Եվս մեկ երկիր ցանկանում է միանալ COVID-19-ի դեմ ռուսական պատվաստանյութի փորձարկումներին

Արխիվ 16-20 20 Օգոստոս, 2020 10:08

Մեքսիկայի ԱԳ նախարար Մարսելո Էբրարդը շահագրգռվածություն է հայտնել ռուսական «Սպուտնիկ V» կորոնավիրուսի դեմ պատվաստանյութի կլինիկական փորձարկումներին միանալու հարցում, հետեւում է Մեքսիկայի արտաքին քաղաքական գերատեսչության հաղորդագրությունից՝ ամփոփելով Էբրարդի եւ Ռուսաստանի դեսպան Վիկտոր Կորոնելիի հանդիպման արդյունքները:

Էբրարդը պատմել է, որ Կորոնելիի հետ հանդիպման ժամանակ հայտարարել է պատվաստանյութի կլինիկական փորձարկումների երրորդ փուլն անցկացնելու երկրի շահագրգռվածության մասին, որպեսզի հնարավորինս շուտ այն ստանա Մեքսիկայում:

Նշվում է, որ երեք ամիս տեւողությամբ պատվաստանյութի փորձարկման երրորդ փուլը, որին այժմ մասնակցում է 40 հազար մարդ, վճռորոշ նշանակություն կունենա դրա արդյունավետության, գրանցման եւ առեւտրայնացման որոշման համար:

Էբրարդը հանդիպման ժամանակ հիշեցրել է, որ Լոպես Օբրադորի կառավարությունը COVID-19-ի դեմ պատվաստանյութերն ու դեղերը դիտարկում է որպես հանրային սեփականություն, որին պետք է համընդհանուր հասանելիություն տալ:

Ռուսաստանը հայտնել է, որ ներկայումս ավելի քան 20 երկրներից ստացել է մեկ միլիարդ դոզա պատվաստանյութ գնելու հայտ: Ռուսաստանը պայմանավորվել է հինգ երկրներում պատվաստանյութի արտադրության մասին, հաշվի առնելով, որ ռուսական առկա հզորությունները թույլ են տալիս տարեկան արտադրել 500 մլն չափաբաժին: