Դեպք`«Սլավմեդ»-ում. բժշկական խորհրդատվություն սկայպով են տվել

«Իրավունք»-ը երեկ անդրադարձել է «Սլավմեդ» ԲԿ-ում տեղի ունեցած դեպքին: Աննա Չարչօղլյանը վերոնշյալ ԲԿ-ում այս տարի մարտի մեկին երեխա է ծննդաբերել թթվածնային քաղցով: Հաջորդ օրը երեխայի հարազատները նրան տեղափոխել են «Մուրացան» ԲԿ-ը, քանի որ, նրանց խոսքով, «Սլավմեդ»-ի  մասնագետների անփույթ վերաբերմունքի պատճառով է երեխան հայտնվել այդ վիճակում: Հարազատները իրենց բողոքը  մանրամասն պատմել են լրատվամիջոցներից մեկին, որից հետո սոցիալական ցանցերում ակտիվ քննարկումներ են սկսվել տեղի ունեցածի համար:  

«Իրավունք»-ի հետ զրույցում Աննա Չարչօղլյանի սկեսուրը` Լիանա Չարչօղլյանը, ասաց, որ հղիության ամբողջ ընթացքին եւ դրան հաջորդած դեպքերին ականատես է եղել. «Երգչուհի Արշակյանը նույն ժամանակ ծննդաբերում էր: Նրան սայլակով տանում-բերում էին, դողում էին նրա վրա, իսկ հարսիս վազացնում էին հղի վիճակով: Անգամ  «Սլավմեդ»-ի չորրորդ հարկի սոնոգրաֆիան չէր աշխատում»:

Նրա տեղեկացմամբ  երբ փետրվարի 24-ին հարսին ցավերով տարել են հիվանդանոց, պատրաստված են գնացել` պայուսակով, իրերով: Աննային  բժիշկը` Արմինե Ռուդիկի Մխիթարյանը, ցավազրկող  է նշանակել, երկու րոպե կոնսուլտացիա վարել ու տուն  ճանապարհել: «Երբ  եկանք տուն,  մի փոքր արյուն կար: Զանգեցինք Մխիթարյանին` բժշկուհուն, ասաց, եթե քիչ է արյունը,  ոչինչ: Երբ կշատանա, կանհանգստանք»,- պատմում է մեր զրուցակիցը:

Երեխայի ծնվելուց  հետո տիկին Լիանան տեսել է, որ նորածնին, սավանի մեջ փաթաթած թափահարելով, տարել են, այն դեպքում երբ, ըստ նրա, իրավունք չունեին երեխային  թափահարել: «Նեոանոտոլոգը պետք է լինի նորածնի կողքին, մինչդեռ իմ թոռան կողքին ոչ ոք չկար: Մի նեոնատոլոգ` Լիլիթ անունով,  չորրորդ հարկում վիրահատությամբ էր զբաղված:  Իսկ մյուս նեոնատոլոգը` նորածնային բաժանմունիք վարիչ Հովհաննես Ղազարյանը, որ արտասահմանում էր,  ասել է` մի անհանգստացրեք, երեխան  երկու օրից կարթանանա: Սակայն արդեն մեկ ամիս է մեր երեխան աչք չի բացել»,- մանրամասնում է  Աննայի սկեսուրը:

Երեխային  «Մուրացան» ԲԿ տեղափոխելուց հետո ընդամենը մեկ անգամ  բժշկուհի Մխիթարյանը զանգահարել է երեխայի մորը` Աննային, եւ   ասել`դեղ կխմես, որ կաթդ հետ քաշվի: «Այսինքն`  գիտեն ինչ աստիճանի են  հասցրել երեխային, որ  նրան կաթ պետք չի գա»,- վրդովված ասաց տիկին Լիանան:

«Սլավմեդ» ԲԿ-ի մասնագետները, «Իրավունք»-ի հետ զրույցում, բնականաբար, հերքեցին Չարչօղլյանների մեղադրանքները` արնահոսություն չի եղել, ցավազրկող դեղեր չեն նշանակել, արգանդը լարված չի եղել: Նորածնի կողքին էլ եղել են երեք նեոնատոլոգներ: Սոնոգրաֆիայի ապարատն աշխատել է: «Փետրվարի 29-ի հաջորդ օրը` առավոտյան, Աննայի տանը պտղաջրերն արտահոսել են: Նա եկել է «Սլավմեդ» նորմալ վիճակում:  Պտղի սրտի զարկերի իջեցում է եղել: Որպեսզի ես դա հաստատեմ, կատարվել է ՈւՁՀ  հետազոտություն, որը հաստատել է  սրտի զարկերի իջեցումը: Դրանից հետո շատ արագ տեղափոխել ենք վիրահատարան, որտեղ կատարվել է կեսարյան հատում, դուրս է բերվել կենդանի, բայց շատ ծանր վիճակում երեխա` թթվածնային քաղցով»,- «Իրավունք»-ի հետ զրույցում ասաց  Աննայի բժշկուհին` Արմինե Մխիթարյանը:

