ԹԵՎԱՆ ՊՈՂՈՍՅԱՆ. «ՀԱՅԱՍՏԱՆՈՒՄ ԿԱՆ ՀԿ-ՆԵՐԻ ՂԵԿԱՎԱՐՆԵՐ, ՈՐՈՆՔ ԱՍՈՒՄ ԵՆ`ԱՐՑԱԽԸ ՀԱՆՁՆԵՆՔ ԹՈՒՐՔԵՐԻՆ»
Արխիվ 12-16ԹԵՎԱՆ ՊՈՂՈՍՅԱՆ. «ՀԱՅԱՍՏԱՆՈՒՄ ԿԱՆ ՀԿ-ՆԵՐԻ ՂԵԿԱՎԱՐՆԵՐ, ՈՐՈՆՔ ԱՍՈՒՄ ԵՆ`ԱՐՑԱԽԸ ՀԱՆՁՆԵՆՔ ԹՈՒՐՔԵՐԻՆ»
«Ժառանգություն» կուսակցության առաջնորդ Րաֆֆի Հովհաննիսյանն երեկ ասուլիսով է հանդես եկել եւ անդրադարձել կուսակցության ներսում տիրող լարված իրավիճակին:
Հիշեցնենք` մարտի 12-ին «Ժառանգություն» կուսակցության փոխնախագահ Արմեն Մարտիրոսյանն ու «Ժառանգության» խմբակցության ղեկավար Ռուբեն Հակոբյանը հանդիպել էին նախագահ Սերժ Սարգսյանի հետ եւ քննարկել սահմանադրական բարեփոխումների գործընթացին առնչվող հարցեր: Հանդիպումից անմիջապես հետո «Ժառանգություն» խմբակցության պատգամավոր Զարուհի Փոստանջյանը հայտարարեց, որ կուսակցությունը համաձայն չի եղել հանդիպել Սերժ Սարգսյանի հետ, եւ նրանք, ովքեր հանդիպել են, Բաղրամյան 26-ի հաճախորդներ են: Հանդիպումից չորս օր անց կուսակցության առաջնորդ Րաֆֆի Հովհաննիսյանն ԱՄՆ-ից խոսեց ինքնանպատակ խորհրդակցությունների մասին: Մոտ երկու շաբաթ անց Հովհաննիսյանը վերադարձավ եւ հայտարարեց, որ ինքն է մեղավոր ստեղծված իրավիճակի համար: Այդպես էլ պարզ չդարձավ` ի վերջո, Րաֆֆի Հովհաննիսյանը համաձայնություն տվե՞լ է Սերժ Սարգսյանի հետ հանդիպելու համար, թե`ոչ:
Այս եւ այլ հարցերի շուրջ «Իրավունքը» զրուցեց «Ժառանգություն» խմբակցության պատգամավոր Թեւան Պողոսյանին:
- Պրն Պողոսյան, Ձեր գործընկերներին` Արմեն Մարտիրոսյանին ու Ռուբեն Հակոբյանին համարո՞ւմ եք Բաղրամյան 26-ի հաճախորդներ:
- Ոչ, որովհետեւ երկուսին լավ ճանաչում եմ: Գիտեմ` իրենց բնույթով հաճախորդ չեն:
- Միգուցե Ձեր գործընկեր Զարուհի Փոստանջյանը լավ չի՞ ճանաչում...
