Գիտնականները արձանագրում են, որ կորոնավիրուսն ավելի ու ավելի է հարվածում կոնկրետ ռասայական խմբերի

ԱՄՆ Հիվանդությունների վերահսկման և կանխարգելման կենտրոնի նոր զեկույցում, որը հրապարակվել է այս շաբաթվա վերջին նշված է, որ սեւամորթ եւ լատինամերիկացի երեխաները շատ ավելի հաճախ են հոսպիտալացման կարիք ունեցել։ Ընդ որում, լատինամերիկացի երեխաները մոտավորապես ութ անգամ ավելի հաճախ են COVID-19-ը ծանր ձեւով հիվանդացել, քան սպիտակ երեխաները, իսկ սեւամորթ երեխաները՝ հինգ անգամ ավելի հաճախ:

Չնայած այն համառ լուրերին, թե երեխաները «գրեթե անընկալունակ են» վիրուսի նկատմամբ, կորոնավիրուս ախտորոշմամբ հոսպիտալացված 14 Նահանգներից 576 երեխաների վերլուծությունը ցույց է տվել, որ երեք երեխաներից մեկը հոսպիտալացվել է ինտենսիվ թերապիայի բաժանմունք։ Համանման ցուցանիշ է նաեւ մեծահասակների շրջանում: Հոսպիտալացվածներից գրեթե ամեն հինգերորդը երեխա է։ Ամենատարածված ախտանշանները էին ջերմություն եւ սարսուռ, սրտխառնոց եւ փսխում։ Հոսպիտալացված սեւամորթ եւ լատինաամերիկյան երեխաների շրջանում ամենից հաճախ ճարպակալում է նկատվել:

Հետազոտողները դեռ չեն պարզել, թե ինչու են որոշ ռասայական խմբեր հոսպիտալացվել ավելի բարձր հաճախականությամբ, քան մյուսները, սակայն այս նոր եզրակացությունները նման են այլ հետազոտությունների: «Վարկած է առաջ քաշվել, որ լատինաամերիկյան մեծահասակները կարող են ենթարկվել SARS-CoV-2 վարակի բարձր ռիսկի, քանի որ նրանք առավել հաճախ աշխատում են սոցիալական հեռավորության չկատարման պայմաններում»,- ենթադրում են հետազոտողները:

Միաժամանակ հետազոտության արդյունքները ցույց են տվել, որ COVID-19-ի ծանր բարդություններով հոսպիտալացված երեխաների շրջանում մահացության մակարդակը մնում է ցածր: «Pediatrics» ամսագրում հրապարակված առանձին ուսումնասիրությունը եւս ցույց է տվել, որ Լատինական Ամերիկայի երեխաները ավելի քան վեց անգամ հակված են վիրուսի դրական թեստի, քան սպիտակ երեխաները, իսկ սեւամորթ երեխաները' չորս անգամ: