ՏԵՍՆԵՍ ՎԵՐՋԻՆ ԱՆԳԱՄ, Ե՞ՐԲ Է ՇԱԲՈՅԱՆԸ ԽԱՆՈՒԹ ԿԱՄ ՍՈՒՊԵՐՄԱՐԿԵՏ ՄՏԵԼ
Արխիվ 12-16ՏԵՍՆԵՍ ՎԵՐՋԻՆ ԱՆԳԱՄ, Ե՞ՐԲ Է ՇԱԲՈՅԱՆԸ ԽԱՆՈՒԹ
ԿԱՄ ՍՈՒՊԵՐՄԱՐԿԵՏ ՄՏԵԼ
ՏՄՊՊՀ ղեկավար Արտակ Շաբոյանն ամեն կերպ ցանկանում է համոզել, որ Հայաստանում մենաշնորհներ չկան:
«Իրավունքը» ՏՄՊՊՀ ղեկավարին այս առնչությամբ մի քանի հարց ուղղեց:
-Պրն Շաբոյան, Դուք իրոք հավատո՞ւմ եք, որ Հայաստանում մենաշնորհ չկա:
- Դուք ի՞նչ նկատի ունեք` մենաշնորհ ասելով, ծանոթացե՞լ եք մեր օրենսդրությանը:
- Երբ միայն մեկը կարող է որեւէ ապրանք ներկրել, օրինակ, բանան, ցիտրուսային մրգեր, բենզին եւ այլն:
- Մենք խոսում ենք օրենքի լեզվով: Մենաշնորհն այն է, երբ 100%-ը պատկանում է որեւէ ընկերության: Միակ ոլորտը երկաթուղային տրանսպորտն է, որը պատկանում է «Հարավկովկասյան երկաթուղի» ՓԲԸ-ին:
- Ցիտրուսային մրգերի ներկրումը եւ՞ս մեկին է պատկանում:
- Դա այնդպես չէ: Կան մի քանի ընկերություններ:
- Հիմա մենաշնորհ չկա՞ մեր երկրում:
- Օրենքի լեզվով` ոչ: Կան գերիշխող դիրք զբաղեցնող ընկերություններ:
- Նրանց գործունեության դեմ ինչպե՞ս եք պայքարում:
- Եթե չարաշահումներ կան, պայքարում ենք: Մեր աշխատանքի իմաստը հենց դա է: Մեր գործունեության ծրագիրը կարդացեք:
- Ձեր գործունեության արդյունքը չի երեւում: Վառ ապացույցը պատգամավորների դժգոհությունն են, հարցերը, մամուլի հրապարակումները:
- Բա դուք ինչի՞ չեք տեսնում: Դուք կարդո՞ւմ եք մեր գործունեությունը: Այ որ կարդայիք, էդպես չէիք ասի:
- Ձեր գործունեությունն ու իրականությունը իրար չեն համապատասխանում:
- Դե որ չեք կարդացել, որ տեղյակ չեք…
- Պատգամավորնե՞րն էլ չեն կարդացել:
- Նրանք, ովքեր անիմաստ հարցեր են բարձրացնում, չեն կարդում: Բայց շատերն իհարկե, չեն բարձրացնում անիմաստ հարցեր, այլ տեղին հարցեր են բարձրացնում:
- Զատկից առաջ, գնաճ, գնային չարաշահումների մասին լուրեր են շրջանառվում...
- Գնաճի համար մենք պատասխանատու չենք: Իսկ գնային չարաշահումներ կլինեն, թե ոչ, ապագայի մասին հիմա ո՞նց խոսենք:
- Գրեթե ամեն տարի զատկից առաջ նման խնդիր առաջանում է:
- Կլինեն գնային չարաշահումներ, կպատժենք:
Հ.Գ. ՏՄՊՊՀ նախագահի մոտ գործում է ժողովրդական հայտնի ասացվածքը, դանակը ոսկորին կհասնի նոր կմիջամտենք: Սակայն պարոն Շաբոյանի պատասխաններից պարզ է դառնում, որ ոլորտի պատասխանատուն կամ խանութ չի այցելում, կամ ամենօրյա, համատարած թանկացումները նրա համար գրոշի արժեք ունեն:
ՍՈՆԱ ԴԱՎԹՅԱՆ
