Երիտասարդ անիմատորների վերապատրաստման համար սահմանվել է երկու կրթաթոշակ

«ՌեԱնիմանիա» Երեւանի միջազգային անիմացիոն կինոյի  եւ պատկերապատման արվեստի փառատոնից հայտնում են, որ «ՔԱՍՍարտ փրոդաքշնի» եւ Անգուլեմի անիմացիոն դպրոցի համագործակցության արդյունքում այս տարի 2 կրթաթոշակ է սահմանվել երիտասարդ անիմատորների վերապատրաստման համար։

Առաջին կրթաթոշակը հնարավորություն է տալիս 2017թ. հունվարին 1 ամսով վերապատրաստման դասընթացի մեկնել Անգուլեմի անիմացիոն դպրոց։ Դասընթացի շրջանակում կուսուցանվի ավանդական 2D անիմացիա, CG 2D, 3D, stop motion, cut animation եւ այլ անիմացիոն հմտություններ։ Հայաստանյան մասնակիցը կմիանա մի խումբ երիտասարդ անիմատորների, որպեսզի 1 րոպե տևողությամբ անիմացիոն ֆիլմ ստեղծի. դասընթացը վարող մասնագետների վերահսկողությամբ որեւէ թիմի միանալու կամ ինքնուրույն աշխատելու ընտրությունը մնում է երիտասարդի հայեցողությանը։

ԶՎԱՐԹ ԽԱՉԱՏՐՅԱՆ

Երկրորդ կրթաթոշակը հնարավորություն է տալիս 2017թ. մայիս և հունիս ամսիներին  1,5 ամսով վերապատրաստման դասընթացի մեկնել Անգուլեմի անիմացիոն դպրոց։ Դասընթացի շրջանակում կուսուցանվի ավանդական 2D անիմացիա։

«ՌեԱնիմանիա» երիտասարդ անիմատորների վերապատրաստման դասընթացի կրթաթոշակին կարող են դիմել 18-26 տարեկան բոլոր ցանկացողները:

Կրթաթոշակին կարող են դիմել եւ ուսման մեկնել բացառապես ՀՀ քաղաքացիներ՝ միայն «ՌեԱնիմանիա» փառատոնի միջոցով ու երաշխավորությամբ։ Ընտրված մասնակիցները պետք է  ունենան իրենց անձնական համակարգիչները, իսկ դասընթացի համար անհրաժեշտ մյուս  բոլոր պարագաները կտրամադրի Անգուլեմի անիմացիոն դպրոցը։ Բացի այդ, մասնակիցները պարտավորվում են հոգալ միայն իրենց մուտքի արտոնագրի եւ կեցության ծախսը։

Դիմումները կընդունվեն Սեպտեմբերի 28-ից Հոկտեմբերի 25-ը ներառյալ։ Կրթաթոշակներին դիմած երիտասարդները պարտավոր են ներկա գտնվել փառատոնի փակման արարողությանը, որի ժամանակ էլ կհայտարարվեն կրթաթոշակին արժանացած երիտասարդ անիմատորների անունները։