«Արմմոնո» - ն հատեց եզրագիծը. բոլոր ներկայացումներն անց են կացվել բացօթյա և առցանց

«Արմմոնո» - ն հատեց եզրագիծը. բոլոր ներկայացումներն անց են կացվել բացօթյա և առցանց

«Արմմոնո» 18-րդ միջազգային թատերական փառատոնն այս տարի կայացավ օգոստոսի 1-10-ը՝ ՀՀ կրթության, գիտության, մշակույթի և սպորտի նախարարության աջակցությամբ: Բոլոր ներկայացումներն անց են կացվել բացօթյա՝ խստորեն պահպանելով հակահամաճարակային բոլոր կանոնները:
Փառատոնի գրեթե բոլոր ներկայացումները ցուցադրվել են նաև առցանց։
Այս տարի փառատոնը նվիրված էր հայ մեծանուն գրող, արձակագիր Հրանտ Մաթևոսյանի 85-ամյակին:
Փառատոնի բացման և եզրափակիչ ներկայացումը վստահված էր ՀՀ վաստ. արտիստ Նարինե Գրիգորյանին: Ն. Գրիգորյանը ներկայացրել է «Գոմեշը» մոնոներկայացումը՝ ըստ Հ. Մաթևոսյանի:
Փառատոնի շրջանակում ցուցադրվել է 21 մոնոներկայացում, որից մեկը՝ մանկական՝ «Տիեզերքը մեր տունն է»՝ Դավիթ Եղիազարյանի կատարմամբ:
Փառատոնին մասնակցում էին դերասաններ Նարեկ Բաղդասարյանը, Զարուհի Խաչատրյանը, Լիլյա Մուկուչյանը, Նաիրա Եդիգարյանը, Դավիթ Աբրահամյանը, Արամ Հայրապետյանը և այլք:
Ստեղծված իրավիճակից ելնելով, այս տարի, ցավոք սրտի, արտերկրից դերասաններ փառատոնը չի հյուրընկալել, հասկանալի պատճառներով:
Փառատոնի առցանց տիրույթը եղել է գերհագեցած. Ցուցադրվել են օնլայն ներկայացումներ՝ Ֆրանսիայից, ՌԴ-ից, Վրաստանից, Լիտվայից, Ուկրաինայից և այլն:
Փառատոնի մասնակիցներին, այս անգամ, առցանց ողջունել են մոնոփառատոների տնօրենները՝ Նինա Մազուրը, Իոլանտա Սուտովիչը, Մարիա Տանանան ու այլք:
Համապատասխան թույլտվություն ստանալուց հետո, ներկայացումները ցուցադրվել են «Մոսկվայի տուն» մոսկովյան մշակութագործարարական կենտրոնի և Զուլում և Մուշեղ Գրիգորյանների արվեստանոցի բացօթյա տարածքներում, ինչպես նաև Թիվ 15 սրճարանում:
Հայ դրամատուրգ Կարինե Խոդիկյանը ներկայացրել է օրերս ավարտին հասցրած իր հեղինակած «Ինչպես խույս տվեցի քովիդից, բայց...» պիեսը:
«Արմմոնո» միջազգային թատերական փառատոնը հյուրընկալվել է նաև Վանաձորում: Վանաձորի Հ. Աբելյանի անվան թատրոնի բացօթյա տարածքում ցուցադրվել է երկու մոնոներկայացում՝ ՀՀ ժող. արտիստ Հակոբ Ազիզյանի, ՀՀ արվեստի վաստակավոր գործիչ Մայիս Սարգսյանի մասնակցությամբ:
Փառատոնի շրջանակում ցուցադրվել են նաև դեբյուտային ներկայացումներ:

Փառատոնի մամուլի ծառայություն