Երկրպագուները՝ Հարավ-Արևմտյան թաղամասից

Նախկին «Բանանց», ներկայիս ` «Ուրարտու» ՖԱ-ի ֆան ակումբ «South West Ultras-ը» ևս երկար պատմություն չունի։ Այն ստեղծվել է 2019 թվականի մարտին և այժմ իր անվան ներքո համախմբել է շուրջ 30 ֆուտբոլասերների։

Երևանյան թիմի մի քանի երկրպագուներ , որոնք տարիներ շարունակ եղել են սիրելի թիմի կողքին, պարզապես ցանկացել են համախմբել ակումբի բոլոր երկրպագուներին և ներկայանալ ֆան-ակումբի կարգավիճակով։

Ֆան-ակումբի անվանումը ուղղակիորեն կապված է ակումբի տեղանքի հետ։ «Ուրարտուի» ակադեմիան գտնվում է Հարավ-Արևմտյան թաղամասին կից , այդտեղից վերցված է «South West-ը», իսկ Ultras-ն ինչպես տղաներն են նշում հատուկ է ընտրված, քանի որ ակումբում բոլորը երկրպագուների Ultras ուղղվածության համակիրներ են։

Աղջիկ անդամներ ևս եղել են, սակայն այժմ միայն տղաներ են, որոնք մշտապես ներկա են գտնվում «Ուրարտուի» և՛ տնային, և՛ արտագնա հանդիպումներին։

Հիշարժան դեպքեր շատ են ունեցել, որոնցից առանձնացնում են սերբական «Չուկարիչկիի» հետ տնային և արտագնա հանդիպումները։ Երևանում կայացած հանդիպման վերջում ֆան-ակումբը ակցիա է իրականացրել և տրիբունայում ցուցադրել Սերբիայի քարտեզը, որտեղ ներառված է եղել նաև Կոսովոն։ Ակցիան մեծ ուշադրության է արժանացել Եվրոպայում և հատկապես` Սերբիայում։

Արտագնա հանդիպմանը ֆան-ակումբից ընդամենը երեք անդամ է կարողացել ներկա գտնվել, սակայն տղաները կարողացել են համախմբել տեղի հայկական համայնքին և միասին մարզադաշտում երկրպագել են իրենց հարազատ թիմին։

«South West Ultras-ը» նաև շատ հարցերում համագործակցում է ակումբի ղեկավարության և ֆուտբոլիստների հետ։ Միասին հաճախ միջոցառումներ և քննարկումներ են կազմակերպվում, որոնք նպաստում են ակումբի և ֆան-ակումբի զարգացմանը։

Ֆան-ակումբի մասին պատմեց «South West Ultras-ի» անդամ Սարգիս Վարդերեսյանը։

Պատրաստեց` Լիանա Հարությունյանը