​​​​​​​Էդգար Շաթիրյանը արդյոք ՍԴ անդամի «Իմ քայլի» «սրտի» թեկնածուն է

Թեպետ Կառավարությանը երկու օր է մնացել, որ ներկայացնի ՍԴ դատավորի իր թեկնածուին, սակայն այս հարցն անգամ չի քննարկվել այսօր կայացած իմքայլականների նիստի ժամանակ, որին ներկա է եղել նաեւ ՀՀ վարչապետ Նիկոլ Փաշինյանը: Համենայնդեպս, ԱԺ «Իմ քայլը» խմբակցության ղեկավար ԼԻԼԻԹ ՄԱԿՈՒՆՑԸ լրագրողների հետ զրույցում վստահեցրեց, որ այս հարցին անդրադարձ չի եղել: Այնուհանդերձ, թե ինչով էր պայմանավորված, որ դեռեւս չառաջադրված ՍԴ դատավորի թեկնածու Էդգար Շաթիրյանի հետ «Իմ քայլը» խմբակցությունը հանդիպում է ունեցել եւ աևդյոք սա նշանակում է, որ իմքայլականների «սրտի» թեկնածուն հենց նա է, Լ. Մակունցը պարզաբանեց. «Իմ քայլը» խմբակցությունն էթիկապես ճիշտ չի համարում դիրքորոշում ներկայացնել, առավել եւս, որ քվեարկությունները լինելու են  փակ եւ գաղտնի ու պատգամավորներն իրենք են իրենց դիրքորոշումը փակ եւ գաղտի քվեարկությամբ ներկայացնելու: Այնպես որ, Շաթիրյանը նախ դեռեւս ներկայացված չէ, որպես կառավարության թեկնածու, եւ երկրորդ՝ որեւէ թեկնածու ներկայացնելու պարագայում  մենք ճիշտ չենք համարում դիրքորոշում հայտնել,  եւ այն տեղի ունենալ չի կարող»:

Այս դեպքում՝ ո՞րն էր իմաստը նման հանդիպման Շաթիրյանի հետ, ԱԺ «Իմ քայլը» խմբակցության ղեկավարը այսպես մեկնաբանեց. «Քանի որ դիտարկվում է պարոն Շաթիրյանի թեկնածությունը, որպես հնարավոր  թեկնածու, որը կարող է ներկայացնել կառավարությունը, «Իմ քայլը» խմբակցությունը տեղեկանալով այդ մասին, նպատակահարմար համարեց հանդիպել պարոն Շաթիրյանի հետ: Կային հարցեր, որոնք նախկինում առաջացել էին՝ պայմանավորված Բարձրաստիճան պաշտոնատար անձանց էթիկայի հանձնաժողովի անդամ լինելուց պարոն Շաթիրյանի հրաժարվելու հետ: Այդ առնչութմամբ հարցեր կային եւ «Իմ քայլը» խմբակցությունն առաջարկեց հանդիպում կազմակերպել նրա հետ, ինչը եւ արվեց»:

Ի դեպ, Լ. Մակունցը նաեւ նշեց, որ ՍԴ դատավորների ընտրության հարցով ԱԺ արտահերթ նիստ դժվար թե լինի. «Որքանով տեղյակ եմ, արտահերթ նիստ չի նախատեսվում: Եթե դրա անհրաժեշտությունը լինի, ԱԺ նախագայի նախաձեռնությամբ այդ նիստը կհրավիրվի: Բայց այս պահի դրությամբ՝ այն տեղեկատվությունը, որը ես ունեմ, արտահերթ նիստ չի նախատեսվում»:

ՀՐԱՆՏ ՍԱՐԱՖՅԱՆ