- Հարցն ուղղեք Զարուհի Փոստանջյանին, թե ինչքանով է նա ճանաչում:
- Բայց չէ որ ընդամենը մեկ հանդիպումը Սերժ Սարգսյանի հետ պառակտում առաջացրեց խմբակցությունում:
- Ինձ չի թվում, որ երկու հայի հանդիպելուց պառակտումներ պետք է առաջանա: Չմոռանանք, որ ամեն ինչից վեր մենք բոլորս մի երկրի քաղաքացիներ ենք, հայ ենք: Ցանկացած հանդիպում իմաստ է ունենում:
- Րաֆֆի Հովհաննիսյանի վերջին ասուլիսից ի՞նչ տպավորություն ստացաք:
- Չեմ մեկնաբանում իմ գործընկերներին: Րաֆֆի Հովհաննիսյանը կայացած քաղաքական գործիչ է, ով ասել է իր կարծիքն, ու դրանով ամեն ինչ փակված է:
-«Ժառանգություն» խմբակցությունում այս պահին ինչպիսի՞ իրավիճակ է:
-Նորմալ աշխատանքային իրավիճակ է, որեւէ խնդիր չկա:
- ՀԱԿ առաջնորդ, ՀՀ առաջին նախագահ Լեւոն Տեր-Պետրոսյանի` Հայոց ցեղասպանության ուղերձի նախագիծը որեւէ կապ ունի՞ Հայոց պահանջատիրության հետ:
- Դա Լեւոն Տեր-Պետրոսյանի անձնական կարծիքն է: Մի բան պետք է իմանանք` այն քաղաքականությունը, որը վարվել է 1991- 1998 թթ-ին հայ-թուրքական հարաբերություններում արդյունքի իմաստով հանգեցրել է զրո կարգավիճակի: 1998- 2008 թթ. 2008-ից մինչ այսօր էլ զրո արդյունք ունենք: Միգուցե ապագայում նոր մեխանիզմ ունենանք հարաբերությունների կարգավորման համար:
- Արդյոք ճիշտ է հայ-թուրքական հարաբերություններ հաստատել «գրողի ծոցն» ուղարկված արձանագրությունների հիման վրա:
- Ես ասել եմ` եթե նորից նախաձեռնվի հայ-թուրքական հարաբերություններին միտված բանակցություններ, այլեւս այդ թղթերը (նկատի ունի արձանագրությունները-խմբ.) չեն օգտագործվելու:
- Ուղերձի նախագծի հրապարակումից հետո Լեւոն Տեր-Պետրոսյանի նախագիծը համարվեց թուրքական ջրաղացին ջուր լցնելու փորձ: Ի՞նչ կասեք:
- Այսօրվա դրությամբ չեմ ցանկանում ասել, թե ում ջրաղացին ինչ է լցվում: Ըստ իս` մենք պետք է արդյունքը նայենք: Լեւոն Տեր-Պետրոսյանը սա ասել է 1991-1998 թթ-ին: Հիմա ինքը նույնն է ասում, որը նշանակում է` նա հիմա էլ է հավատում այս քաղաքականությանը: Իսկ եթե որեւէ մի հայ որեւէ բանի հավատում է, չի նշանակում, որ դա ծառայեցնում է այլ նպատակի: Այսօրվա դրությամբ քիչ չեն մարդիկ, որոնք կարող են ասել` Արցախն ամբողջությամբ պետք է տանք թուրքերին: Նման ՀԿ-ների ղեկավարներ էլ կան: Հիմա ինչ, ընկնես հետեւների՞ց: Ընդհակառակը, ուրախ կլինեմ, որ մեր հասարակությունն այնպիսինը լինի, որ հնչեն տարբեր կարծիքներ, որի մեջ էլ կլինի մեր ուժը: Արդյոք Տեր-Պետրոսյանի այս առաջարկում կար նորություն, որը ժամանակին չէր հնչել: Ո՛չ, չկա:
- Տեր-Պետրոսյանի ուղերձը քննադատեցին նաեւ այն պատճառով, որ նման պրոթուրքական տեսակետ հայտնում է ՀՀ առաջին նախագահը, որը մեր երկրին պատիվ չի բերում:
- Ես իրականում զարմանում եմ այն մարդկանց վրա, որոնք այսօր պետք է զարմանք ապրեն: 1991-1998 թթ-ին Հայաստանում վարվում էր այս քաղաքականությունը:
- Մտածում էին, որ ընդմիշտ փակվել է այդ էջը:
- Բայց այդ մարդիկ հո չե՞ն վերացել էս երկրից: Նրանք մեր երկրի քաղաքացիներն են, որոնց կարծիքը պետք է հարգենք: Կընդունես, թե`ոչ, դա այլ խնդիր է: Եկեք նայենք դեպի ապագա:
- ՀՀ առաջին նախագահը ԼՂ խնդիրը կապում է հայ-թուրքական հարաբերությունների կարգավորման հետ:
- Ոչ միայն Տեր-Պետրոսյանը, շատ ու շատերն են կապում ԼՂ խնդիրը հայ-թուրքական հարաբերությունների հետ: Իմ կարծիքն այն է, որ ԼՂ խնդիրն ու հայ-թուրքական խնդիրները կապ չունեն իրար հետ, ավելին` Թուրքիան օգտվում է Արցախի խնդրից: Եթե մի պահ պատկերացնենք, որ վաղը լուծվում է Արցախի խնդիրը, Թուրքիան այլ խնդիրներ անպայման կգտնի:
ՍՈՆԱ ԴԱՎԹՅԱՆ
