Ադրբեջանցիները հրաժարվել են Խաչատուրովի հետ հանդիպել Թբիլիսում, նախընտրել են՝ Մոսկվան

Մինչ Մոսկվայում տեղի ունեցած հանդիպումն արդեն իսկ հայտարարվել էր հրադադարի ռեժիմի մասին։ Ճիշտ է, որ այն 100 տոկոսով չէր պահպանվում, բայց այնուհանդերձ հրադադարը հայտարարվել էր,- ասում է ՀՀ 3-րդ նախագահ Սերժ Սարգսյանն, անդրադառնալով ապրլյան քառօրյա պատերազմի օրերին Մոսկվայում գլխավոր շտաբի պետերի մակարդակով տեղի ունեցած հանդիպմանը։

Նա նշեց, որ գեներալ Խաչատուրովն իրեն զանգել ու տեղեկացրել է, որ իր հետ կապվել է Ռուսաստանի Դաշնության ՊՆ Գլխավոր շտաբի պետն ու հայտնել, որ ադրբեջանցիները պատրաստ են հանդիպելու և խոսելու հրադադարի թեմայով, ինչին գեներալ Խաչատուրովն ասել էր՝ որոշ ժամանակ անց կպատասխանի։

«Ավելի ուշ գեներալ Խաչատուրովն ասել է, որ ինքը պատրաստ է այդ հանդիպմանը՝ Թբիլիսում։ Ինչու այնտեղ, որովհետև Թբիլիսին շատ մոտ է և ռազմական գործողությունները վերսկսելուց հետո, նա կարող է հասնել Հայաստան։ Ակնհայտ է, որ գլխավոր շտաբն էր ղեկավարում ողջ ռազմական գործողությունները, որն, ի միջի այլոց, պետք է ասեմ՝ արել է շատ լավ, որից ես շատ գոհ եմ եղել և մասնավորապես՝ Յուրի Խաչատուրովի կատարած աշխատանքից նույնպես։ Յուրի Խաչատուրովին պատասխանել են, որ ադրբեջանցիները չեն ցանկանում հանդիպել Թբիլիսիում, այլ՝ Մոսկվայում, որովհետև ցանկացած պայմանավորվածություն կարիք ունի միջնորդի երաշխավորության։ Այսպիսի պայմաններում գեներալ Խաչատուրովը մեկնել է Մոսկվա, որտեղ տեղի ունեցած քննարկումների վերաբերյալ ամեն բան բոլորին վաղուց պարզ է»,- նշել է Ս.Սարգսյանը։