչի՞ մասին եք խոսում: Եթե գլխավորը դարձնում եք` գումար տան, գնանք այս անենք, այն անենք, որ հետո ասենք` այսքան գործ ենք արել, դա գործ չէ: Ցուցանիշները երբեք չեն կարող որակի գնահատական լինել, թատրոնում պետք է լինի պրոֆեսիոնալ կոլեկտիվ` պրոֆեսիոնալ ստեղծագործական ղեկավարով, հետո մնացած խնդիրները. սա է հարցը":
ԼԻԼԻԹ ԵՂԻԱԶԱՐՅԱՆ
Հավանեցի՞ր հոդվածը, կիսվիր ընկերներիդ հետ
