Ա.ԴԵՂՏՐԻԿՅԱՆ.«ՉԿԱ ԱՎԵԼԻ ՄԵԾ ՋԵՐՄՈՒԹՅՈՒՆ ԴԵՐԱՍԱՆԻ ՀԱՄԱՐ, ՔԱՆ ՀԱՆԴԻՍԱՏԵՍԻ ՍԵՐԸ ԵՎ ՋԵՐՄ ԾԱՓԱՀԱՐՈՒԹՅՈՒՆՆ

Ա.ԴԵԽՏՐԻԿՅԱՆ.«ՉԿԱ ԱՎԵԼԻ ՄԵԾ ՋԵՐՄՈՒԹՅՈՒՆ ԴԵՐԱՍԱՆԻ ՀԱՄԱՐ, ՔԱՆ ՀԱՆԴԻՍԱՏԵՍԻ ՍԵՐԸ ԵՎ ՋԵՐՄ ԾԱՓԱՀԱՐՈՒԹՅՈՒՆՆԵՐԸ»

Փետրվարի 14-ին Հակոբ Պարոնյանի անվան երաժշտական կոմեդիայի պետական թատրոնում դերասան Արա Դեղտրիկյանը նշեց ծննդյան 50-ամյակը: Հոբելյանական երեկոյին ներկա էին ՀՀ նախագահ Սերժ Սարգսյանը, մշակույթի նախարար Հասմիկ Պողոսյանը, ԱԺ նախագահ Գալուստ Սահակյանը, փոխնախարարներ, մշակույթի գործիչներ եւ այլ բարձրաստիճան պաշտոնյաներ:

Երեկոն բացեց հոբելյարը`«Ինձնից պրծում չկա» ներկայացմամբ, որի ավարտին հնչեցին բազմաթիվ շնորհավորանքեր`ուղղված դերասանին: «Արա Դեղտրիկյանն իր 30 տարվա ստեղծագործական գործունեության ընթացքում կատարել է բազմաթիվ դերեր, թե′ բեմում թե′ հեռուստատեսությունում: Նրա բոլոր դերերը կատարվել են բարձր պրոֆեսիոնալիզմով եւ արժանացել  հանդիսատեսի բարձր ծափահարությանը»,-շնորհավորելով դերասանի 50-ամյակը նշեց ՀՀ մշակույթի փոխնախարար ԱՐԹՈՒՐ ՊՈՂՈՍՅԱՆԸ եւ Ա. Դեղտրիկյանին պարգեւատրեց մշակույթի նախարարության բարձրագույն բարգեւով`ոսկե մեդալով:

Հ. Պարոնյանի անվան թատրոնի գեղարվեստական ղեկավար Երվանդ Ղազանչյանը վերհիշեց 35 տարի առաջ տեղի ունեցած այն հիշարժան օրը, երբ 6-րդ դասարանի աշակերտ Արա Դեղտրիկյանը գնաց Պատանի հանդիսատեսի թատրոն եւ միանգամից ընդգրկվեց թատրոնի խաղացանկում.«Արայիկը մեր այսօրվա հերոսն է, նա այն բացառիկ դերասաններից էր, ով առաջինը խաղաց Անդրանիկ զորավարի դերը, որին հետեւեցին մի շարք այլ դերեր: Այնուհետեւ բանակ, ինստիտուտ ու կրկին թատրոն, որտեղ մենք ճակատագրով կապվեցինք: Նա փնտրված դերասան է, կարգին մարդ: Շատ եմ ուզում, որ նրա հետ  երկար աշխատենք, քանի որ նա թատրոնում դեռ շատ անելիքներ ունի»,-շնորհավորելով դերասանին նշեց ԵՐՎԱՆԴ ՂԱԶԱՆՉՅԱՆԸ:

Թատերարվեստում մեծ ձեռքբերումների եւ 50-ամյակի կապակցությամբ Հայաստանի թատերական գործիչների միությունը (ՀԹԳՄ) Արա Դեղտրկյանին պարգեւատրեց ՀԹԳՄ ոսկե մեդալով:

Հոբելյանական երեկոյի ավարտին Արա Դեղտրիկյանն իր շնորհակալությունն հայտնեց բոլոր հյուրերին եւ իր սիրելի հանդիսատեսին. «Այսքան շնորհավորանքներ լսելուց հետո  հուզվել եմ, սակայն սա հաճելի հուզմունք է: Երկար տարիներ ծառայել եմ հայ թատրոնում եւ միշտ փորձել եմ ինձ բաժին հասած դերը  պատվով կատարել: Շնորհակալ եմ գեղեցիկ խոսքերի եւ բարեմախթանքերի համար: Շնորհակալ եմ իմ շատ սիրելի հանդիսատեսից, չկա ավելի մեծ ջերմություն դերասանի համար, քան հանդիսատեսի սերը եւ ջերմ ծափահարությունները»,-նշեց ԱՐԱ ԴԵՂՏՐԻԿՅԱՆԸ  եւ նայելով ստացած մեդալներին կատակեց.«Դարձանք Բրեժնեւը»:

ԶՎԱՐԹ ԽԱՉԱՏՐՅԱՆ