ՀԱՄԱՅՆՔՆԵՐԸ ԽՈՇՈՐԱՑՆԵԼԸ ՃԻ՞ՇՏ Է
Արխիվ 12-16ՀԱՄԱՅՆՔՆԵՐԸ ԽՈՇՈՐԱՑՆԵԼԸ ՃԻ՞ՇՏ Է
Հայաստանյան համայնքների խոշորացման ծրագիրը ակտիվ ընթացքի մեջ է: Համենայնդեպս, արդեն մայիսի 17-ին կմեկնարկի պիլոտային փուլը, որի շրջանակներում մասնավորապես Տավուշի մարզի Դիլիջան քաղաքում եւ հարակից վեց համայնքներում (Հաղարծին, Թեղուտ, Գոշ, Աղավնավանք, Խաչարձան, Հովք) կանցկացվի հանրաքվե` մեկ համայնքի մեջ միավորվելու հարցով: Թե ինչ ակնկալիքներ ունեն այդ համայնքներում, փորձեցինք ճշտել նրանց ղեկավարներից:Դիլիջանի քաղաքապետ ԱՐՄԵՆ ՍԱՆԹՐՈՍՅԱՆԸ նշեց.
- Իմ կարծիքով, համայնքների խոշորացման ծրագիրը շատ կարեւոր է, եւ այս հարցում մենք ինչ-որ տեղ նաեւ ուշացել ենք: Համոզված եմ, որ խոշորացումից հետո ամեն ինչ ավելի արդյունավետ է օգտագործվելու բոլոր համայնքների համար: Մեզ մոտ յոթ համայնքներում գնալու է խոշորացում, եւ, ըստ նախնական տվյալների, բոլոր դոտացիաները մնալու են, սեփական եկամուտները հավաքագրվելու են, եւ բնականաբար, համայնքի եկամուտները կավելանան, ինչն ավելի արդյունավետ եւ նպատակաուղղված կօգտագործվի: Բնակիչների մոտ արդեն կան ե՛ւ դժգոհողներ, ե՛ւ սառը դատողներ, իսկ թե ինչ է մտածում բնակչության մեծամասնությունը, պարզ կդառնա մայիսին: Խոշորացումից հետո մեզ մոտ լինելու է ընտրություն: Իսկ առհասարակ, Դիլիջանն արդեն որպես յոթ համայնքների միավորում, կունենա որոշակի նոր խնդիրներ: Չնայածª ներկայումս ավելի շատ խնդիրներ ունեն գյուղական համայնքները, քանի որ Դիլիջան քաղաքում այսօր խոշոր ներդրումներ են կատարվում: Խոշորացումից հետո, կարծում եմ, հավելյալ եկամուտները կուղղվեն գյուղական համայնքներին` առկա խնդիրները լուծելու համար:
ՀՀ Տավուշի մարզի Թեղուտ համայնքի ղեկավար ՖՐՈՒՆԶԵ ՆՈՐԵԿՅԱՆՆ ընդգծեց.
- Համայնքների խոշորացման ծրագրով պետք է որ աշխատողների քանակը նվազի, իսկ նրանց տրվող ամբողջ գումարը հավաքվի համայնքի բյուջեում: Եթե մեր համայնքը միավորվի որեւէ համայնքի հետ, բնականաբար, խնդիր կառաջանա բնակիչների շրջանում: Գյուղում արդեն բնակիչները դեմ են խոշորացմանը, քանի որ նախկինում գյուղը միացրած է եղել Շնող գյուղին, իսկ հողաբաժանության ժամանակ առանձնացվել է: Արդյունքումª այսօր Շնողն ունի շատ հողեր, իսկ մեր համայնքը զրկվել է վարելահողից: Հնարավոր է, որ այս ամենը խոշորացումից հետո նորից կրկնվի:
Հաղարծին համայնքի ղեկավար ՍԱՐԳԻՍ ՊՈՂՈՍՅԱՆԸ հակիճ ասաց.
- Համայնքների խոշորացման ծրագրի վերաբերյալ ես ոչ մի ասելիք չունեմ, մեկնաբանություններ անելուց զերծ կմնամ:
Z-PR սոցհարցման կենտրոնը Երեւան քաղաքում 100 հոգու շրջանում կատարել է հարցում`պարզելու համար, թե ինչ կարծիք ունեն բնակիչները` համայնքների խոշորացման ծրագրի վերաբերյալ:
1. Համայնքների խոշորացման ծրագիրը միանշանակ դրական է. անհասկանալի է, ինչո՞ւ պետք է ունենանք մի քանի տասնյակ կամ հարյուր-երկու հարյուր բնակչությամբ համայնքներª շատ ավելի մեծ բնակավայրերի հետ հավասարազոր պայմաններով- 48%:
2. Սպասենք նախնական փուլին, որից հետո միայն ավելի հասկանալի կդառնա, թե ինչքանով է այդ գաղափարը լավ կամ վատ- 34%:
3. Սա փոքր համայնքներին կոչնչացնի, սխալ ծրագիր է-11%:
4. Դժվարանում է պատասխանել- 7%:
ԶՎԱՐԹ ԽԱՉԱՏՐՅԱՆ
Հավանեցի՞ր հոդվածը, կիսվիր ընկերներիդ հետ