Բժշկուհին նորմալ է համարում, երբ ինն ամսական հղի կնոջը չորրորդ հարկից ոտքով իջեցնում են առաջին հարկ, քանի որ «ծանր վիճակ աղջկա մոտ չի եղել, նա չի արնահոսել»:

Ծննդատան վարիչ Վարդան Ռափյանն էլ մեզ հետ զրույցում հերքեց նաեւ մեղադրանքը, թե հարազատները երեխային կռվով են տարել «Մուրացան» ԲԿ: «Ինչքան սավանի մասին են ասում, այնքան էլ կռիվ դավի, չի եղել  նման: Իսկ սավանի մասին որ ասում են, դա  սավան չի, տակաշոր է, որով երեխային տեղափոխել են»,- ասաց վարիչը:

 Լրատվամիջոցը գրել էր, որ սա առաջին դժբախտ դեպքը չէ «Սլավմեդ»-ում: Ի պատասխան` «Իրավունք»-ին բժշկուհի Մխիթարյանն ասում է.

«Դաժե եթե եղել են, դա չի նշանակում մեղավոր է բուժանձնակազմը»:

Վարդան Ռափյանն էլ հավելում է. «Ունեցել ենք հազար ծննդաբերություն, որից երեքն է  ներարգանդային խնդրով դեպք»:

Մինչդեռ «Իրավունք»-ի հետ զրույցում նորածնային բաժանմունքի վարիչ Հովհաննես Ղազարյանը  արծես հակառակն է ասում. «Նախկինում նման դեպք «Սլավմեդ» ԲԿ-ում չի եղել: Անգամ մանկական մահացության դեպք չի արձանագրվել: Կարող ենք անկետաներով ստուգել`  2014  փետվարի  21-ից  մինչեւ ապրիլի մեկը նորածին չի մահացել»:

Ղազարյանը ծննդաբերության օրը եղել է արտասահմանում` սեմինարի, բայց տեղյակ է եղել`  ինչպիսի իրավիճակում է Աննան: «Մեկուկես օր երեխան «Սլավմեդ»-ում է եղել: Չորս- հինգ ժամ խոսել եմ սկայպով, հեռախոսով, ինտերնետային մյուս հնարավորություններով, ծանոթ եմ եղել անալիզներին, կանխատեսումներին: Խոսել եմ ինձ փոխարինողի հետ: Այն, ինչ տեղի է ունեցել  նորածնի հետ, բժշկական ֆորսմաժորային իրավիճակ է, ոչ թե դժբախտ դեպք, ինչպես գրել էին: Դժբախտ դեպքն է այն է, որ մարդուն մեքենայի տակ են գցում: Եթե երեխայի ծնողները գոհ չեն եղել մեզանից, չնայած մենք արել ենք ամեն ինչ,  ապա դժգոհ էլ չպետք է լինեն,  քանի որ երեխայի վիճակը չենք վատացրել»,- մանրամասնում է  բժիշկը:

Պրն Ղազարյանը կարծում է`  ինչ-որ մեկին պետք էր այս աղմուկը. «Մարդկանց վիշտն օգտագործում են էժան «աչոկներ» հավաքելու համար»:

Թե ովքեր են օգտագործու այդ մարդկանց վիշտը, բժիշկը խաղաքարտերը չի բացում. «Միգուցե կարող է մեկից ավելի մարդ կամ կազմակերպություն լինել, քանի դեռ չենք հասկացել ովքեր են, անուններ չենք կարող տալ»:

Աննայի սկեսուրը` Լիանա Չարչօղլյանը, սակայն, հերքում է, իրենց վիշտն այլք օգտագործում են սեւ փիառի համար:

Ինչո՞ւ է երեխան հայտնվել ծայրահեղ ծանր վիճակում,  ինչո՞ւ է  արձանագրվել թթվածնային քաղց, «Սլավմեդ»-ի մասնագետները դժվարանում են ասել:  Սակայն հարց է առաջանում` եթե  «Սլավմեդ»-ի մասնագետներն արել են ամեն ինչ պատշաճ մակարդակով, ինչու անմիջապես հերքման հայտարարություն չեն տարածել Չարչօղլյանների բողոքից հետո:  «Սա շուկա չէ, այլ հիվանդանոց: Մեր մասնագետները չեն պատրաստվում աշխատել այս երկրում ընդունված վատ կանոնակարգերի համաձայն: Երբ մեղադրանք առաջադրվի,  հիմնավորումներ լինեն, նոր կարձագանքենք»,- ասաց Ղազարյանը: Իսկ Վարդան Ռափյանն էլ  հավելեց. « Ոչ առաջին անգամ է, ոչ վերջին, մարդիկ բողոքել են: Թե երբ ենք պլանավորում մեր հերքումը, մենք ենք որոշում»:

 Ինչ քայլեր է ձեռնարկելու առողջապահության նախարարությունը: Առողջապահության նախարարության մոր եւ մանկան առողջապահության վարչության պետ Կարինե Սարիբեկյանն ասաց, որ  նախարարությունը միջամտում է այն դեպքում, երբ գրավոր բողոք  է ստանում երեխայի  օրինական ներկայացուցչից,  իր ձեռքի տակ ունենում փաստեր դեպքի վերաբերյալ:  

Սոնա Դավթյան