Գիտնականները նշել են՝ որն է մաշկի երիտասարդացման համար ամենակարևոր վիտամինը

Ծերացումը բնական գործընթաց է, որից հնարավոր չէ խուսափել, սակայն կան արդյունավետ միջոցներ այդ գործընթացը հնարավորինս դանդաղեցնելու և անգամ ծերացած մաշկը վերականգնելու համար։ Գերմանացի գիտնականների հետազոտությունը ցույց է տվել, որ մարդու սննդակարգի ու մաշկի ծերացման միջև կա ակնհայտ կապ, ուստի ճիշտ մթերքի գործածությունը կօգնի խուսափել վաղաժամ ծերացումից։ Մասնագետների խոսքով՝ մաշկի տոնուսը վերականգնող ու հյուսվածքները երիտասարդացնող լավագույն սննդային բաղադրիչներից մեկը վիտամին А-ն է, որի բավարար քանակությունը սննդակարգում թույլ կտա պահպանել մաշկի երիտասարդությունը։\

Դեսաուի բժշկական կենտրոնի և Կլինիկական դեղագիտության ու թունագիտության ինստիտուտի գիտնականների տվյալներով՝ վիտամին А-ն արդյունավետ կերպով կանխում է ուլտրամանուշակագույն ճառագայթների ազդեցության հետևանքով մաշկի ծերացման արտաքին նշանների ի հայտ գալը։ Նման ազդեցությունը պայմանավորված է նրանով, որ այս վիտամինը բարելավում է մաշկի բջիջների պաշտպանությունը վնասվածքներից։

Բացի այդ, այս վիտամինն օգնում է ամրապնդել իմունային համակարգը, ինչը դրական ազդեցություն է ունենում սրտամկանի, թոքերի ու երիկամների աշխատանքի վրա՝ այդ կերպ բարելավելով նաև մաշկի վիճակն ու նպաստելով դրա երիտասարդացմանը։ Սա է պատճառը, որ մասնագետները խորհուրդ են տալիս հարստացնել սննդակարգը վիտամին А-ով հարուստ մթերքով։

Այս տարրը մեծ քանակությամբ պարունակվում է լյարդից պատրաստված պաշտետի, պանրի, հավկիթի, յուղոտ ձկների, կաթի, յոգուրտի, դեղին մրգերի, ինչպես նաև դեղին, կարմիր, նարնջագույն բանջարեղենի ու տերևավոր բանջարեղենի մեջ։ Դրանով հարուստ մթերք չօգտագործելու դեպքում վիտամինը կարելի է ընդունել նաև հավելումների տեսքով, սակայն մասնագետները նախազգուշացնում են, որ օրական այս վիտամինի ընդհանուր քանակությունը չպետք է գերազանցի 1500 մկգ-ը, քանի որ դրա ավելցուկը խիստ բացասաբար է անդրադառնում ոսկորների, լյարդի և այլ օրգանների վրա։

Նյութի աղբյուրը՝ medikforum.ru