Ինչպե՞ս մաքրել մաստակը հագուստի վրայից. հանճարեղ եղանակ

Որքան էլ անհապաղ ու զգուշորեն փորձենք հեռացնել զգեստին կպած մաստակը, այնուամենայնիվ, նրա հետքերը ամբողջովին վերացնել չի հաջողվում: Ճիշտ է՝ այս պարագայում քիմմաքրումը ամենահեշտ տարբերակն է, բայց գումարը խնայելու համար կարելի է հարցը լուծել տնային պայմաններում: Ջինսերի վրայից հետքերը կարելի է մաքրել եռացնելու մեթոդով: Կեղտոտված մասը դնել եռացող ջրի մեջ, սպասել միչև ջուրը հովանա, և քերել մաստակը սուր առարկայի, օրինակ՝ դանակի միջոցով: Այնուհետև տրորել կտորը, մինչև մաքրվելը:

Արդյունավետ միջոց է նաև բենզինը: Կեղտոտված մասին լցնել մի քիչ բենզին: Այն կմաքրի մաստակը, իսկ նրա տհաճ հոտը կվերանա օճառաջրով մաքրելուց հետո: Բենզինը կարելի է փոխարինել ալկոհոլով կամ ացետոնով:

Կարելի է կիրառել նաև սառեցնելու մեթոդը: Զգեստը դնել տոպրակի մեջ՝ մաստակի կպած մասը վերևում, և տեղադրել սառցախցիկում: Սպասել մինչև կտորը սառչի, հանել և սուր դանակով հեռացնել սառած մաստակը:

Արդյունավետ է նաև հակառակ՝ ջերմային մեթոդը: Կտորը կեղտոտված մասով դնել անձեռոցիկի վրա և արդուկել՝ մինչև մաստակը կպչի անձեռոցիկին:

Կարելի է կիրառել նաև քացախ, բայց ոչ նուրբ կտորների պարագայում: Տաքացնել քացախը, ատամի խոզանակը թրջել նրա մեջ և դրանով մաքրել մաստակը մինչև վերջնական մաքրվելը: