«ՉԳԻՏԵՆՔ` ԵԹԵ ԱՅՍՊԵՍ ՇԱՐՈՒՆԱԿՎԻ, ԻՆՉՔԱՆ ՄԱՐԴ ԴՈՒՐՍ ԿԳԱ ՓՈՂՈՑ»

«Ամուլսարի ցույցը կառավարության դեմ չէ, հակակառավարական չէ, մարդիկ դուրս են եկել իրենց հողը, ջուրը, հայրենիքը պահելու համար` հարցին վերջնական լուծում ակնկալելով: Եվ այսօր Ամուլսարի հարցի ողջ պատասխանատվությունը Նիկոլ Փաշինյանի վրա է»: «Իրավունքի» հետ զրույցում, անդրադառնալով Ամուլսարի շուրջ ընթացող վերջին զարգացումներին, նման կարծիք հայտնեց ջերմուկցի բնապահպան-ակտիվիստ ՇԻՐԱԿ ԲՈՒՆԻԱԹՅԱՆԸ:

– Շատերը նշում են, որ կառավարության որդեգրած կրավորական կեցվածքը խոսում է այն մասին, որ իշխանությունը, այնուամենայնիվ, որոշել է Ամուլսարը հանք դարձնել: Դուք ինչպե՞ս եք գնահատում կառավարության լռությունը:

– Կառավարության կեցվածքից նման եզրահանգման գալը այդքան էլ ճիշտ չէ: Բայց այն, որ կա անհասկանալի լռություն, դա փաստ է: Եվ ինչքան շարունակվի այդ լռությունը, այնքան շատ է բեւեռվելու ժողովուրդ-կառավարություն հարաբերությունները: Ես ուզում եմ մեկ անգամ եւս շեշտել, որ Ջերմուկ համայնքի բնակիչները դուրս են գալիս փողոց եւս մեկ անգամ վերահաստատելու, որ անկախ փորձաքննության արդյունքներից, մեզ մոտ դիրքորոշում չի փոխվել: Մենք ի սկզբանե չենք ասել` սա լավ հանք է, վատ հանք է, մենք ասել ենք` սա առողջարանային գոտի է, ու այստեղ ոչ մի տիպի մետաղական հանք չպետք է լինի: Բնակչությունը դուրս է գալիս խաղաղ ակցիայով, բաց ձեռքերով վերահաստատելու մեկ տարուց ավել առաջ կայացրած իր որոշումը: Այս պահին մեր գերնպատակն դա է, որ Ջերմուկ համայնքի բնակչությունը ցույց տա, որ իր մոտ դիրքորոշում չի փոխվել Ամուլսարի հարցում, անկախ նրանից` ԷԼԱՐԴ-ը փորձաքննության ինչ արդյունքներ է տվել: Այնպես չէ, թե մենք գտնում ենք, որ դրական է տվել, որովհետեւ հրապարակված փորձաքննության արդյունքները եւ քննչական կոմիտեի հայտարարությունն ընդհանրապես իրար հետ կապ չունեն: Երբ կարդում ես` ուրիշ բան է, բայց իրենք հակիրճ ներկայացնելիս այդ 300-400 էջը, ընդհանրապես ուրիշ բան են ասում: Իրենք քննիչներ են, բայց փորձում են կատարել այլ մասնագիտական գործառույթներ: Այդ փաստաթղթերին պետք է ծանոթանան ավելի լուրջ մասնագետներ, այդ ոլորտի մասնագետներ, որ դրանից հետո կառավարությունն իր դիրքորոշումն արտահայտի:

– Պարոն Բունիաթյան, ինչպե՞ս եք տեսնում Ձեր հետագա պայքարը, առավել եւս, որ արտակարգ դրությունը եւս մեկ անգամ է հետաձգվում:

– Այո, արտակարգ դրություն է, բայց մարդիկ ինքնաբուխ են դուրս գալիս, որովհետեւ խնդրի էությունը այնքան կարեւոր է, որ չեն կարողանում իրենց զսպել: Չգիտենք՝ եթե այսպես շարունակվի, ինչքան մարդ դուրս կգա փողոց: Ամուլսարի պայքարը հասել է իր պիկին, եւ մենք հետ չենք կանգնելու: Ամուլսարը հանք չի դառնալու՝ անկախ ամեն ինչից: Անելու ենք այն բոլոր խաղաղ անհնազանդությունները, որոնց միջոցով հնարավոր լինի հասնել մեզ համար ցանկալի արդյունքի: Հասնելու ենք նրան, որ ժողովրդի կողմից ընտրված իշխանություններին ստիպենք` ընդունել ժողովրդի կամքը:

Զրույցը` ԻԼՈՆԱ ԱԶԱՐՅԱՆԻ