Ինչու է աշխատանքից ազատվել «Նորք ինֆեկցիոն-կլինիկական հիվանդանոցի» տնօրենը

«Նորք ինֆեկցիոն-կլինիկական հիվանդանոցի» տնօրեն ՄՀԵՐ ԴԱՎԻԴՅԱՆՑՆ այսօր արտահերթ ժողով է հրավիրել հիվանդանոցի անձնակազմի հետ։ Նա մասնավորապես տեղեկացրել է, որ հանդիպում է ունեցել ՀՀ առողջապահության նախարար Արսեն Թորոսյանի հետ եւ ներկայացրել է աշխատանքից ազատման դիմում։ Իր խոսքում պարոն Դավիդյանցը խորին շնորհակալություն է հայտնել ողջ անձնակազմի՝ն 2 տարիների ընթացքում համատեղ աշխատանքի համար, եւ հատկապես այն ահռելի աշխատանքի, որը կատարել է «Նորք» ԻԿՀ-ը անձնակազմը COVID 19 համավարակի շրջանում։

Հիշեցնենք, որ Մ. Դավիդյանցը դեռեւս ամիսներ առաջ բավական ուշագրավ հայտարարությամբ էր հանդես եկել պարետատան նիստից հետո  տեղի ունեցած բրիֆինգի ժամանակ: Նա շեշտել էր, որ «Նորք ինֆեկցիոն-կլինիկական հիվանդանոցը» գրեթե շուրջ 4 ամիս է, ինչ սկսել է կորոնավիրուսային վարակակիրներին բուժելու գործընթացը, եւ առաջին բուժհաստատությունն է, որ իր վրա վերցրեց կարոնավիրուս կոչված չարիքի առաջին հարվածը:

«Մենք փետրվար ամսից ողջ անձնակազմով` բժիշկներով, բուժքույրերով, մայրապետներով, պայքարում ենք այս հիվանդության դեմ», - վստահեցրել էր Մհեր Դավիդյանցը եւ պնդել, որ ցավոք, հիվանդությունն այժմ փոխել է իր ընթացքը,եւ եթե հունվար-փետրվար-մարտ ամիսներին հիվանդությունը հիմնականում թեթեւ էր ընթանում, ու իրենք ունեին թեթեւ եւ միջին ծանրության դեպքեր, այժմ, ցավոք, գերակշռում են ծանր եւ ծայրահեղ ծանր դեպքերը:

Ըստ էության, Դավիդյանցը բացահայտել էր, որ դեռ հունվար-փետրվար ամիսներից արդեն գրանցվել են կորոնավիրուսով վարակվածների կամ նոր տիպի հարուցիչով հիվանդությունների, թոքաբորբի դեպքեր Հայաստանում, ինչը փաստում է, որ իշխանությունը ստել է՝ հայտարարելով, որ կորոնավիրուսի առաջին դեպքը արձանագրվել է մարտի 1-ին: Չի բացառվում, որ հենց այս հայտարարությունն էր, որ չներվեց նրան եւ իշխանությունը աղմուկը մարելուն պես՝ ազատվեց հերթական կադրեց, որը պատրաստ չէր կոծկել ճշմարտությունը հանրությունից եւ կատարել իշխանության քմահաճույքները:

ՀՐԱՆՏ ՍԱՐԱՖՅԱՆ