ԵՐՐՈՐԴ ՆԱԽԱԳԱՀԻ ԱՍՈՒԼԻՍՆ ՈՒՆԵՐ ԲԱԶՈՒՄ ՄԵՍԻՋՆԵՐ

«Իրավունք» TV-ի տաղավարում հյուրընկալել էինք մեդիա փորձագետ, ՀՀԿ երիտթեւի անդամ ՀԱՅԿ ԴԵՐԶՅԱՆԻՆ: Հիշեցնենք, որ օգոստոսի 19-ին ՀՀ երրորդ նախագահ Սերժ Սարգսյանը հանդես եկավ մամլո ասուլիսով, իսկ թեման Ապրիլյան պատերազմն էր: Այս առիթով հարցեր ուղղեցինք երիտասարդ հանրապետականին:

– ՀՀ 3-րդ նախագահ Սերժ Սարգսյանի ասուլիսը մեծ աղմուկ բարձրացրեց ոչ միայն հայաստանյան իշխանությունների շրջանում, այլ նաեւ` մեր թշնամի Ադրբեջանի: Ինչո՞ւ նախագահը որոշեց խոսել հիմա եւ խոսել հենց Ապրիլյան պատերազմի թեմայով:

– Մի քանի ամիս առաջ նախագահը հայտարարեց, որ հանդես կգա մամլո ասուլիսով արտակարգ դրության ավարտից հետո: Սակայն,  այս ապաշնորհ կառավարության գործելաոճի, կորոնավիրուսի դեմ վատ պայքարի պատճառով արտակարգ դրությունը շարունակվեց: Եվ սպասել նրան, թե երբ կավարտվի արտակարգ դրությունը, դառնում էր անիմաստ, եւ հենց իր ասուլիսում էլ նախագահը նշեց այդ մասին: Պետք է հպարտությամբ նշեմ, որ Ապրիլյան պատերազմում, այո, մենք ունեցել ենք հաղթանակ, բայց պարտվել ենք ներքին թշնամուն, որի անունն էր մեդիամանիպուլյացիա: Իսկ որ ամենավատն էր` ադրբեջանական պրոպագանդան առաջ մղելն էր մեր երկրում: Վերջիններս պետական շահը ստորադասել էին քաղաքականին: Սա այս տարիների ընթացքում ամենալայնամասշտաբ պատերազմն էր, չնայած որ տեւեց 4 օր, եւ հաշվի առնենք, որ թշնամին  կիրառեց իր ողջ տեխնիկան, սակայն մենք հաղթեցինք, բայց պարտվեցինք ներքին դաշտում, ովքեր, հենվելով իրենց քաղաքական շահերին, ցանկություններին փորձեցին ադրբեջանական պրոպագանդան առաջ տանել եւ հասնել ինչ-որ արդյունքի: Ուստի` սա եղավ պատճառը, որ նախագահը որոշեց եւս մեկ անգամ չորս տարի անց խոսել այդ պատերազմից եւ հատ առ հատ հերքել բոլոր այն կեղծիքները, որոնք նշվել են այս տարիների ընթացքում:

– Հնչեցին բազում հարցեր, որոնց նախագահը տվեց հանգամանալից եւ հստակ պատասխաններ: Սակայն դեռ շարունակվում են քննադատությունները: Կարելի՞ է ասել, որ նույն քարոզչամեքենան այսօր էլի շարունակում է իր սեւ գործը:

– Կարծում եմ` դուք` որպես լրագրող, եւս գիտեք, որ ցանկացած հերքում շատ ավելի քիչ է տարածում ունենում, քան այն տեղեկատվությունը, որը տարածվում է ի սկզբանե: Բնականաբար քարոզչամեքենան կանգ չի առել եւ շարունակում է իր գործը: Ասեմ ավելին` ԱԺ ապրիլյան պատերազմի հանձնաժողովի նախագահ Անդրանիկ Քոչարյանի կողմից հերքվեց այն, որ Խաչատուրովը պատերազմը սկսվելու ժամանակ բիլիարդ խաղալուց է եղել: Հերքվեց նաեւ այն, որ զենքերի կամ սննդի պակաս է եղել, նույն օրը այն ալիքները, որոնք աշխատում են հօգուտ Նիկոլ Փաշինյանի, եւս սկսեցին տարածել Յուրի Խաչատուրովի՝ բիլիարդ խաղալու մասին ապատեղեկատվությունները: Իսկ Անդրանիկ Քոչարյանը, հավանաբար շատ տխուր խոսակցություն ունենալով Նիկոլ Փաշինյանի հետ, թե այս ինչ է տեղի ունենում, սկսել են հերքել վերոնշյալ լուրերը, մի բան պետք է մտածել, Անդրանիկ Քոչարյանին դարձրին դեղին մամուլի բլոգեր եւ սկսեց խոսել արդեն 20 կորցրած դիրքերի մասին, որը նույնպես չի համապատասխանում իրականությանը: Ինչ վերաբերում է 80-ականների զենքով կռվելուն, ապա այս դեպքում եւս նախագահը հիմնավորեց, թե ինչ դիվանագիտական քայլ է կատարել եւ խոսել Անգելա Մերկելի հետ դրա մասին: Բացի այդ, որեւէ երկրում 80-ականների զենք արտահայտություն գոյություն չունի: Նույն Դ-20 գաուբիցները, որոնք արտադրվել են 1953 թվականին, շատ երկրներում ունեն մեծ պահանջարկ: Երբ Նիկոլ Փաշինյանն ասում է, որ 80-ականների զենք ասվածի էջը փակված է, նա իր պաշտոնավարման ընթացքում Հայաստան «բերեց» «Օսա ԱԿ» հակաօդային պաշտպանության համալիրներ, որոնք արտադրվել են մինչ 1980-ականները: Այս ամենը քաղաքական մանիպուլյացիա անելու համար են, եւ նրանք, ովքեր հասկանում են ռազմական գործողություններից, այս ամենը կհասկանան, եւ չի կարելի բանակը, մեր հաղթանակն ու զինվորների սխրանքը թաթախել քաղաքական խաղերի մեջ եւ դիվիդենտներ շահել: Վաղ թե ուշ ամեն ինչ բացահայտվելու է, եւ շարքային ՔՊ-ականից մինչեւ «Սասնա ծուռ» պատասխան են տալու առաջին հերթին իրենց, հետո հանրությանը, ինչպես նաեւ, ցավոք, դա տեղի չունեցավ ժամանակին՝ համապատասխան մարմինների առաջ:

– Կառանձնացնե՞ք երեք հիմնական մեսիջ, որոնք ընկած էին Սերժ Սարգսյանի պատասխանների հիմքում:

– Իրականում մեսիջները բազմաթիվ էին: Բայց առաջինը պետք է հասկանալ, որ մեր նախագահները՝ 2-րդ, 3-րդ, նրանք հող հանձնողներ չեն, այլ ազատագրողներ են: Դրա վկայությունն է այն, որ Բելառուսի եւ Ադրբեջանի նախագահները համոզում կամ ստիպում էին հող հանձնել, որոնք տեղի չունեցան: Հաջորդը դա 80-ականների զենքի պատասխանն էր, եւ երրորդը՝ Իսկանդերի չկիրառման հարցն էր, ըստ որի` դրա կիրառման արդյունքում խաղի մեջ կմտներ Թուրքիան` որպես Ադրբեջանի գլխավոր ռազմական ընկեր:

Զրույցը` ԻԼՈՆԱ ԱԶԱՐՅԱՆԻ