Այս ձևաչափը կարող է դառնալ նոր մշակույթ. Ջիվան Գասպարյանը՝ նոր նախագծի մասին

Շուրջ կես տարի, պայմանավորված COVID-19-ով, Հայաստանում հատկապես մշակութային ոլորտը պարտադրված պարապուրդի մեջ էր: Փակ էին թատրոնները, համերգասրահները, ռեստորանները, չեղարկվել էին ներկայացումներն ու համերգները, ռեստորաններում՝ շոու ծրագրերը:

Ոմանց համար այս պարապուրդը ֆինանսական աղետ ստեղծեց, ոմանց համար՝ հնարավորություն՝ հանդես գալ նոր նախաձեռնությամբ:

Դուդուկահար Ջիվան Գասպարյան կրտսերն, ով այս ամիսների ընթացքում գործունեությունը շարունակել է իր տանը գտնվող ձայնագրման ստուիդիայում, այժմ պատրաստվում է առցանց համերգներով հանդես գալ: Բեմահարթակն արդեն պատրաստ է: Օնլայն հարթակում Ջիվան Գասպարյան կրտսերի և ընկերների կատարումները դիտելու համար կսահմանվի սիմվոլիկ գումար, հնարավոր է՝ մոտ 500 դրամի չափ, հասույթն էլ վերջում կտրամադրվի բարեգործական նպատակով:

«500-ն առավելագույն չափն է, ցանկանում եմ՝ յուրաքանչյուր օնլայն հանդիսատես իր ընտրությամբ՝ 100-500 դրամ վճարի ու վայելի կատարումները: Այսկերպ ուզում եմ ինչ-որ բանով օգտակար լինել համավարակի պատճառով տուժած արվեստագետներին, նաև՝ բանակին: Այս ձևաչափը կարող է դառնալ մի նոր մշակույթ, ու ցանկացած ճգնաժամի դեպքում երաժիշտները գոնե ապահովագրված կլինեն պարապուրդից, ի վերջո, երաժիշտի եկամտի աղբյուրը բեմն է, միջոցառումները: Ճիշտ է՝ հանդիսատեսի հետ անմիջական շփումը տուժում է, բայց պայմաններն այս են, ի՞նչ կարող ենք անել», - Aysor.am-ի հետ զրույցում նշեց նա: 

Առցանց համերգի ժամանակ «օնլայն բեմում» կլինեն տարբեր երգիչներ և երաժիշտներ: Հավանական է, որ առաջին համերգը ժողգործիքների ուղեկցությամբ կլինի: Նկատում է՝ ուրախ կլինի, եթե լինեն մարդիկ, ովքեր պատրաստ են ներգրավվել իրենց թիմում ու աջակցել կազմակերպչական այլ հարցերում:

Ի դեպ, պարտադրված պարապուրդը ևս մեկ նորարարություն է թելադրել. երաժիշտը վաճառքի համար դուդուկի տեսքով USB կրիչներ է արտադրել, որոնք պատրաստվում են ծիրանի փայտից: Դրանց վրա ձայնագրված են Ջիվան Գասպարյանի կատարմամբ 50-ից ավելի ստեղծագործություններ:

Կրտսեր Գասպարյանն այս ընթացքում Հայաստանի սահմաններից դուրս նախատեսված շուրջ 50 համերգ է չեղարկել: Հոկտեմբեր-նոյեմբեր ամսիներին էլ ԱՄՆ-ում և Փարիզում ելույթներ ունի, սակայն դեռ չգիտի՝ դրանք ինչ ճակատագիր կունենան: 

Աղբյուր`https://www.aysor.am/am/news/2020/09/02/%D5%8B%D5%AB%D5%BE%D5%A1%D5%B6-%D4%B3%D5%A1%D5%BD%D5%BA%D5%A1%D6%80%D5%B5%D5%A1%D5%B6/1736685?fbclid=IwAR17sXoXnWf0PAxwbnkL4dY6Fx9jm_fa6SAfTLrARvDAMWBXlIOmzVAfaLY

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