«Մենք կաշխատենք և ամեն ինչի գնահատականը կտա ժամանակը» Վարդան Բիչախչյան

Վարդան Բիչախչյանն «Արարատի» գլխավոր մարզիչի պաշտոնում իր առաջին հարցազրույցն է տվել ակումբի մամուլի ծառայությանը։
42-ամյա մասնագետը խոսել է ընթացիկ աշխատանքների, իր տպավորությունների և մրցաշրջանից ակնկալիքների մասին:

«Մտքերը միայն դրական են: Եկել ենք, որպեսզի կարողանանք լավ աշխատանք կատարել: Հիմա չեմ փորձի շատ խոսել: Իմ կարծիքով, ճիշտն աշխատելն է: Մենք կաշխատենք և ամեն ինչի գնահատականը կտա ժամանակը»,- ասել է գյումրեցի մարզիչն ու հավելել, որ ի սկզբանե ժամանակի խնդիր կար ֆուտբոլիստներին լավ ճանաչելու և հասկանալու համար, սակայն այժմ ամեն ինչ ընթանում է իր հունով։

«Ցանկացած մարզչի համար էլ նոր թիմում մեկնարկում դժվարություններ լինում են: Փոքրիկ խնդիրներ են առաջ գալիս, որոնք փորձում ենք արագորեն հաղթահարել: Մոտ երկու շաբաթից կարծում եմ իդեալական պատկեր կունենանք և կկարողանանք լիարժեք կենտրոնանալ մեր աշխատանքի վրա»,- նշել է Վարդան Բիչախչյանը։

Մարզիչը խոսել է նաև թիմում հայ ֆուտբոլիստների քանակի և նրանց  խաղաժամանակ տրամադրելու մասին։

«Իմ կարծիքով հարաբերակցությունը կլինի հիսունը հիսունի, քանի որ բավականին շատ են հայ ֆուտբոլիստները՝ դարպասապահ Պողոս Այվազյանը, պաշտպանությունում Հրայր Մկոյանը, Վահե Մուրադյանը, Ժիրայր Մարգարյանը, հենակետային գոտում՝ Կարեն Մուրադյանը, Դավիթ Մանոյանը, եզրերում Էդգար Մալաքյանը, Զավեն Բադոյանը և Ռազմիկ Հակոբյանը, չորս-հինգ խաղացող մեզ միացել են երկրորդ թիմից: Բնականաբար, հայ ֆուտբոլիստների քանակի հետ կապված խնդիր մենք չունենք: Պարզ է, որ այն լեգեոներները, ովքեր չեն համապատասխանի և չեն կարողանա ռեալ օգուտ տալ, թիմում չեն լինի»,- եզրափակել է իր խոսքը «Արարատի» գլխավոր մարզիչը։

Վարդան Բիչախչյանի ամբողջական հարցազրույցին կարող եք ծանոթանալ երևանյան ակումբի ֆեյսբուքյան էջում։