ՀԵՐՈՍ ԱԴԱՄ ՍԱՀԱԿՅԱՆԻՆ ՆՎԻՐՎԱԾ ԱՆԳԼԵՐԵՆ ԳՐՔԵՐԸ ՄԵԾ ՀԱՋՈՂՈՒԹՅՈՒՆ ՈՒՆԵՆ

Ապրիլյան պատերազմի մասնակից, Արցախի պաշտպանության բանակի զինծառայող, սերժանտ Ադամ Սահակյանը կդառնար 24 տարեկան:

Մեր օրերի հերոսի մասին բազմիցս ինչպես Հայաստանում, Արցախում, այնպես էլ Սփյուռքում գրվել են հայրենասիրական հոդվածներ, հուշեր հաղորդումներ ու փաստավավերագրական ֆիլմեր են նկարահանվել, սակայն որպես գեղարվեստական կերպար այն ներկայացնում է սիրված մտավորական, գրող Սամվել Բիշարյանն իր երկու «Hello Adam» («Ողջույն Ադամ») եւ «The Brave Eagle» («Խիզախ Արծիվ») վերնագրված գրքերում: Մի քանի խոսքով ներկայացնեմ գրքերը: «Hello Adam» («Ողջույն Ադամ») գիրքը առաջինն է` նվիրված հերոսին: Երկու տասնյակից ավելի անգլերեն ու հայերեն գրքերի հեղինակ Բիշարյանը փաստում է` գիրքն անգլերեն է գրել, որպեսզի այն հասնի նաեւ օտարերկրյա ընթերցողներին, եւ որ ամբողջ աշխարհում ճանաչեն մեր հերոսներին: Գիրքը բաղկացած է տասնմեկ պատմվածքներից: Դրանցից յոթը քառօրյա պատերազմի հերոս Ադամ Սահակյանի մասին է: Պատմվածքներից մի քանիսը վերաբերում են Ադամ Սահակյանի կյանքի` մինչ Ապրիլյան պատերազմը ընկած ժամանակահատվածին: Ադամը հանդես է գալիս որպես գործող կերպար եւ իր դրական վարքագծով վառ օրինակ է շատ- շատերի համար: Նրանք, ովքեր ճանաչել են Ադամին մինչեւ 2016 թվականին քառօրյա պատերազմի հերոս դառնալը, նշում էին, որ նա աչքի էր ընկնում իր արդարամտությամբ, անկեղծությամբ, քաջությամբ, տեսողական վառ հիշողությամբ եւ արագ կողմնորոշվելու ունակությամբ: Նա խորին հարգանք էր տածում տարեցների նկատմամբ եւ ակնածանքով էր վերաբերվում իրեն շրջապատող աղջիկներին: Ադամը նման էր հեքիաթային մի հերոսի, եւ բոլոր աղջիկները սիրահարվում էին նրան: Պատմվածքները խորությամբ ըմբռնելու եւ երիտասարդ սերնդի անգլերեն լեզվամտածողությունն ավելի զարգացնելու համար պատմվածքների վերջում հեղինակը զետեղել է մի առանձին բաժին, որի նպատակն է ստուգել ձեռք բերված գիտելիքները: Գրքի վերջում կա բառարան, որը կօգնի ընթերցողներին իմանալ անծանոթ բառերի նշանակությունը: Իսկ ահա «Խիզախ Արծիվը» վերնագրով, Ապրիլյան պատերազմի հերոս Ադամ Սահակյանի մասին երկրորդ գիրքն է: Այն ավելի շուտ փաստավավերագրական բնույթ ունի: Բաղկացած է ութ գլխից: Առաջին գլուխը կոչվում է «Հեղինակի մեկնաբանությունները Ադամ Սահակյանի ու նրա ընտանիքի մասին»: Այստեղ հեղինակը հանգամանորեն քննարկում է շատ հետաքրքիր հարցեր` կապված Ադամի ու նրա ընտանիքի հետ: Հաջորդ` երկրորդ գլուխը կոչվում է «Պահապան հրեշտակը»: Այն իր հերթին բաժանվում է երկու ենթավերնագրերի` «Իրական դեպք» եւ «Սիրահարների այգում»: Եթե առաջինում Ադամն աչքի է ընկնում իր քաջ պահվածքով, երկրորդում մենք տեսնում ենք Ադամին իր սիրած աղջկա հետ այգում զբոսնելիս, իր քնքուշ վերաբերմունքով իր սիրեցյալի` Անուշի հանդեպ: Անկեղծ ասած, իրականում Ադամը ընտրած աղջիկ չի ունեցել, սակայն հեղինակը, խորհրդակցելով Ադամի մոր հետ եւ ստանալով նրա թույլտվությունը, կերտել է, այսպես ասած, սիրո մի պատմություն, որտեղ Ադամն ու Անուշը խելագարի պես սիրում են իրար: Նրանք միմյանց համար բանաստեղծություններ են կարդում ու ավելի բորբոքում իրենց սիրո անմար կրակը: Երրորդ գլուխը կոչվում է` «Հիշողությունների շղթա»: Այն բաղկացած է երեք ենթավերնագրերից` «Լույս եւ խավար», «Զինվորական գերեզմատանը» եւ «Սպասված հանդիպում Ադամի ծնողների հետ»: Չորրորդ գլուխը կոչվում է «Մարդիկ, ովքեր խոսում են Ադամի մասին մինչ ապրիլյան պատերազմը»: Հինգերորդ գլխում խոսվում են Ադամի գրաֆիկական աշխատանքների մասին, որի ցուցահանդեսը բացվեց Ալեքսանդր Թամանյանի անվան սրահում 2016 թվականի նոյեմբերին, անսպասելի հեռախոսազանգի մասին, բանաստեղծությունների մասին` նվիրված Ադամին եւ ուրախ մանկության մասին: Վեցերորդ գլուխը վերաբերում է «Ողջույն Ադամ» գրքին ու այդ գրքի շնորհանդեսին: Յոթերորդ գլուխը անվանվել է «Խիզախ արծիվը»: Այս գլխում Ադամի պատմության ուսուցչուհին հավաքում է բարձր դասարանցիներին ու նրանց հետ զրուցում է Ադամի մասին: Ութերորդ գլուխը կոչվում է «Երեխաները Ադամ Սահակյանի մասին»: Գիրքն ընթերցվում է մի շնչով: Այն գովեստի խոսքերի է արժանացել մի շարք արտասահմանյան ընթերցողների կողմից, դե էլ չեմ ասում` մեր տեղացի ընթերցողների: Հավերժ փառք ու պատիվ մեր հայոց բանակին ու բոլոր հերոսներին եւ հերոսածին մայրերին:

ԳԱՐԻԿ ԱՎԵՏԻՍՅԱՆ